ಮುಂಬೈ: ಶೇ 61 ಮುಂಬೈ ನಿವಾಸಿಗಳು ಕೆಲಸದ ವೇಳೆ ನಿದ್ರೆ ಮಾಡುವ ಸಮಸ್ಯೆಯಿಂದ ಬಳುತ್ತಿದ್ದಾರೆ ಎಂದು ಸಮೀಕ್ಷೆಯೊಂದು ಹೇಳಿದೆ. ಸ್ಲೀಪ್ ಸೊಲ್ಯೂಷನ್ಸ್ ಪ್ರೊವೈಡರ್ ನಡೆಸಿದ ಗ್ರೇಟ್ ಇಂಡಿಯನ್ ಸ್ಲೀಪ್ ಸ್ಕೋರ್‌ಕಾರ್ಡ್ (GISS) ಸಮೀಕ್ಷೆಯು ಭಾರತೀಯರಲ್ಲಿ ನಿದ್ರೆಯ ಮಾದರಿಗಳು ಮತ್ತು ಪ್ರವೃತ್ತಿಗಳನ್ನು ಅರ್ಥಮಾಡಿಕೊಳ್ಳಲು ಪ್ರಯತ್ನಿಸಿದೆ.
ಮುಂಬೈ ಅನ್ನು ‘ಎಂದಿಗೂ ಮಲಗದ ನಗರ’ ಎಂದು ಕರೆಯಲಾಗಿದ್ದರೂ, ಇಲ್ಲಿ ಶೇಕಡಾ 70 ರಷ್ಟು ಜನರು ರಾತ್ರಿ 11 ಗಂಟೆಯ ನಂತರ ನಿದ್ರೆಗೆ ಮೊರೆಹೋಗುತ್ತಾರೆ. ಶೇಕಡಾ 49 ರಷ್ಟು ಜನರು ಎಚ್ಚರವಾದಾಗ ನಿದ್ದೆಯ ಬಳಿಕ ಪಡೆಯುವ ಉಲ್ಲಾಸವನ್ನು ಹೊಂದಿರುವುದಿಲ್ಲ ಎಂದು ವರದಿ ತಿಳಿಸಿದೆ.
ಕುತೂಹಲಕಾರಿ ಅಂಶವೆಂದರೆ ಶೇ 61 ರಷ್ಟು ಮಂದಿ ಮುಂಬೈಗರು ಕೆಲಸದ ಅವಧಿಯಲ್ಲಿ ನಿದ್ರಿಸುತ್ತಾರೆ ಎನ್ನಲಾಗಿದೆ. ಈ ಪೈಕಿ ಶೇ.57 ಪುರುಷರು, ಶೇ 67 ರಷ್ಟು ಮಹಿಳೆಯರಿದ್ದಾರೆ.
2022 ಕ್ಕೆ ಹೋಲಿಸಿದರೆ ಈ ವರ್ಷ ಬೆಳಿಗ್ಗೆ ಎದ್ದ ನಂತರ ‘ದಣಿದ ಭಾವನೆಯ ಅಂಶ ಶೇ 34ರಷ್ಟು ಏರಿಕೆ ಕಂಡಿದೆ ಎಂದು ವರದಿ ಹೇಳಿದೆ.
ರಾತ್ರಿಯ ವೇಳೆ ಸಮರ್ಪಕ ನಿದ್ರೆ ಇಲ್ಲದಿರುವುದು ಕೆಲಸದ ವೇಳೆ ನಿದ್ರೆ ತೂಗುವ ಸಮಸ್ಯೆ ಕಾರಣ. ಅಲ್ಲದೇ ಮಲಗುವ ಕೋಣೆ ವಾತಾವರಣವೂ ನಿದ್ರಾಹೀನತೆಗೆ ಕಾರಣವಾಗಿದೆ.
ಮುಂಬೈ ವೈದ್ಯೆ ಡಾ. ಹಿಮಾಂಶು ಷಾ ಈ ಬಗ್ಗೆ ವಿವರಿಸಿದ್ದು, ಕುಟುಂಬದ ಭವಿಷ್ಯದ ಭಯ, ಉದ್ಯೋಗ ಅಭದ್ರತೆ ಇತ್ಯಾದಿ ವಿಷಯಗಳು ನಿದ್ರಾಹೀನತೆ, ಅಸಮರ್ಪಕ ನಿದ್ರೆಗೆ ಕಾರಣ ಎಂದು ವಿವರಿಸಿದ್ದಾರೆ.
