ಚನ್ನರಾಯಪಟ್ಟಣ: ಸರ್ಕಾರಿ ಆಸ್ತಿ ನಮ್ಮೆಲ್ಲರ ಆಸ್ತಿ ಎಂಬ ಸದಾಶಯದೊಂದಿಗೆ, ಇಲ್ಲಿನ ಸಾರಿಗೆ ಸಂಸ್ಥೆಯ ಬಸ್ಗಳಿಗೆ ಅಂಟಿಸಲಾಗಿದ್ದ ಅನಗತ್ಯ ಪೋಸ್ಟರ್ ಹಾಗೂ ಜಾಹೀರಾತು ಸ್ಟಿಕ್ಕರ್ಗಳನ್ನು ಸ್ಥಳೀಯ ಯುವಕರ ತಂಡವೊಂದು ತೆರವುಗೊಳಿಸುವ ಮೂಲಕ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ.
ತಾಲ್ಲೂಕಿನ ಸಾರಿಗೆ ಬಸ್ಗಳ ಮೇಲೆ ವಿವಿಧ ಖಾಸಗಿ ಸಂಸ್ಥೆಗಳ ಮತ್ತು ವ್ಯಕ್ತಿಗಳ ಜಾಹೀರಾತು ಹಾಗೂ ಗುಳಿಗೆಗಳ (ಮೆಡಿಕಲ್) ಸ್ಟಿಕ್ಕರ್ಗಳನ್ನು ಅಂಟಿಸಿ ಬಸ್ನ ಅಂದವನ್ನು ಕೆಡಿಸಲಾಗಿತ್ತು. ಇದನ್ನು ಗಮನಿಸಿದ ವರುಣ್ ಚಕ್ರವರ್ತಿ, ಮನೋಜ್, ಸುಫಿನ್ ಬ್ಲಾಗರ್ ಮತ್ತು ಮುಜಾಯಿದ್ ನೇತೃತ್ವದ ಯುವಕರ ತಂಡ ಹಾಗೂ ವಿದ್ಯಾರ್ಥಿಗಳು ಸ್ವಯಂಪ್ರೇರಿತರಾಗಿ ಈ ಕಾರ್ಯಕ್ಕೆ ಮುಂದಾಗಿದ್ದಾರೆ.
ಎಚ್ಚರಿಕೆ ಸಂದೇಶ:
ಬಸ್ಗಳ ಮೇಲೆ ಅಂಟಿಸಲಾಗಿದ್ದ ಅಸಂಖ್ಯಾತ ಸ್ಟಿಕ್ಕರ್ಗಳನ್ನು ಕಿತ್ತೆಸೆದ ಯುವಕರು, “ಸರ್ಕಾರದ ಹಣ ಈಗಾಗಲೇ ಪೋಲಾಗಿದೆ. ಇನ್ನು ಮುಂದಾದರೂ ಸಾರ್ವಜನಿಕ ಆಸ್ತಿಗೆ ಹಾನಿ ಮಾಡುವುದನ್ನು ನಿಲ್ಲಿಸಬೇಕು. ಒಂದು ವೇಳೆ ಮತ್ತೆ ಸ್ಟಿಕ್ಕರ್ಗಳನ್ನು ಅಂಟಿಸಿದರೆ ಕಠಿಣ ಕ್ರಮ ಎದುರಿಸಬೇಕಾಗುತ್ತದೆ” ಎಂದು ಎಚ್ಚರಿಕೆ ನೀಡಿದ್ದಾರೆ.
ನಾಡು-ದೇಶದ ರಕ್ಷಣೆಯ ಆಶಯ:
ಈ ಕುರಿತು ಮಾತನಾಡಿದ ತಂಡದ ಸದಸ್ಯರು, “ನಮ್ಮ ನಾಡು ಮತ್ತು ದೇಶದ ಉಳಿವಿಗಾಗಿ ಇಂತಹ ಸಣ್ಣ ಪ್ರಯತ್ನಗಳು ಅಗತ್ಯ. ಸರ್ಕಾರಿ ಬಸ್ಗಳಿಗೆ ಸ್ಟಿಕ್ಕರ್ ಅಂಟಿಸುವುದರಿಂದ ಯಾರಿಗೂ ಲಾಭವಿಲ್ಲ, ಬದಲಾಗಿ ಸಾರ್ವಜನಿಕ ಆಸ್ತಿಗೆ ನಷ್ಟವಾಗುತ್ತಿದೆ. ಯುವಕರು ಇಂತಹ ಕೆಲಸಗಳಿಗೆ ಮುಂದಾದಾಗ ಮಾತ್ರ ವ್ಯವಸ್ಥೆಯಲ್ಲಿ ಬದಲಾವಣೆ ತರಲು ಸಾಧ್ಯ,” ಎಂದು ಅಭಿಪ್ರಾಯಪಟ್ಟರು.
ಈ ಅಭಿಯಾನದಲ್ಲಿ ಮುಜಾಯಿದ್ ಸೇರಿದಂತೆ ಹತ್ತಾರು ವಿದ್ಯಾರ್ಥಿಗಳು ಸಕ್ರಿಯವಾಗಿ ಭಾಗವಹಿಸಿ, ಸಾರಿಗೆ ಸಂಸ್ಥೆಯ ಅಧಿಕಾರಿಗಳ ಗಮನ ಸೆಳೆದಿದ್ದಾರೆ.