ಸುಂಟಿಕೊಪ್ಪ: ನಾಕೂರು ಶಿರಂಗಾಲ ಗ್ರಾಮ ಪಂಚಾಯಿತಿಗೆ ಸೇರಿದ ಭಾಗ 2ನೇ ಗ್ರಾಮದಲ್ಲಿ ರಸ್ತೆ ಸರಿಪಡಿಸಿ ಕೊಡದಿದ್ದಲ್ಲಿ ಚುನಾವಣೆ ಬಹಿಷ್ಕರಿಸುವುದಾಗಿ ಗ್ರಾಮಸ್ಥರು ಎಚ್ಚರಿಕೆ ನೀಡಿದ್ದಾರೆ.
ನಾಕೂರು ಶಿರಂಗಾಲ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ನಾಕೂರು ಶಿರಂಗಾಲ ಗ್ರಾಮ ಭಾಗ2 ಕ್ಕೆ ತೆರಳುವ ಸಾರ್ವಜನಿಕ ಮುಖ್ಯ ರಸ್ತೆಯು ಅತಿಯಾದ ಮಳೆಯಿಂದ ಇತ್ತೀಚೆಗೆ ತೀರಾ ಹದಗೆಟ್ಟ ಕಾರಣ ವಾಹನಗಳು ಸಂಚರಿಸಲು ಹಾಗೂ ಸಾರ್ವಜನಿಕರಿಗೆ ನಡೆದಾಡಲು ಸಹ ಕಷ್ಟವಾಗುತ್ತಿದೆ. ಈ ಭಾಗದಲ್ಲಿ 25 ಮನೆಗಳಿದ್ದು 150 ಮತದಾರರಿರುತ್ತಾರೆ. ನಮ್ಮ ಗ್ರಾಮಕ್ಕೆ ತೆರಳುವ ರಸ್ತೆಯನ್ನು ಸರಿಪಡಿಸಿ ಕೊಡದಿದ್ದರೆ ನಾವುಗಳು ಮುಂಬರುವ ಎಲ್ಲಾ ಮತದಾನವನ್ನು ಬಹಿಷ್ಕರಿಸಲು ನಿರ್ಧರಿಸಿದ್ದೇವೆ ಎಂದು ಗ್ರಾಮಸ್ಥರಾದ ಪವನ್, ಅನಿಲ್, ಭಾನುಮತಿ, ರವಿ, ಶೀತಲ್ ಇತರ ಗ್ರಾಮಸ್ಥರು ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಭಾನುವಾರ ಪ್ರತಿಭಟನೆ: 1991ರಲ್ಲಿ ಈ ರಸ್ತೆಯನ್ನು ಮೆಟ್ಲಿಂಗ್ ಮಾತ್ರ ಮಾಡಲಾಗಿತ್ತು.ನಂತರ 2 ಬಾರಿ 100 ಮೀಟರ್ ನಷ್ಟು ರಸ್ತೆ ಡಾಂಬರೀಕರಣ ಮಾಡಲಾಗಿದ್ದು, ಆದರೆ ಉಳಿದ ಒಂದೂವರೆ ಕಿ.ಮೀ.ನಷ್ಟು ಸಾರ್ವಜನಿಕ ರಸ್ತೆ ಇದುವರೆಗೂ ಡಾಂಡರೀಕರಣವಾಗಲೀ, ಕಾಮಗಾರಿಯಾಗಲಿ ಮಾಡಲಿಲ್ಲ.ಈ ನಿಟ್ಟಿನಲ್ಲಿ ಅಸಮಾಧಾನಗೊಂಡ ಈ ಭಾಗದ ಗ್ರಾಮಸ್ಥರು ಮಾ.19(ಭಾನುವಾರ) ಗ್ರಾಮಸ್ಥರು ಬೆಳಿಗ್ಗೆ 9 ಗಂಟೆಯಿಂದ ಪ್ರತಿಭಟನೆ ನಡೆಸಲು ನಿರ್ಧರಿಸಿದ್ದಾರೆ.