ಮೈಸೂರು: ವಿಂಟೇಜ್ ಫಿಲ್ಮ್ಸ್ ನಿರ್ಮಾಣದ, ಪ್ರದೀಪ್ ನಟನೆಯ ಚಿತ್ರ ಯೆಲ್ಲೋ ಬೋರ್ಡ್ ಮಾ.4ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಲಿದೆ.
ಈ ಕುರಿತು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಚಿತ್ರದ ನಾಯಕ ಪ್ರದೀಪ್, ಮೊದಲ ಬಾರಿಗೆ ಕ್ಯಾಬ್ ಚಾಲಕನ ಮೇಲೆ ಕಥೆ ಎಣೆಯಲಾಗಿದೆ. ಕ್ಯಾಬ್ ಚಾಲಕರ ಜೀವನ, ಅವರ ಹೋರಾಟಗಳನ್ನು ಚಿತ್ರದಲ್ಲಿ ಕಟ್ಟಿಕೊಡಲಾಗಿದೆ. ಚಿತ್ರದಲ್ಲಿ ಲವ್, ಸೆಂಟಿಮೆಂಟ್, ಆಕ್ಷನ್ ಎಲ್ಲವೂ ಇದ್ದು, ಅತ್ಯುತ್ತಮವಾಗಿ ಮೂಡಿಬಂದಿದೆ. ಚಿತ್ರದಲ್ಲಿ 5 ಹಾಡುಗಳಿದ್ದು, ಒಂದನ್ನು ಪುನೀತ್ ರಾಜಕುಮಾರ್ ಹಾಡಿದ್ದಾರೆ. ತ್ರಿಲೋಕ್ ರೆಡ್ಡಿ ನಿರ್ದೇಶನ ಮಾಡಿದ್ದು, ಅಹಲ್ಯ ಸುರೇಶ್, ಸ್ನೇಹಸಿಂಗ್, ಸಾಧು ಕೋಕಿಲಾ, ಶ್ರೀನಿವಾಸ್ ಬಿಂದಿಗನವಾಲೆ ಸೇರಿದಂತೆ ಹಲವರು ಅಭಿನಯಿಸಿದ್ದಾರೆ. ಮಾ.4ರಂದು ರಾಜ್ಯದ ಸುಮಾರು 150ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ. ಮೈಸೂರು ಎಲ್ಲಾ ಚಿತ್ರಗಳನ್ನು ಉತ್ತಮವಾಗಿ ಸ್ವೀಕರಿಸುತ್ತಿದ್ದು, ನಮ್ಮ ಚಿತ್ರಕ್ಕೂ ಉತ್ತಮ ಸ್ಪಂದನೆ ದೊರೆಯುವ ನಿರೀಕ್ಷೆ ಇದೆ ಎಂದರು.
ನಿರ್ದೇಶಕ ತ್ರಿಲೋಕ್ ರೆಡ್ಡಿ ಮಾತನಾಡಿ, ಸಮಾಜಕ್ಕೆ ಸದಬಿರುಚಿಯ ಚಿತ್ರ ನೀಡಬೇಕೆಂಬ ಉದ್ದೇಶದಿಂದ ನಿರ್ದೇಶಿಸಿರುವ ಚಿತ್ರವಿದು. ಸಾಮಾಜಿಕ ಮೌಲ್ಯವನ್ನು ಚಿತ್ರದಲ್ಲಿ ಹೇಳಲು ಪ್ರಯತ್ನಿಸಲಾಗಿದೆ. ಕ್ಲೈಮ್ಯಾಕ್ಸ್ ಯಾರೂ ನಿರೀಕ್ಷೆ ಮಾಡದಂತೆ ಮೂಡಿಬಂದಿದ್ದು, ಪ್ರೇಕ್ಷಕರಿಗೆ ಇಷ್ಟವಾಗಲಿದೆ ಎಂದರು.
ಗೋಷ್ಠಿಯಲ್ಲಿ ಕಾರ್ಯಕಾರಿ ನಿರ್ಮಾಪಕ ನವೀನ್ ಕುಮಾರ್.ಆರ್, ವಿಜಯಕುಮಾರ್, ಕೆ.ಎಸ್.ಶಿವರಾಂ, ಶಾಂತರಾಜ್, ಭಾಸ್ಕರ್ ಇದ್ದರು.
