ಪ್ರಧಾನ ಮಂತ್ರಿ ಕಿಸಾನ್ ಸನ್ಮಾನ್ ಯೋಜನೆಯ ಸವಲತ್ತು ಪಡೆಯಲು, ಇ- ಕೆ.ವೈ.ಸಿ.ಕಡ್ಡಾಯ

ಹೊಳೆನರಸೀಪುರ: ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ ಯೋಜನೆಯಾದ ಪ್ರಧಾನ ಮಂತ್ರಿ ಕಿಸಾನ್ ಸನ್ಮಾನ್ ಯೋಜನೆಯ ಸವಲತ್ತುಗಳನ್ನು ಪಡೆಯಲು, ಇ- ಕೆ.ವೈ.ಸಿ.ಕಡ್ಡಾಯವಾಗಿದ್ದು, ರೈತಾಪಿ ಬಂಧುಗಳು ತಮ್ಮ ಹತ್ತಿರದ ಗ್ರಾಮ ಒನ್, ಸಾಮಾನ್ಯ ಸೇವಾ ಕೇಂದ್ರ ಹಾಗೂ ಧರ್ಮಸ್ಥಳ ಸಂಸ್ಥೆಯ ಕಂಪ್ಯೂಟರ್ ಸೇವಾ ಕೇಂದ್ರಗಳಲ್ಲಿ ಕಡ್ಡಾಯವಾಗಿ ತಮ್ಮ ಆಧಾರ್ ಕಾರ್ಡ್ ಮತ್ತು ಮೊಬೈಲ್ ನೊಂದಿಗೆ ತೆರಳಿ ಇ- ಕೆ.ವೈ.ಸಿ. ಮಾಡಿಸಿಕೊಳ್ಳಬೇಕೆಂದು ಸಹಾಯಕ ಕೃಷ್ಣ ನಿರ್ದೇಶಕರಾದ ಸಪ್ನ.ಕೆ.ಹೆಚ್. ತಿಳಿಸಿದರು.

ಅವರು ಇಂದು ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡುತ್ತಾ, ಇ- ಕೆ.ವೈ.ಸಿ. ಮಾಡಿಸಿಕೊಳ್ಳಲು ಜೂನ್ 30 ಅಂತಿಮ ದಿನವಾಗಿದ್ದು, ಇಲಾಖೆಯ ವತಿಯಿಂದ ಸಹ ಸೇವೆಯನ್ನು ನೀಡಲಾಗುತ್ತಿದೆ ಎಂದು ತಿಳಿಸಿದರು.
ಮುಂದುವರೆದು ಮಾತನಾಡಿದ ಅವರು, ಇನ್ನು ಮಂದೆ ರಾಜ್ಯದ ಎಲ್ಲಾ ರೈತ ಸಂಪರ್ಕ ಕೇಂದ್ರಗಳಲ್ಲಿ ಬಾರ್ ಕೋಡ್ ವ್ಯವಸ್ಥೆ/ ಕ್ಯೂ ಆರ್.ಕೋಡ್ ವ್ಯವಸ್ಥೆಯನ್ನು ಜಾರಿಗೆ ತರಲಾಗುತ್ತಿದ್ದು. ಈಗಾಗಲೇ ತಾಲ್ಲೂಕಿನ 3 ಹೋಬಳಿಗಳಲ್ಲಿ ಬಾರ್ ಕೋಡ್ ಯಂತ್ರವನ್ನು ಅಳವಡಿಸಿ ಜಾರಿಗೆ ತರಲಾಗಿದೆ.

ರೈತ ಸಂಪರ್ಕ ಕೇಂದ್ರಗಳಲ್ಲಿ ಬಿತ್ತನೆ ಬೀಜ,ಕೀಟನಾಶಕ, ಲಘು ಪೋಷಕಾಂಶ,ಟಾರ್ಪಲ್, ಕೃಷಿ ಯಂತ್ರೋಪಕರಣಗಳಗಳನ್ನು ರಿಯಾಯಿತಿ ದರದಲ್ಲಿ ನೀಡಲು ಬಾರ್ ಕೋಡ್ ವ್ಯವಸ್ಥೆಯಡಿಯಲ್ಲಿ ನೀಡಲಾಗುತ್ತದೆ ಮತ್ತು ಫಲಾನುಭವಿಗಳಿಗೆ ಪರಿಕರಗಳನ್ನು ವಿತರಿಸುವಾಗಲೂ ಬಾರ್ ಕೋಡ್ ಬಳಕೆಯಾಗಲಿದೆ ಎಂದರು.

ಈ ಬಾರಿ ತಾಲ್ಲೂಕಿನ ಮಳೆ ಬೆಳೆ ಪರಿಸ್ಥಿತಿಯ ಮತ್ತು ರಸಗೊಬ್ಬರಗಳ ಲಭ್ಯತೆ ಬಗ್ಗೆ ಮಾಹಿತಿಯನ್ನು ನೀಡಿದ ಅವರು. ತಾಲ್ಲೂಕಿನಲ್ಲಿ ಮುಂಗಾರು ಎಪ್ರಿಲ್ ಮಾಹೆಯಿಂದ ಪ್ರಾರಂಭವಾಗಿದ್ದು,ವಾಡಿಕೆ ಮಳೆ 198.6 ಎಂ.ಎಂ ಇದ್ದು, ಪ್ರಸ್ತುತ 144.4 ಎಂ.ಎಂ. ಮಳೆಯಾಗಿದ್ದು ಶೇಕಡಾ 28% ಕೊರತೆಯಾಗಿದೆ. ತಾಲ್ಲೂಕಿನಲ್ಲಿ ಪ್ರಮುಖವಾಗಿ ತಂಬಾಕು, ಅಲಸಂದೆ, ಮುಸುಮಿನ ಜೋಳ, ಕಬ್ಬು,ಹೆಸರು, ಉದ್ದು, ಎಳ್ಳು, ತೊಗರಿ ಮಾಡಲಾಗುತ್ತದೆ.  ಇನ್ನೂ ನಾಲ್ಕು ಅಥವಾ ಐದು ದಿನಗಳಲ್ಲಿ ಸಮರ್ಪಕವಾಗಿ ಮಳೆಯಾಗದಿದ್ದರೆ ಬೆಳೆ ಹಾನಿಯಾಗುವ ಸಂಭವವಿದೆ ಎಂದು ತಿಳಿಸಿದರು.

ರಸಗೊಬ್ಬರಗಳ ಲಭ್ಯತೆ ಬಗ್ಗೆ ಮಾಹಿತಿ ನೀಡಿದ ಅವರು, ಯೂರಿಯಾ 466.25, ಮೆಟ್ರಿಕ್ ಟನ್. ಡಿ.ಎ.ಪಿ – 136.85 ಮೆಟ್ರಿಕ್ ಟನ್, ಎಂ.ಒ.ಪಿ – 608 ಮೆಟ್ರಿಕ್ ಟನ್, ಎಸ್.ಎಸ್.ಪಿ. – 24 ಮೆಟ್ರಿಕ್ ಟನ್, ಎನ್.ಪಿ.ಕೆ.ಎಸ್. ಕಾಂಪ್ಲೆಕ್ಸ್ – 887 ಮೆಟ್ರಿಕ್ ಟನ್ ಲಭ್ಯವಿದ್ದು ನಿಗದಿತ ಬೆಲೆಗೆ ರೈತರಿಗೆ ದೊರಕುವಂತೆ ಕ್ರಮವನ್ನು ಕೈಗೊಳ್ಳಾಗಿದೆ ಎಂದು ತಿಳಿಸಿದರು.

ತಾಲ್ಲೂಕಿನ 3 ರೈತ ಸಂಪರ್ಕ ಕೇಂದ್ರಗಳಲ್ಲಿ ಪ್ರಮಾಣೀಕೃತ ಬಿತ್ತನೆ ಬೀಜಗಳನ್ನು ಸಬ್ಸಿಡಿ ದರದಲ್ಲಿ ವಿತರಣೆ ಮಾಡಲಾಗುತ್ತದೆ, ರಾಗಿ,ತೊಗರಿ, ಗಂಗಾ ಕಾವೇರಿ, ಅಲಸಂದೆ,ಹೆಸರುಕಾಳು ಉದ್ದು, ಪಯನೀಯರ್ ಇತ್ಯಾದಿ ಬಿತ್ತನೆ ಬೀಜಗಳು ಲಭ್ಯವಿದ್ದು , ರೈತಾಪಿ ಬಂಧುಗಳು ಈ ಅವಕಾಶವನ್ನು ಸದುಪಯೋಗ ಪಡಿಸಿಕೊಳ್ಳಬೇಕೆಂದು ವಿನಂತಿಸಿದರು.