‘ ಹಿರಣ್ಯ’ ಚಿತ್ರಕ್ಕೆ ಆಯ್ಕೆಯಾದ ಬಿಗ್ ಬಾಸ್ ಬೆಡಗಿ ದಿವ್ಯಾ ಸುರೇಶ್

ಬೆಂಗಳೂರು : ಟಿಕ್​ಟಾಕ್ ಮತ್ತು ಬಿಗ್ ಬಾಸ್ ಶೋ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಫೇಮಸ್ ಆಗಿ ನಂತರ ‘ ರೌಡಿ ಬೇಬಿ ‘ ಎಂಬ ಕನ್ನಡ ಸಿನಿಮಾದ ಮೂಲಕ ಸ್ಯಾಂಡಲ್ ವುಡ್ ಗೆ ಪಾದಾರ್ಪಣೆ ಮಾಡಿದ ನಟಿ ದಿವ್ಯಾ ಸುರೇಶ್ ಈಗ ಮತ್ತೊಂದು ಕನ್ನಡದ ಸಿನಿಮಾಗೆ ಸಹಿ ಹಾಕಿದ್ದಾರೆ . ಹೌದು , ಖ್ಯಾತ ಹಾಸ್ಯ ನಟ ಡಿಂಗ್ರಿ ನಾಗರಾಜ್ ಅವರ ಸುಪುತ್ರ ನಟ ರಾಜವರ್ಧನ್ ಅವರ ಬಹುನಿರೀಕ್ಷಿತ ಮೂರನೇ ಸಿನಿಮಾ ಆಗಿರುವ ‘ ಹಿರಣ್ಯ ‘ ದಲ್ಲಿ ನಟಿ ದಿವ್ಯಾ ಸುರೇಶ್ ಕಾಣಿಸಿಕೊಳ್ಳಲಿದ್ದಾರೆ .

ಅಂದಹಾಗೆ , ಈ ಸಿನಿಮಾದಲ್ಲಿ ಒಂದು ವಿಶೇಷ ಪಾತ್ರದಲ್ಲಿ ನಟಿ ದಿವ್ಯಾ ಸುರೇಶ್ ತೆರೆ ಮೇಲೆ ಮಿಂಚಲು ರೆಡಿಯಾಗಿದ್ದಾರೆ . ಪ್ರವೀಣ್ ಅವ್ಯುಕ್ತ್ ಅವರ ನಿರ್ದೇಶನದಲ್ಲಿ ಮೂಡಿ ಬರ್ತಿರುವ ‘ ಹಿರಣ್ಯ ‘ ದಲ್ಲಿ ನಟ ರಾಜವರ್ಧನ್ ಹಾಗೂ ನಟಿ ದಿವ್ಯಾ ಸುರೇಶ್ ಅವರು ಇಬ್ಬರೂ ತುಂಬಾ ಆತ್ಮೀಯ ಸ್ನೇಹಿತರು ಆಗಿರುತ್ತಾರೆ ಎನ್ನಲಾಗಿದೆ . ‘ ನಾವು ( ನಟ ರಾಜವರ್ಧನ್ ಹಾಗೂ ನಟಿ ದಿವ್ಯಾ ಸುರೇಶ್ ) ಒಟ್ಟಿಗೆ ನಟಿಸುವ ಅವಕಾಶ ‘ ಹಿರಣ್ಯ ‘ ಸಿನಿಮಾ ಮೂಲಕ ನನಸಾಗ್ತಿದೆ ‘ ಎಂದಿದ್ದಾರೆ ನಟಿ ದಿವ್ಯಾ ಸುರೇಶ್ .

ಇನ್ನು , ಇದೇ ಮಾರ್ಚ್ 9 ರಿಂದ ಈ ಸಿನಿಮಾದಲ್ಲಿನ ನಟಿ ದಿವ್ಯಾ ಸುರೇಶ್ ಅವರ ಭಾಗದ ಶೂಟಿಂಗ್ ಶುರುವಾಗಲಿದೆಯಂತೆ . ‘ ಹಿರಣ್ಯ ‘ ಚಿತ್ರದಲ್ಲಿ ನಟ ರಾಜವರ್ಧನ್ ಗೆ ನಾಯಕಿಯಾಗಿ ಮಾಡೆಲ್ ರಿಹಾನಾ ಅವರು ಸ್ಯಾಂಡಲ್​ವುಡ್​ಗೆ ಪಾದಾರ್ಪಣೆ ಮಾಡುತ್ತಿದ್ದು , ವೇದಾಸ್ ಇನ್ಫಿನೈಟ್ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಪಕರಾದ ವಿಘ್ನೇಶ್ವರ.ಯು ಮತ್ತು ವಿಜಯ್ ಕುಮಾರ್.ಬಿ.ವಿ ಅವರು ಈ ಸಿನಿಮಾಗೆ ಬಂಡವಾಳ ಹೂಡಲಿದ್ದಾರೆ . ಈ ಚಿತ್ರಕ್ಕೆ ಯೋಗೇಶ್ವರನ್‌ ಆರ್‌ ಅವರ ಛಾಯಾಗ್ರಹಣವಿದ್ದು . ಜ್ಯೂಡಾ ಸ್ಯಾಂಡಿ ಅವರು ಸಂಗೀತ ನಿರ್ದೇಶನ ಮಾಡಲಿದ್ದಾರೆ .