ಮಂಡ್ಯದಲ್ಲಿ ಮಳೆಗಾಗಿ ಕಪ್ಪೆಗಳ ಮದುವೆ ಮಾಡಿಸಿದ ಗ್ರಾಮಸ್ಥರು

ಮಂಡ್ಯ: ಬರ ತೀವ್ರವಾಗಿ ಕಾಡುತ್ತಿದ್ದು, ಈ ಸಮಯದಲ್ಲಿ ಮಳೆ ಬರಬಹುದೆಂದು ಕಾದು ಕುಳಿತಿರುವ ಜನ ಮಳೆ ಬಾರದೆ ತಲೆಸುಡುವ ಬಿಸಿಲಿಗೆ ಸಿಲುಕಿ ಬಸವಳಿದಿದ್ದಾರೆ. ನದಿ ಮೂಲಗಳು ಬತ್ತಿವೆ. ಕೆರೆಗಳಲ್ಲಿ ನೀರು ಆರಿದ್ದು ಮೈದಾನದಂತಾಗಿವೆ. ಊರುಗಳಲ್ಲಿ ಸಿಕ್ಕ, ಸಿಕ್ಕ ದೇವರುಗಳಿಗೆ ಪ್ರಾರ್ಥನೆ ಸಲ್ಲಿಸಿ ಮಳೆಗಾಗಿ ಮಾಡದ ಪ್ರಾರ್ಥನೆಗಳಿಲ್ಲ. ಆದರೆ ವರುಣ ಅದ್ಯಾಕೋ ಕೃಪೆ ತೋರಿದಂತೆ ಕಾಣುತ್ತಿಲ್ಲ.

ಪರಿಸ್ಥಿತಿ ಹೀಗೆಯೇ ಮುಂದುವರೆದರೆ ಮುಂದಿನ ದಿನಗಳಲ್ಲಿ ಎದುರಾಗಲಿರುವ ಭೀಕರತೆಯನ್ನು ಯೋಚಿಸಿ ಜನ ಬೆಚ್ಚಿ ಬೀಳುತ್ತಿದ್ದಾರೆ. ಈಗಾಗಲೇ ಪ್ರಾಣಿ, ಪಕ್ಷಿಗಳಿಗೂ ಕುಡಿಯಲು ನೀರು ಸಿಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಹೀಗಾಗಿ ಜನ ಕೂಡ ಬೇರೆ ದಾರಿ ಕಾಣದೆ ತಮಗೆ ತೋಚಿದ ಪೂಜೆ ಪುರಸ್ಕಾರಗಳನ್ನು ಮಾಡುತ್ತಿದ್ದಾರೆ. ಈ ನಡುವೆ  ಜಿಲ್ಲೆಯ  ಭಾರತಿ ನಗರದ ಸಮೀಪದ ಕೆ.ಪಿ ದೊಡ್ಡಿಯ ಗ್ರಾಮಸ್ಥರು ಹಾಗೂ ಯುವಕರು ಕಪ್ಪೆ ಮದುವೆ ಮಾಡುವ ಮೂಲಕ ವರುಣನಿಗಾಗಿ ವಿಭಿನ್ನ ಪ್ರಾರ್ಥನೆ ಸಲ್ಲಿಸಿದ್ದಾರೆ.

ಕಪ್ಪೆಗಳನ್ನು ತಂದು ಅವುಗಳಿಗೆ ಶಾಸ್ತ್ರೋಕ್ತವಾಗಿ ಮದುವೆ ಮಾಡಿಸಿದ್ದು, ಈ ಸಂಬಂಧ ಗ್ರಾಮದ ದೇಗುಲದಲ್ಲಿ ವಿಶೇಷ ಪೂಜೆಯನ್ನು ನಡೆಸಲಾಗಿದೆ ಆ ನಂತರ ಮದುವೆಗೆ ಆಗಮಿಸಿದ  ಕೆ.ಪಿ ದೊಡ್ಡಿ ಹಾಗೂ ಮಣಿಗೆರೆ ಹಾಗೂ ಸುತ್ತಮುತ್ತಲಿನ ಸುಮಾರು 500 ಕ್ಕೂ ಹೆಚ್ಚಿನ ಜನರು ಅನ್ನಸಂತರ್ಪಣೆ ಮಾಡಲಾಗಿದೆ. ಸದ್ಯ ಕಪ್ಪೆ ಮದುವೆ ಬಳಿಕವಾದರೂ ಮಳೆ ಬರುತ್ತಾ ಎಂಬುದನ್ನು ಕಾದು ನೋಡಬೇಕಿದೆ.