ಉಡುಪಿ: ಸಮಗ್ರ ಗೀತಾ ಪಾರಾಯಣ, ಗೀತಾ ಸಮೀಕ್ಷಾ ಪುಸ್ತಕ ಲೋಕಾರ್ಪಣೆ

ಉಡುಪಿ: ಶ್ರೀಕೃಷ್ಣಮಠದ ಪರಿಸರದಲ್ಲಿ ಸುಮಾರು 30 ವರ್ಷಗಳ ಹಿಂದೆ ಪುತ್ತಿಗೆ ಮಠಾಧೀಶರಾದ ಶ್ರೀ ಸುಗುಣೇಂದ್ರತೀರ್ಥ ಸ್ವಾಮೀಜಿ ಭವ್ಯವಾಗಿ ನಿರ್ಮಿಸಿರುವ ಗೀತಾಮಂದಿರದಲ್ಲಿ ಗೀತಾ ಜಯಂತಿಯ ಅಂಗವಾಗಿ ಸಮಗ್ರ ಗೀತಾ ಪಾರಾಯಣ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.

ಪಾರಾಯಣದ ನಂತರ ಶ್ರೀಪಾದರು, ಗೀತಾ ಸಂದೇಶವನ್ನು ನೀಡಿದರು. ಶತಾವಧಾನಿಗಳಾದ ಉಡುಪಿ ರಾಮನಾಥ ಆಚಾರ್ಯ ಅವರು ಸಂಪಾದಿಸಿರುವ ಗೀತಾ ಸಮೀಕ್ಷಾ ಪುಸ್ತಕವನ್ನು ಲೋಕಾರ್ಪಣೆ ಮಾಡಿದರು.

ಗೀತಾ ಜಯಂತಿಯ ಪ್ರಯುಕ್ತ 20ಕ್ಕೂ ಹೆಚ್ಚಿನ ಶಾಲೆಗಳಲ್ಲಿ ನಡೆದ ಕಂಠಪಾಠ ಸ್ಪರ್ಧೆಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳಿಗೆ ಬಹುಮಾನವನ್ನು ನೀಡಲಾಯಿತು. ಡಾ. ಬಿ. ಗೋಪಾಲಾಚಾರ್ಯ ಹಾಗೂ ಮಹಿತೋಷ ಆಚಾರ್ಯ ಕಾರ್ಯಕ್ರಮ ನಿರೂಪಿಸಿದರು.