ಹೈದರಾಬಾದ್: ಅಂಗಾಂಗ ದಾನವನ್ನು ಸಾಮಾನ್ಯವಾಗಿ ವಯಸ್ಕರು ಮಾತ್ರ ಮಾಡುತ್ತಾರೆ. ಆದರೆ ವಿರಳ ಪ್ರಕರಣವೊಂದರಲ್ಲಿ ಮೆದುಳು ನಿಷ್ಕ್ರಿಯಗೊಂಡ 14 ತಿಂಗಳಬಾಲಕನ ಮೂತ್ರಪಿಂಡವನ್ನು ಹೈದರಾಬಾದ್‌ನಲ್ಲಿ 58 ವರ್ಷದ ಮಹಿಳೆಗೆ ದಾನ ಮಾಡಲಾಗಿದೆ.
ಕಳೆದ ಏಳು ವರ್ಷಗಳಿಂದ ಡಯಾಲಿಸಿಸ್‌ಗೆ ಒಳಗಾದ ಮಹಿಳೆಗೆ ಬಾಲಕ ತೀರಿಕೊಂಡ ದುಃಖವನ್ನು ಮೀರಿ, ಮಗುವಿನ ಪೋಷಕರು ಮೂತ್ರಪಿಂಡವನ್ನು ದಾನ ಮಾಡಿದರು. 58ರ ಹರೆಯದ ಮಹಿಳೆ ಹೃದಯ ಸಮಸ್ಯೆಯನ್ನು ಹೊಂದಿದ್ದು ಪೇಸ್‌ಮೇಕರ್‌ ಕೂಡ ಅಳವಡಿಸಲಾಗಿತ್ತು. ಸಿಕಂದರಾಬಾದ್‌ನ ಕಿಮ್ಸ್ ಆಸ್ಪತ್ರೆಯಲ್ಲಿ ಅಪರೂಪದ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ.
ಚಿಕ್ಕ ಮಕ್ಕಳ ಅಂಗಗಳು ತುಲನಾತ್ಮಕವಾಗಿ ಚಿಕ್ಕದಾಗಿರುವುದರಿಂದ, ವಯಸ್ಸಾದ ಜನರಲ್ಲಿ ಅವುಗಳನ್ನು ಅಳವಡಿಸಲು ತೊಡಕುಗಳಿವೆ. ಆದಾಗ್ಯೂ, ನುರಿತ ವೈದ್ಯರು, ಅತ್ಯಾಧುನಿಕ ತಂತ್ರಜ್ಞಾನದಿಂದ ಈ ಸಮಸ್ಯೆಯನ್ನು ಪರಿಹರಿಸಲಾಗಿದೆ ಎಂದು ವೈದ್ಯರ ತಂಡ ವಿವರಿಸಿದೆ.
ಮೂತ್ರಪಿಂಡ ಕಸಿ ಶಸ್ತ್ರಚಿಕಿತ್ಸೆ ನಡೆಸಿದ ತಂಡದ ನೇತೃತ್ವ ವಹಿಸಿದ್ದ ಸಮಾಲೋಚಕ ಮೂತ್ರಶಾಸ್ತ್ರಜ್ಞ ಮತ್ತು ಮೂತ್ರಪಿಂಡ ಕಸಿ ಶಸ್ತ್ರಚಿಕಿತ್ಸಕ ಡಾ.ಉಮಾಮಹೇಶ್ವರ ರಾವ್ ಮಾತನಾಡಿ ಇದು ಅತಿ ವಿರಳ, ಕ್ಲಿಷ್ಟಕರ ಸಮಸ್ಯೆಯಾಗಿತ್ತು ಎಂದು ವಿವರಿಸಿದ್ದಾರೆ.
