ಕಾಸರಗೋಡು: ನಿಲುಗಡೆಗೊಳಿಸಿದ್ದ ಟ್ಯಾಂಕರ್ ನ ಹಿಂಭಾಗಕ್ಕೆ ಕಾರು ಡಿಕ್ಕಿ ಹೊಡೆದು ಬಂದ್ಯೋಡು ನಿವಾಸಿಯೋರ್ವರು ಮೃತಪಟ್ಟು, ಇನ್ನೋರ್ವ ಗಂಭೀರ ಗಾಯಗೊಂಡ ಘಟನೆ ಮಲಪ್ಪುರಂ ನ ಕೊಯಿಲಾಂಡಿ ಎಂಬಲ್ಲಿ ಇಂದು ಮುಂಜಾನೆ ನಡೆದಿದೆ.
ಮೃತಪಟ್ಟವರನ್ನು ಬಂದ್ಯೋಡಿನ ಫಾಸಿಲ್(26) ಎಂದು ಗುರುತಿಸಲಾಗಿದೆ. ಜೊತೆಗಿದ್ದ ಈತನ ಸ್ನೇಹಿತ ಉಳ್ಳಾಲದ ಝುಲ್ಫಾನ್ ಮಲಿಕ್ (29) ಗಾಯಗೊಂಡಿದ್ದು, ಕೋಜಿಕ್ಕೋಡ್ ನ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ದಾಖಲಿಸಲಾಗಿದೆ.
ನಿಲುಗಡೆಗೊಳಿಸಿದ್ದ ಟ್ಯಾಂಕರ್ ನ ಹಿಂಭಾಗಕ್ಕೆ ಡಿಕ್ಕಿ ಹೊಡೆದು ಈ ಅಪಘಾತ ನಡೆದಿದೆ. ಶನಿವಾರ ರಾತ್ರಿ ಕಾರು ಖರೀದಿಸಲು ಫಾಸಿಲ್ ಸೇರಿದಂತೆ ಒಂದು ಕಾರಿನಲ್ಲಿ ಐವರು ಕೊಯಿಲಾಂಡಿಗೆ ತೆರಳಿದ್ದರು. ಕಾರು ಖರೀದಿಸಿ ಮರಳುತ್ತಿದ್ದಾಗ ಮುಂಜಾನೆ 1.30ರ ಸುಮಾರಿಗೆ ಈ ಅಪಘಾತ ನಡೆದಿದೆ. ಫಾಸಿಲ್ ಮತ್ತು ಮಲಿಕ್ ಒಂದು ಕಾರಿನಲ್ಲಿ ಹಾಗೂ ಇನ್ನೊಂದು ಕಾರಿನಲ್ಲಿ ಇತರ ಮೂವರು ಸ್ನೇಹಿತರು ಊರಿಗೆ ಮರಳುತ್ತಿದ್ದರು. ಖರೀದಿಸಲಾಗಿದ್ದ ಕಾರನ್ನು ಫಾಸಿಲ್ ಚಲಾಯಿಸುತ್ತಿದ್ದರು. ಅಪಘಾತದ ಸುದ್ದಿ ತಿಳಿದು ಸಂಬಂಧಿಕರು ಕೊಯಿಲಾಂಡಿಗೆ ತೆರಳಿದ್ದಾರೆ.