ಮಂಗಳೂರು: 1997ರಲ್ಲಿ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ನಲ್ಲಿ ವೈದ್ಯಕೀಯ ಶಿಕ್ಷಣ ಕಾಲೇಜಾಗಿ ಆರಂಭವಾದ ತುಂಬೆ ಗ್ರೂಪ್ ಇದೀಗ ತನ್ನ 30ನೇ ವರ್ಷಕ್ಕೆ ಪಾದಾರ್ಪಣೆ ಮಾಡುತ್ತಿದ್ದು ಒಂದು ಬೃಹತ್, ವೈವಿಧ್ಯಮಯ ಶೈಕ್ಷಣಿಕ ಆರೋಗ್ಯ ರಕ್ಷಣಾ ಸಮೂಹವಾಗಿ ಬೆಳೆದಿದೆ.
ಮುಂದಿನ ದಿನಗಳಲ್ಲಿ, ತುಂಬೆ ಗ್ರೂಪ್ ತನ್ನ ಮಾರ್ಗದರ್ಶಿ ತತ್ವವಾದ ‘ನಾವೀನ್ಯತೆಯ ಮೂಲಕ ಬೆಳವಣಿಗೆ’ ಯಿಂದ ಪ್ರೇರಿತವಾಗಿ ವೈದ್ಯಕೀಯ ಶಿಕ್ಷಣ ಕೇಂದ್ರಗಳ ವಿಶ್ವದ ಅತಿದೊಡ್ಡ ಜಾಲವನ್ನು ನಿರ್ಮಿಸುವ ಗುರಿಯನ್ನು ಹೊಂದಿದೆ ಎಂದು ಅದರ ಸ್ಥಾಪಕಾಧ್ಯಕ್ಷ, ಮಂಗಳೂರಿನ ತುಂಬೆಯವರಾದ ಡಾ.ತುಂಬೆ ಮೊಯ್ದಿನ್ ಅವರು ಹೇಳಿದ್ದಾರೆ. ಶುಕ್ರವಾರ ತುಂಬೆ ಹಿಲ್ಸ್ ನಲ್ಲಿ ನಡೆದ ಮಾಧ್ಯಮ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತ್ತಿದ್ದರು.
ಅಂದಿನ ಕಾಲದಲ್ಲಿ ವಿದೇಶಿಯೊಬ್ಬರಿಗೆ ಅಭೂತಪೂರ್ವ ಅವಕಾಶವಾಗಿದ್ದ ಖಾಸಗಿ ವೈದ್ಯಕೀಯ ಕಾಲೇಜನ್ನು ಸ್ಥಾಪಿಸಲು ಅಜ್ಞಾನ್‌ನ ಆಡಳಿತ ಕುಟುಂಬವು ನನ್ನನ್ನು ಆಹ್ವಾನಿಸಿದಾಗ ಈ ಪಯಣ ಪ್ರಾರಂಭವಾಯಿತು. ಗಲ್ಫ್ ಮೆಡಿಕಲ್ ಕಾಲೇಜು 1998 ರಲ್ಲಿ ಪ್ರಾರಂಭವಾಯಿತು ಮತ್ತು ಅಂದಿನಿಂದ ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ (GMU) ಆಗಿ ವಿಕಸನಗೊಂಡಿದೆ, ಇದನ್ನು ಇಂದು ಗಲ್ಫ್ ಪ್ರದೇಶದ ನಂ. 1 ಖಾಸಗಿ ವೈದ್ಯಕೀಯ ವಿಶ್ವವಿದ್ಯಾಲಯ ಎಂದು ಗುರುತಿಸಲಾಗಿದೆ.
GMU ಏಳು ಕಾಲೇಜುಗಳು, 50 ಕ್ಕೂ ಹೆಚ್ಚು ಮಾನ್ಯತೆ ಪಡೆದ ಕೋರ್ಸ್ ಗಳು, 111 ಕ್ಕೂ ಹೆಚ್ಚು ರಾಷ್ಟ್ರೀಯತೆಗಳ ಸುಮಾರು 5,000 ವಿದ್ಯಾರ್ಥಿಗಳನ್ನು ಹೊಂದಿದೆ ಮತ್ತು 70 ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ವಿಶ್ವವಿದ್ಯಾಲಯಗಳು ಮತ್ತು ಸಂಸ್ಥೆಗಳೊಂದಿಗೆ ಶೈಕ್ಷಣಿಕ ಮತ್ತು ಸಂಶೋಧನಾ ಸಹಯೋಗಗಳನ್ನು ಹೊಂದಿದೆ. ಈ ಸಮೂಹವು ಸಂಶೋಧನಾ ಅನುದಾನಕ್ಕಾಗಿ ವಾರ್ಷಿಕ ಸುಮಾರು 10 ಮಿಲಿಯನ್ ದಿರ್ಹಮ್ ಹೂಡಿಕೆ ಮಾಡುತ್ತದೆ ಎಂದು ಡಾ.ತುಂಬೆ ಮೊಯ್ದಿನ್ ಹೇಳಿದ್ದಾರೆ.
ತುಂಬೆ ಗ್ರೂಪ್‌ನ ಆರೋಗ್ಯ ರಕ್ಷಣಾ ಜಾಲವು ಶೈಕ್ಷಣಿಕ ಆಸ್ಪತ್ರೆಗಳು, ಕ್ಲಿನಿಕ್‌ಗಳು, ವೈದ್ಯಕೀಯ ಕೇಂದ್ರಗಳು, ರೋಗನಿರ್ಣಯ ಪ್ರಯೋಗಾಲಯಗಳು ಮತ್ತು ಫಾರ್ಮಸಿಗಳೊಂದಿಗೆ ಗಲ್ಫ್ ಪ್ರದೇಶದ ಅತಿದೊಡ್ಡ ಖಾಸಗಿ ಶೈಕ್ಷಣಿಕ ಆರೋಗ್ಯ ರಕ್ಷಣಾ ವ್ಯವಸ್ಥೆಗಳಲ್ಲಿ ಒಂದಾಗಿ ಬೆಳೆದಿದೆ. ಇದರ ಸೌಲಭ್ಯಗಳು 175 ರಾಷ್ಟ್ರೀಯತೆಗಳ 1.9 ಕೋಟಿಗಿಂತಲೂ ಹೆಚ್ಚು ರೋಗಿಗಳಿಗೆ ಚಿಕಿತ್ಸೆ ನೀಡಿವೆ ಮತ್ತು 1,00,000 ಕ್ಕೂ ಹೆಚ್ಚು ಹೆರಿಗೆಗಳನ್ನು ನಡೆಸಿವೆ ಎಂದು ಡಾ.ಮೊಯ್ದಿನ್ ಹೇಳಿದರು.
ತುಂಬೆ ಗ್ರೂಪ್ ಕೇಂದ್ರಬಿಂದು ಅಜ್ಞಾನ್‌ನ ಅಲ್ ಜುರ್ಘನಲ್ಲಿರುವ 25 ಎಕರೆ ಸಂಯೋಜಿತ ಆರೋಗ್ಯ ರಕ್ಷಣೆ ಮತ್ತು ಶಿಕ್ಷಣ ತಾಣವಾದ ‘ತುಂಬೆ ಮೆಡಿಸಿಟಿ’ ಇದೆ. ಇದು ಇಡೀ ಗಲ್ಸ್ ಪ್ರದೇಶದ ಅತಿದೊಡ್ಡ ಖಾಸಗಿ ಶೈಕ್ಷಣಿಕ ಆಸ್ಪತ್ರೆಯಾದ 350 ಹಾಸಿಗೆಗಳ ‘ತುಂಬೆ ಯೂನಿವರ್ಸಿಟಿ ಹಾಸ್ಪಿಟಲ್’ ಮತ್ತು ಇದರೊಂದಿಗೆ ‘ತುಂಬೆ ಡೆಂಟಲ್ ಹಾಸ್ಪಿಟಲ್’ ಹಾಗೂ ‘ತುಂಬೆ ಫಿಸಿಕಲ್ ಥೆರಪಿ ಆಂಡ್ ರಿಹ್ಯಾಬಿಲಿಟೇಶನ್ ಹಾಸ್ಪಿಟಲ್’ಗಳನ್ನು ಒಳಗೊಂಡಿದೆ. ಈ ಸಂಯೋಜಿತ ಸೌಲಭ್ಯಕ್ಕೆ ಪ್ರತಿದಿನ ಸುಮಾರು 15,000 ಜನರು ಭೇಟಿ ನೀಡುತ್ತಾರೆ ಎಂದು ಡಾ.ಮೊಯ್ದಿನ್ ಹೇಳಿದ್ದಾರೆ.
ತುಂಬೆ ಸಮೂಹವು ತನ್ನ ಶೈಕ್ಷಣಿಕ ಆರೋಗ್ಯ ರಕ್ಷಣಾ ಹೆಜ್ಜೆಗುರುತನ್ನು ವಿಸ್ತರಿಸುತ್ತಿದೆ. ಕಳೆದ ವರ್ಷದಲ್ಲಿ ಶಾರ್ಜಾ ಹೆಲ್ತ್ಕೇರ್ ಸಿಟಿಯಲ್ಲಿ 120 ಹಾಸಿಗೆಗಳ ಮನೋರೋಗ ಮತ್ತು ಪುನರ್ವಸತಿ ಆಸ್ಪತ್ರೆ, ತುಂಬೆ ಮೆಡಿಸಿಟಿಯಲ್ಲಿ ‘ತುಂಬೆ ವೆಟರಿನರಿ ಟೀಚಿಂಗ್ ಹಾಸ್ಪಿಟಲ್’ ಮತ್ತು ‘ತುಂಬೆ ಕಾಲೇಜ್ ಆಫ್ ವೆಟರಿನರಿ ಮೆಡಿಸಿನ್, ಹಾಗೂ ವಿಶ್ವವಿದ್ಯಾಲಯದ ಸಂಶೋಧನಾ ಕೋರ್ಸ್ ಗಳು ಮತ್ತು ‘ತುಂಬೆ ರಿಸರ್ಚ್ ಇನ್‌ಸ್ಟಿಟ್ಯೂಟ್ ಫಾರ್ ಪ್ರಿಸಿಶನ್ ಮೆಡಿಸಿನ್’ ಅನ್ನು ಒಳಗೊಳ್ಳಲಿರುವ ‘ತುಂಬೆ ಇಂಟರ್ನ್ಯಾಷನಲ್ ರಿಸರ್ಚ್ ಸೆಂಟರ್‌ಗೆ ಶಂಕುಸ್ಥಾಪನೆ ನೆರವೇರಿಸಲಾಗಿದೆ.
‘ತುಂಬೆ ಮೆಡಿಸಿಟಿ ದುಬೈ’ ಮುಂದಿನ ಪ್ರಮುಖ ಯೋಜನೆಯಾಗಿದ್ದು, ಇದು ಸುಮಾರು 1,000 ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ. ಸ್ವಿಝರ್‌ಲ್ಯಾಂಡ್‌ನ ಜೆನೆವಾ ಕಾಲೇಜ್ ಆಫ್ ಲಾಂಗಿವಿಟಿ ಸೈನ್ಸ್ ಸಹಯೋಗದೊಂದಿಗೆ ಲಾಂಗಿವಿಟಿ ಮೆಡಿಸಿನ್‌ನಲ್ಲಿ ಯುಎಇ-ಮೊದಲ ಶೈಕ್ಷಣಿಕ ಕೋರ್ಸ್ ಗಳನ್ನು ಸಹ ತುಂಬೆ ಗ್ರೂಪ್ ಘೋಷಿಸಿದೆ.
‘ತುಂಬೆ ಇಂಟರ್ನ್ಯಾಷನಲ್ ಪಾಡ್‌ವೇ ಪ್ರೋಗ್ರಾಮ್’ ಮೂಲಕ, ವಿದ್ಯಾರ್ಥಿಗಳು ತಮ್ಮ ಮೂಲಭೂತ ಅಧ್ಯಯನಗಳನ್ನು ಯುಎಇ ಯಲ್ಲಿ ಮತ್ತು ಕ್ಲಿನಿಕಲ್ ತರಬೇತಿಯನ್ನು ಯುರೋಪ್‌ನ ಪಾಲುದಾರ ವಿಶ್ವವಿದ್ಯಾಲಯಗಳಲ್ಲಿ ಪೂರ್ಣಗೊಳಿಸಿ, ಜಾಗತಿಕವಾಗಿ ಮಾನ್ಯತೆ ಪಡೆದ ಪದವಿಗಳನ್ನು ಪಡೆಯಬಹುದು ಎಂದು ಡಾ.ತುಂಬೆ ಮೊಯ್ದಿನ್ ಹೇಳಿದ್ದಾರೆ.