ಕುಂದಗೋಳದಲ್ಲಿ ಪಲ್ಸ್ ಪೋಲಿಯೊ ಕಾರ್ಯಕ್ರಮದ ಪೂರ್ವಭಾವಿ ಸಭೆ

ಕುಂದಗೋಳ: ಪೋಲಿಯೊ ಬಗ್ಗೆ ಎಲ್ಲರೂ ಜಾಗೃತರಾಗಿ, ನಿರ್ಮೂಲನೆಗೆ ಕೈಜೋಡಿಸಬೇಕು ಎಂದು ತಾಲ್ಲೂಕು ಆರೋಗ್ಯಾಧಿಕಾರಿ ಡಾ. ವಿದ್ಯಾವತಿ ಪಾಟೀಲ ಹೇಳಿದರು.

ಪಟ್ಟಣದ ತಹಶೀಲ್ದಾರ್ ಕಚೇರಿಯ ಸಭಾಂಗಣದಲ್ಲಿ ನಡೆದ ಪಲ್ಸ್ ಪೋಲಿಯೊ ಕಾರ್ಯಕ್ರಮದ ಪೂರ್ವಭಾವಿ ಸಭೆ ಉದ್ದೇಶಿಸಿ ಮಾತನಾಡಿದ ಅವರು, 0-5 ವರ್ಷದ ಒಟ್ಟು 14,498 ಮಕ್ಕಳಿಗೆ ಈ ಬಾರಿ ಮಾರ್ಚ್ 3 ರಿಂದ ಪೋಲಿಯೊ ಹನಿ ಹಾಕಲಾಗುವುದು. 99 ಬೂತ್‌ಗಳಲ್ಲಿ 396 ಸದಸ್ಯರು, 104 ಗುಂಪುಗಳು, 19 ಮೇಲ್ವಿಚಾರಕರು ಇತರೆ ಸಹಾಯಕರು ಕಾರ್ಯ ನಿರ್ವಹಿಸಲಿದ್ದಾರೆ’ ಎಂದರು.

6 ಪ್ರಾಥಮಿಕ ಆರೋಗ್ಯ ಕೇಂದ್ರಗಳ ವ್ಯಾಪ್ತಿಯಲ್ಲಿ ಲಸಿಕಾ ಕಾರ್ಯಕ್ರಮ ನಡೆಯಲಿದ್ದು, ಈಗಾಗಲೇ ಪೋಲಿಯೊ ಲಸಿಕೆ ತಲುಪಿಸಲಾಗಿದೆ. ಭಿತ್ತಿ ಪತ್ರ, ಧ್ವನಿ ವರ್ಧಕ, ಜಾಥಾ ಮೂಲಕ ಜನರಲ್ಲಿ ಜಾಗೃತಿ ಮೂಡಿಸಲಾಗುತ್ತಿದೆ. ಪೋಲಿಯೊ ಕಾರ್ಯಕ್ರಮದಂದು ಹೊರಗುಳಿದ ಮಕ್ಕಳನ್ನು ಗುರುತಿಸಿ ಲಸಿಕೆ ಹಾಕಲಾಗುವುದು’ ಎಂದು ಮಾಹಿತಿ ನೀಡಿದರು.

ಹೆಸ್ಕಾಂ ಎಂಜಿನಿಯರ್ ವಿರೇಶ್ ಮಠದ, ಸಿಡಿಪಿಒ ಶಂಶಾದ ಕಂದಗಲ್, ರವೀಂದ್ರ ಬೋವಿಯಾರ್, ಜೆ.ಜೆ ಕಟಾಪುರಿಮಠ, ಮಹೇಶ ಶಾನಬಾಳ, ವಿರೇಶ ಅಂಗಡಿ, ಮಾಲಾ ಕರಡಿಗುದ್ದು, ಡಾ. ಸಂಜನಾ ಪಾಟೀಲ ಇದ್ದರು.