ಕಾರವಾರ: ಹಿಮಾಲಯದ ಪಾರ್ವತಿ ಕಣಿವೆ ಏರಿ ದಾಖಲೆ ಬರೆದ ಜಿಲ್ಲೆಯ ಯುವಕರ ತಂಡ

ಕಾರವಾರ: ಗೋಕರ್ಣದ ನಾಲ್ವರು ಹಾಗೂ ಜೋಯಿಡಾದ ಓರ್ವ ಸೇರಿ ಐವರು ಯುವಕರ ತಂಡ ಹಿಮಾಚಲ ಪ್ರದೇಶದ ಅತ್ಯಂತ ಎತ್ತರದ (17,450 ಅಡಿ) ಪಾರ್ವತಿ ಮತ್ತು ಪಿನ್ ಕಣಿವೆ ಸಂಧಿ ಸ್ಥಳವನ್ನು ಏರಿ ಭಾರತದ ಬಾವುಟ ಹಾರಿಸುವ ಮೂಲಕ ಈ ಸ್ಥಳವನ್ನು ಮುಟ್ಟಿದ ವರ್ಷದ ಮೊದಲ ಪರ್ವತಾರೋಹಿ ತಂಡ ಎಂಬ ಗೌರವಕ್ಕೆ ಪಾತ್ರರಾಗಿದ್ದಾರೆ.

ಗೋಕರ್ಣದ ಗಣೇಶ ದಾಮೋದರ ಅಡಿ, ಮಹೇಶ ಗಣೇಶ ಹಿರೇಗಂಗೆ, ನಾಗಕುಮಾರ ಗಣಪತಿ ಗೋಪಿ, ಶ್ರೀನಿಧಿ ಚಂದ್ರಶೇಖರ ಅಡಿ ಹಾಗೂ ಜೋಯಿಡಾದ ಧ್ರುವ ಎನ್. ಚಾಪಖಂಡ ಪರ್ವತಾರೋಹಿ ಯುವಕರಾಗಿದ್ದಾರೆ. ಇವರ ಜತೆ ಹಿಮಾಚಲದ ಒಬ್ಬ ಗೈಡ್ ಮತ್ತು 6 ಸಹಾಯಕರು ಚಾರಣದಲ್ಲಿ ಭಾಗಿಯಾಗಿದ್ದರು. ಈ ಹಿಂದೆ ಲಡಾಕ್, ಮಾನಸ ಸರೋವರ, ಹಿಮಾಲಯದ ವಿವಿಧ ಪ್ರದೇಶಗಳಿಗೆ ಚಾರಣ ಮಾಡಿದ್ದರು.

ಈ ಸ್ಥಳದಲ್ಲಿ -10 ಡಿಗ್ರಿ ತಾಪಮಾನವಿದ್ದು, ಈ ದುರ್ಘಮ ಪರ್ವತವನ್ನು ಏರಿ ಸಾಹಸ ಮೆರೆದಿದ್ದಾರೆ. ಅಲ್ಲಿನ ರಾಜ್ಯ ಸರಕಾರ ಈ ವರ್ಷದ ದಾಖಲೆಯಲ್ಲಿ ಗೋಕರ್ಣದ ಐವರ ಪಾರ್ವತಾರೋಹಿಗಳ ಹೆಸರು ನೋಂದಾಯಿಸಿಲ್ಪಟ್ಟಿರುವುದು ವಿಶೇಷ. ಹಿಮಾಲಯದ ಖಾಜಾ ವಲಯದ ಮುದ್ ಎಂಬ ಹಳ್ಳಿಯಿಂದ ಆರಂಭವಾಗುವ 120 ಕಿ.ಮೀ. ಕಾಲ್ನಡಿಗೆ ಚಾರಣವಾಗಿದೆ.