ರಾಮನಗರದಲ್ಲಿ ಯುಗಾದಿಗೆ ಸಕಲ ಸಿದ್ಧತೆ

ರಾಮನಗರ: ಶ್ರೀ ಶುಭಕೃತು ಸಂವತ್ಸರ ಆರಂಭ, ಅಸಂಖ್ಯಾತ ಹಿಂದೂಗಳ ಹೊಸ ವರ್ಷಾಚರಣೆ, ಚೈತ್ರ ಮಾಸದ ಮೊದಲನೇ ದಿನದ ಯುಗಾದಿ ಹಬ್ಬದಾಚರಣೆಗೆ ಜಿಲ್ಲೆಯ ಜನತೆ ಸಕಲ ಸಿದ್ಧತೆ ನಡೆಸಿದ್ದು ಎಲ್ಲೆಡೆ ಬೇವು, ಬೆಲ್ಲ ಸೇರಿದಂತೆ ವಸ್ತುಗಳ ಖರೀದಿ ಭರಾಟೆ ಜೋರಾಗಿತ್ತು.

ಅಗತ್ಯ ವಸ್ತುಗಳ ಬೆಲೆ ಏರಿಕೆ ನಡುವೆಯೂ ಖರೀದಿಯಲ್ಲಿ ತೊಡಗಿರುವುದು ಕಂಡು ಬಂದಿತು. ಈ ಬಾರಿಯ ಯುಗಾದಿ ಹಬ್ಬದಲ್ಲಿ ಬೆಲೆ ಏರಿಕೆಯ ಬಿಸಿ ಜನರಲ್ಲಿ ಹಬ್ಬದ ಹುಮ್ಮಸ್ಸನ್ನೆ ಕಸಿದುಕೊಂಡಿದೆ.

ಕೆ.ಜಿ.ಬೆಲ್ಲದ ಬೆಲೆ 50 ರಿಂದ 60 ರೂಗಳಿಗೆ ಏರಿಕೆಯಾಗಿದೆ. ಹೂವು ಮತ್ತು ಹಣ್ಣಿನ ಬೆಲೆ ಗಗನಕ್ಕೇರಿದೆ.  ಹಬ್ಬದ ಪದಾರ್ಥಗಳು ಅಂಗಡಿಯಲ್ಲಿ ಮಾತ್ರವಲ್ಲದೇ ರಸ್ತೆಯ ಇಕ್ಕೆಲಗಳನ್ನು ಆಕ್ರಮಿಸಿಕೊಂಡಿದ್ದವು. ಕೆಲವು ಅಗತ್ಯ ವಸ್ತುಗಳ ಬೆಲೆ ತುಟ್ಟಿಯಾಗಿದ್ದರೂ ಸಹ  ಸಾಂಪ್ರದಾಯಕವಾಗಿ ಆಚರಿಸಲೇಬೇಕಾದ ಅನಿರ್ವಾತೆಯಿಂದ ಜನತೆ ಖರೀದಿಯಲ್ಲಿ ತೊಡಗಿದ್ದರು.

ರಾಮನಗರದಲ್ಲಿ ಮಂಡಿಪೇಟೆ, ಮುಖ್ಯರಸ್ತೆ, ಹಳೇಬಸ್ ನಿಲ್ದಾಣದ ಆಸುಪಾಸು ಹಾಗೂ ಮಾಗಡಿ ರಸ್ತೆಗಳಲ್ಲಿ ಗ್ರಾಹಕರು ಯಗಾದಿ ಹಬ್ಬಕ್ಕಾಗಿ ಬೆಲ್ಲ,  ಕಡಲೇಕಾಯಿ ಬೀಜ, ಕಡ್ಲೆಬೇಳೆ, ಮೈದಾಹಿಟ್ಟು, ಅಡುಗೆ ಎಣ್ಣೆಯನ್ನು ಖರೀದಿಸುತ್ತಿದ್ದುದು ಕಂಡುಬಂತು.

ಕೋವಿಡ್ ಕಾರ್ಮೋಡ ಸರಿದಿರುವ ಹಿನ್ನಲೆಯಲ್ಲಿ ಜಿಲ್ಲೆಯಲ್ಲಿ ಯುಗಾದಿ ಹಬ್ಬದ ಸಡಗರ ಹೆಚ್ಚಾಗಿದೆ. ಅಗತ್ಯ ವಸ್ತುಗಳ ಬೆಲೆ ಏರಿಕೆ ನಡುವೆಯೂ ಯುಗಾದಿ ಮುನ್ನಾ ದಿನವಾದ ಶುಕ್ರವಾರ ಖರೀದಿ ಭರಾಟೆ ಜೋರಾಗಿತ್ತು. ಕಳೆದೆರಡು ವರ್ಷ ಕೊರೋನಾ ಸಾಂಕ್ರಾಮಿಕ ರೋಗವು ಹಬ್ಬದಾಚರಣೆಗೆ ತೊಡಕಾಗಿತ್ತು. ವ್ಯಾಪಾರ ನಷ್ಟ, ಉದ್ಯೋಗ ಕಡಿತದಿಂದ ಆದಾಯಕ್ಕೆ ಕತ್ತರಿ ಬಿದ್ದ ಹಿನ್ನಲೆಯಲ್ಲಿ ಜನತೆ ಹಬ್ಬಕ್ಕೆ ಹೆಚ್ಚಿನ ಆದ್ಯತೆ ನೀಡಿರಲಿಲ್ಲ. ಆದರೆ, ಪರಿಸ್ಥಿತಿ ಈಗ ಬದಲಾಗಿದ್ದು, ಎಲ್ಲಾ ವಲಯವೂ ಬಹುಕೇತ ಚೇತರಿಕೆಯ ಹಾದಿ ಹಿಡಿದಿದೆ. ಹೀಗಾಗಿ ಜಿಲ್ಲೆಯಲ್ಲಿ ಯುಗಾದಿ ಹಬ್ಬದ ಸಂಭ್ರಮ ಮನೆ ಮಾಡಿದೆ