ಉಡುಪಿ: ನಬಾರ್ಡ್ ವತಿಯಿಂದ 2023-24ನೇ ಸಾಲಿನಲ್ಲಿ ಜಿಲ್ಲೆಗೆ 10,689.27 ಕೋಟಿ ರೂ. ಸಾಲವನ್ನು ವಿವಿಧ ಕ್ಷೇತ್ರಗಳಿಗೆ ಮೀಸಲಿಡಲಾಗಿದೆ. 2022 – 23 ರ ಅವಧಿಯಲ್ಲಿ ರೂ. 12,659.26 ಕೋಟಿ ಮೀಸಲಿಡಲಾಗಿದೆ.
ಡಿ.27ರ ಮಂಗಳವಾರ ಜಿ.ಪಂ.ಸಭಾಂಗಣದಲ್ಲಿ ನಡೆದ ಜಿಲ್ಲಾ ಬ್ಯಾಂಕ್ ಗಳ ತ್ರೈಮಾಸಿಕ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಸಿಇಒ ಪ್ರಸನ್ನ ಎಚ್ ಅವರು 2023-24ನೇ ಸಾಲಿನ ಸಾಲ ಯೋಜನೆಯನ್ನು ಅನಾವರಣಗೊಳಿಸಿದರು.
ನಬಾರ್ಡ್ ಡಿಡಿಎಂ ಸಂಗೀತಾ ಕರ್ತಾ ಮಾತನಾಡಿ, ಬೆಳೆ ಉತ್ಪಾದನೆ, ನಿರ್ವಹಣೆ ಮತ್ತು ಮಾರುಕಟ್ಟೆ, ಕೃಷಿ ಸಾಲ ಮತ್ತು ಸಂಬಂಧಿತ ಚಟುವಟಿಕೆಗಳು, ಕೃಷಿ ಮೂಲಸೌಕರ್ಯ ಮತ್ತು ಪೂರಕ ಚಟುವಟಿಕೆಗಳಿಗೆ ಸಂಬಂಧಿಸಿದ ಸಾಲಗಳಿಗೆ 5,759 ಕೋಟಿ ರೂ. ಮೀಸಲಿಡಲಾಗಿದೆ ಇದರಲ್ಲಿ 1,355 ಕೋಟಿ ರೂ.ಗಳನ್ನು ಬೆಳೆ ಉತ್ಪಾದನೆ, ನಿರ್ವಹಣೆ ಮತ್ತು ಮಾರುಕಟ್ಟೆಗಾಗಿ, 1,635 ಕೋಟಿ ರೂ.ಗಳನ್ನು ಕೃಷಿ ಸಾಲ ಮತ್ತು ಇತರ ಚಟುವಟಿಕೆಗಳಿಗಾಗಿ, 465 ಕೋಟಿ ರೂ.ಗಳನ್ನು ಕೃಷಿ ಮೂಲಸೌಕರ್ಯಕ್ಕೆ ಮತ್ತು 2,302 ಕೋಟಿ ರೂ.ಗಳನ್ನು ಸಂಬಂಧಿತ ಚಟುವಟಿಕೆಗಳನ್ನು ಉತ್ತೇಜಿಸಲು ಮೀಸಲಿಡಲಾಗಿದೆ.
ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ 3,559 ಕೋಟಿ ರೂ., ರಫ್ತು ವಲಯಕ್ಕೆ ಸಂಬಂಧಿಸಿದ ಕೈಗಾರಿಕೆ, ಸ್ಥಾವರ ಇತ್ಯಾದಿಗಳಿಗೆ ನಿರ್ಮಾಣ ಸೌಲಭ್ಯಕ್ಕಾಗಿ 304 ಕೋಟಿ ರೂ., ಶಿಕ್ಷಣ ಸಾಲಕ್ಕೆ 126 ಕೋಟಿ ರೂ., ವಸತಿ ನಿರ್ಮಾಣ ಸಾಲಕ್ಕೆ 832 ಕೋಟಿ ರೂ., ನವೀಕರಿಸಬಹುದಾದ ಇಂಧನಕ್ಕೆ (ಸೌರ ಸ್ಥಾವರ ಇತ್ಯಾದಿ) ಸಂಬಂಧಿಸಿದ ಸಾಲಕ್ಕೆ 39 ಕೋಟಿ ರೂ., ಸಾಮಾಜಿಕ ಮೂಲಸೌಕರ್ಯಕ್ಕೆ 68 ಕೋಟಿ ರೂ. ಮೀಸಲಿಡಲಾಗಿದೆ ಎಂದರು.
