ರಾಜಧಾನಿ ಬೆಂಗಳೂರಿನಲ್ಲಿ ಆಟೋ ದರ ಹೆಚ್ಚಳವಾಗಿದೆ. ಕೊರೋನಾದಿಂದ ಜನ ಚೇತರಿಸಿಕೊಳ್ಳುವ ಮುನ್ನವೇ ಬೆಂಗಳೂರು ದುಬಾರಿ ಆಗುತ್ತಿದೆ.
ಪೆಟ್ರೋಲ್, ಡಿಸೇಲ್ ಹಾಗೂ ತರಕಾರಿ ನಂತರ ಇದೀಗ ಆಟೋ ದರ ಕೂಡ ಏರಿಕೆಯಾಗಿದ್ದು, ಜನ ತಲೆ ಮೇಲೆ ಕೈ ಹೊತ್ತು ಕೂರುವಂತಾಗಿದೆ. 2013ರ ನಂತರ ಇದೇ ಮೊದಲ ಬಾರಿ ಆಟೋ ದರ ಹೆಚ್ಚಳವಾಗಿದೆ.
ಎಂಟು ವರ್ಷಗಳ ನಂತರ ಆಟೋ ಚಾಲಕರು ಮತ್ತು ಮಾಲೀಕರ ಮನವಿಗೆ ಜಿಲ್ಲಾಡಳಿತ ಸ್ಪಂದಿಸಿದ್ದು, ಬೆಲೆ ಏರಿಕೆಗೆ ಅಸ್ತು ಎಂದಿದೆ. ಇದರಿಂದ ಚಾಲಕರು ಖುಷಿಯಾಗಿದ್ದಾರೆ. ಆದರೆ ಪ್ರಯಾಣಿಕರು ಹೈರಾಣಾಗಿದ್ದಾರೆ.
ಈ ಹಿಂದೆ ಆಟೋ ಮಿನಿಮಮ್ ದರ ರೂ.25 ಇತ್ತು. ಆದರೆ ಇಂದಿನಿಂದ ಮಿನಿಮಮ್ ದರ ರೂ.30ಕ್ಕೆ ಏರಿಕೆಯಾಗಿದೆ. ಪ್ರತೀ ಕಿ.ಮೀಗೆ ಈ ಹಿಂದೆ 13 ರೂಪಾಯಿ ದರ ಇತ್ತು. ಇದೀಗ ಈ ದರ 15 ರೂಪಾಯಿಗೆ ಏರಿಕೆಯಾಗಿದೆ. ಈ ಹಿಂದೆ ಐದು ನಿಮಿಷ ಕಾಯುವಿಕೆ ಫ್ರೀ ಇತ್ತು. ಇದೀಗ ಐದು ನಿಮಿಷದ ನಂತರ 5 ರೂ. ಹಣ ನೀಡಬೇಕಾಗಿದೆ. ಮೊದಲು ಉಚಿತವಾಗಿ 20ಕೆ.ಜಿವರೆಗೂ ಲಗೇಜ್ ಸಾಗಣೆ ಮಾಡಬಹುದಾಗಿತ್ತು. ಈಗ 20 ಕೆ.ಜಿ ದಾಟಿದರೆ 5 ರೂ. ಹಣ ನೀಡಬೇಕಾಗಿದೆ. ರಾತ್ರಿ ಹಿಂದಿನಂತೆ ಮೀಟರ್ ಮೇಲೆ ಅರ್ಧದಷ್ಟು ಹಣ ಹೆಚ್ಚು ನೀಡಬೇಕಿದೆ.