ತಿರುವಂತಪುರಂ- ಕೊರೊನಾ ವೈರಸ್ ನಿಂದ ಪಾರಾಗಲು ಎರಡು ಡೋಸ್ ವ್ಯಾಕ್ಸಿನ್ ಪಡೆದಿದ್ದೇನೆ. ಎಲ್ಲೆಂದರೆ ಅಲ್ಲಿ ನಿರ್ಭೀತಿಯಿಂದ ಓಡಾಡುತ್ತೇನೆ. ಲಸಿಕೆ ಪಡೆದ ಕಾರಣ ನನಗೆ ಕೊರೊನಾ ಬರಲ್ಲ ಎಂಬ ಹುಂಬತನ ಬೇಡ. ಏಕೆಂದರೆ ಎರಡು ಬಾರಿ ಲಸಿಕೆ ಪಡೆದ ಸುಮಾರು 40 ಸಾವಿರ ಜನರಿಗೆ ಕೊರೊನಾ ಮತ್ತೆ ಅಟ್ಯಾಕ್ ಮಾಡಿದೆ.
ಕೇರಳ ರಾಜ್ಯ ಒಂದರಲ್ಲೆ ಲಸಿಕೆ ಪಡೆದ 40 ಸಾವಿರಕ್ಕೂ ಹೆಚ್ಚು ಮಂದಿಗೆ ಕೊರೊನಾ ವಕ್ಕರಿಸಿದೆ. ಲಸಿಕೆ ಪಡೆದರೂ ಮತ್ತೆ ಕೊರೊನಾ ಸೋಂಕು ತಗುಲಿರುವುದು ಆತಂಕಕಾರಿಯಾಗಿದೆ. ಇಂತಹ ವ್ಯಕ್ತಿಗಳ ಮಾದರಿಯನ್ನು ಕಳುಹಿಸಿಕೊಡುವಂತೆ ಕೇಂದ್ರ ಸರ್ಕಾರ ಕೇರಳಕ್ಕೆ ಸೂಚನೆ ನೀಡಿದೆ. ಪರಾಮರ್ಷೆ ಮಾಡಿ ಇದಕ್ಕೆ ಕಾರಣವೇನೆಂದು ತಿಳಿಸುವುದಾಗಿ ಎಂದು ಕೇಂದ್ರ ಸರ್ಕಾರ ಕೇರಳಕ್ಕೆ ತಿಳಿಸಿದೆ.
ಕೇರಳದ ಪಟ್ಟಣಂತಿಟ್ಟ ಜಿಲ್ಲೆಯಲ್ಲೆ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗಿದೆ. ಒಟ್ಟು 14,974 ಸೋಂಕಿತರಲ್ಲಿ 5,042 ಜನರು ಎರಡು ಲಸಿಕೆ ಪಡೆದವರಾಗಿದ್ದಾರೆ.
ಎರಡು ಬಾರಿ ಲಸಿಕೆ ಪಡೆದಿದ್ದೇವೆ. ನಮಗೆ ಕೊರೊನಾ ಬರುವುದಿಲ್ಲ ಎಂಬ ಮೊಂಡುತನ ಪ್ರದರ್ಶಿಸಿ ಎಲ್ಲೆಂದರೆ ಅಲ್ಲಿ ಓಡಾಡಿದರೆ ತಕ್ಕ ಪ್ರಾಯಶ್ಚಿತ ಅನುಭವಿಸಬೇಕಾಗುತ್ತದೆ. ಲಸಿಕೆ ಹಾಕಿಸಿಕೊಂಡರೂ ಸಾಮಾಜಿಕ ಅಂತರ ಕಾಪಾಡಿಕೊಳ್ಳಬೇಕು, ಕಡ್ಡಾಯವಾಗಿ ಮಾಸ್ಕ್ ಧರಿಸಬೇಕು ಹಾಗೂ ಸ್ಯಾನಿಟೈಸರ್ ಬಳಕೆ ಮಾಡಬೇಕು.