ಕಾರವಾರ: ಸರ್ಕಾರ ಎಷ್ಟೇ ನಿಯಮಗಳನ್ನು ಹೇರಿದರೂ, ಕಾನೂನು ಉಲ್ಲಂಘನೆ ಮಾಡಿ ಗೋವಾದ ಯಾಂತ್ರಿಕೃತ ಬೋಟ್ ಉತ್ತರ ಕನ್ನಡ ಜಿಲ್ಲೆ ವ್ಯಾಪ್ತಿಯ ಸಮುದ್ರದಲ್ಲಿ ಮೀನುಗಾರಿಕೆ ಮಾಡುತ್ತಿವೆ. ಮಂಗಳವಾರ ಬೆಳಗಿನ ಜಾವ ಕೋಸ್ಟ್ ಗಾರ್ಡ್ ಗೋವಾದ 2 ಬೋಟುಗಳನ್ನು ವಶಪಡಿಸಿಕೊಂಡು ಕಾರವಾರದ ಬೈತಖೋಲ್ ಬಂದರಿಗೆ ತಂದಿದೆ.
ಮೀನುಗಾರಿಕೆ ಇಲಾಖೆ ಹಾಗೂ ಪೊಲೀಸರಿಗೆ ಅವೈಜ್ಞಾನಿಕ ಮೀನುಗಾರಿಕೆ ಮಾಡುತ್ತಿದ್ದ 2 ಬೋಟುಗಳನ್ನು ವಶಕ್ಕೆ ನೀಡಲಾಗಿದೆ. ಬೆಳಕು ಮೀನುಗಾರಿಕೆ ಮಾಡುವ ಸಾಮಗ್ರಿಗಳನ್ನು ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
ರಾಜ್ಯದಲ್ಲಿ ಲೈಟ್ ಫಿಶಿಂಗ್ ಸಂಪೂರ್ಣವಾಗಿ ನಿಷೇಧ ಮಾಡಲಾಗಿದೆ. ಕಳೆದ 3 ದಿನಗಳ ಹಿಂದೆ ಲಾಕ್ ಡೌನ್ ನಡುವೆ ಗೋವಾದ 2 ಬೋಟ್ ಗಳನ್ನು ಲೈಟ್ ಫಿಷಿಂಗ್ ಮಾಡುತ್ತಿರುವಾಗ ಭಾರತೀಯ ಕೋಸ್ಟ್ ಗಾರ್ಡ್ ನವರು ವಶಕ್ಕೆ ಪಡೆದು ಪೊಲೀಸರಿಗೆ ಒಪ್ಪಿಸಿದ್ದರು. ಅಲ್ಲದೆ ಬೋಟಿಯಲ್ಲಿದ್ದ ಒಟ್ಟು 28 ಜನ ವಿವಿಧ ರಾಜ್ಯದ ಕಾರ್ಮಿಕರನ್ನು ಕ್ವಾರಂಟೈನ್ ಒಳಪಡಿಸಲಾಗಿತ್ತು. ಅವೈಜ್ಞಾನಿಕವಾಗಿ ಸಮುದ್ರದಲ್ಲಿ ಬೆಳಕು ಮೀನುಗಾರಿಕೆ ಮಾಡುವುದರಿಂದ ಮತ್ಸ್ಯಕ್ಷಾಮ ಎದುರಾಗುವ ಭೀತಿ ಸ್ಥಳೀಯ ಮೀನುಗಾರರಲ್ಲಿ ಇದೆ.