ಕಲಬುರಗಿ: ಜುಲೈನಲ್ಲಿ ಕೆ.ಜಿಗೆ ₹200 ತಲುಪಿ ಗ್ರಾಹಕರ ನಿದ್ದೆಗೆಡಿಸಿದ್ದ ಟೊಮೆಟೊ ದರ ಇದೀಗ ತೀವ್ರವಾಗಿ ಕುಸಿದಿದ್ದು, ಸದ್ಯ ಪ್ರತಿ ಕೆ.ಜಿಗೆ ₹10ರಂತೆ ಮಾರಾಟವಾಗುತ್ತಿದೆ.ಬೆಲೆ ಏರುಗತಿಯಲ್ಲಿದ್ದಾಗ ₹2000, ₹2,500ಕ್ಕೂ ಹೆಚ್ಚು ಮಾರಾಟವಾಗಿದ್ದ 18-20 ಕೆ.ಜಿಯ ಒಂದು ಟ್ರೇ ಟೊಮೆಟೊ ಈಗ ಅತಿ ಕನಿಷ್ಠ ₹180-₹200ಗೂ ಕಡಿಮೆ ದರಕ್ಕೆ ಬಿಕರಿಯಾಗುತ್ತಿದೆ.
ಮೊದಲಿಗಿಂತ ಈಗ ಟೊಮೆಟೊ ಗುಣಮಟ್ಟದಲ್ಲೂ ಸುಧಾರಣೆ ಕಂಡುಬಂದಿದ್ದು ಬಹುತೇಕ ಮಹಾರಾಷ್ಟ್ರದಿಂದ ಪೂರೈಕೆಯಾಗುತ್ತಿದೆ.
‘ಮಾರುಕಟ್ಟೆಯಲ್ಲಿ ಕೆ.ಜಿ ಟೊಮೆಟೊಗೆ ₹10 ಇದೆ. 3 ಕೆ.ಜಿ ಖರೀದಿಸಿದರೆ ₹20 ಎನ್ನುತ್ತಾರೆ. ಮನೆ ಹತ್ತಿರ ಬರುವ ವ್ಯಾಪಾರಿಗಳಲ್ಲಿ ಕೊಂಡರೆ ಈ ದರವಿಲ್ಲ’ ಎಂದು ಗ್ರಾಹಕ ಸೂಗೂರಪ್ಪ ಹೇಳಿದರೆ, ‘ಬೆಲೆ ಹೆಚ್ಚಾಗಿದೆ ಎಂದು ತಿಂಗಳಿಗೂ ಮುಂಚೆ ಬಹುತೇಕರು ಟೊಮೆಟೊ ಹಾಕಿದ್ದರು. ಸದ್ಯ ಆ ಬೆಳೆ ಬಂದಿದ್ದು ಬೇಡಿಕೆಗಿಂತ ಪೂರೈಕೆ ಹೆಚ್ಚಾಗಿದೆ. ಹೀಗಾಗಿ ಸಹಜವಾಗಿಯೇ ಬೆಲೆ ಇಳಿದಿದೆ’ ಎನ್ನುತ್ತಾರೆ ವ್ಯಾಪಾರಿಯೊಬ್ಬರು.
ಇನ್ನು, ಈರುಳ್ಳಿ ದರ ಕಳೆದ ವಾರದಂತೆ ಪ್ರತಿ ಕೆ.ಜಿಗೆ ₹30 ಇದೆ. ಹಸಿ ಮೆಣಸಿನಕಾಯಿ ಪ್ರತಿ ಕೆ.ಜಿಗೆ ₹120ರಂತೆ ಮಾರಾಟವಾಗುತ್ತಿದೆ. ಕೆಲವು ತಳಿಗಳ ಆಧಾರದಲ್ಲಿ ದರದಲ್ಲೂ ವ್ಯತ್ಯಾಸವಿದೆ. ಉಳಿದಂತೆ ಆಲೂಗಡ್ಡೆ, ಬದನೆಕಾಯಿ, ಗಜ್ಜರಿ, ಸೌತೆಕಾಯಿಗಳ ದರ ಪ್ರತಿ ಕೆ.ಜಿಗೆ ₹60 ಇದೆ. ದೊಣ್ಣೆಮೆಣಸಿನಕಾಯಿ ಪ್ರತಿ ಕೆ.ಜಿಗೆ ₹70, ಹೀರೆಕಾಯಿ ₹50ರಂತೆ ಮಾರಾಟವಾಗುತ್ತಿವೆ.
