ಮನೆಯಲ್ಲಿಯೇ ರುಚಿಕರವಾದ ಪುಳಿಯೋಗರೆ ಮಾಡುವ ವಿಧಾನ

ಪುಳಿಯೋಗರೆ ಮಾಡಲು ಬೇಕಾಗುವ ಸಾಮಾಗ್ರಿಗಳು

100 ಗ್ರಾಂ ಹುಣಸೆಹಣ್ಣು
ಸ್ವಲ್ಪ ಬೆಲ್ಲ
6 ಚಮಚ ಕರಿ ಎಳ್ಳು
ಅರ್ಧ ಕೊಬ್ಬರಿ
ಒಂದು ಚಮಚ ಮೆಂತ್ಯೆ
2 ಚಮಚ ಕರಿ ಮೆಣಸು
ಮೂರು ಚಮಚ ಕೊತ್ತಂಬರಿ ಬೀಜ
2 ಚಮಚ ಜೀರಿಗೆ
5 ರಿಂದ 6 ಒಣಮೆಣಸು ಮೆಣಸು
4 ರಿಂದ 5 ಗುಂಟೂರು ಮೆಣಸಿನಕಾಯಿ
ಅಗತ್ಯಕ್ಕೆ ತಕ್ಕಷ್ಟು ಎಣ್ಣೆ
2 ಚಮಚ ಉದ್ದಿನಬೇಳೆ
1 ಚಮಚ ಸಾಸಿವೆ
2 ಚಮಚ ಕಡಲೇ ಬೇಳೆ
2 ಚಮಚ ಶೇಂಗಾ
ಸ್ವಲ್ಪ ಇಂಗು
ಸ್ವಲ್ಪ ಕರಿಬೇವು
ಅನ್ನ

ಪುಳಿಯೋಗರೆ ಮಾಡುವ ವಿಧಾನ

100 ಗ್ರಾಂ ಹುಣಿಸೆಹಣ್ಣನ್ನು ನೆನೆಸಿಟ್ಟು ಅದರ ರಸಹಿಂಡಿಕೊಂಡು ಇಟ್ಟುಕೊಳ್ಳಿ, ಅದಕ್ಕೆ ನಿಂಬೆಹಣ್ಣಿನ ಗಾತ್ರದಷ್ಟು ಬೆಲ್ಲ ಹಾಕಿ ಚೆನ್ನಾಗಿ ಕುದಿಸಿ. ಈಗ ಆರು ಚಮಚ ಕರಿ ಎಳ್ಳನ್ನು ಹುರಿದುಕೊಂಡು ಮಿಕ್ಸಿಗೆ ಹಾಕಿ ನುಣ್ಣಗೆ ಪುಡಿ ಮಾಡಿಟ್ಟುಕೊಳ್ಳಿ. ನಂತರ ಅರ್ಧ ಒಣ ಕೊಬ್ಬರಿಯನ್ನು ತುರಿದು ಅದಕ್ಕೆ ಸೇರಿಸಿ ಮಿಶ್ರಣ ಮಾಡಿ.

ಈಗ ಒಂದು ಪ್ಯಾನ್​ ತೆಗೆದುಕೊಂಡು ಒಂದು ಚಮಚ ಮೆಂತ್ಯ, ಎರಡು ಚಮಚ ಕರಿ ಮೆಣಸು, ಮೂರು ಚಮಚ ಕೊತ್ತಂಬರಿ ಬೀಜ, ಎರಡು ಚಮಚ ಜೀರಿಗೆ, 5-6 ಬಳ್ಳಿ ಒಣಮೆಣಸಿನಕಾಯಿ, 4-5 ಗುಂಟೂರು ಮೆಣಸಿನಕಾಯಿ ಇವಿಷ್ಟನ್ನೂ ಎರಡರಿಂದ ಮೂರು ಚಮಚ ಎಣ್ಣೆ ಹಾಕಿ ಸಣ್ಣ ಉರಿಯಲ್ಲಿ ಗರಿಗರಿ ಹುರಿದುಕೊಂಡು ತಣ್ಣಗಾದ ಮೇಲೆ ಮಿಕ್ಸಿಗೆ ಹಾಕಿ ಪುಡಿ ಮಾಡಿಟ್ಟುಕೊಳ್ಳಬೇಕು.

ಈಗ ಒಗ್ಗರಣೆ ಮಾಡಿಕೊಳ್ಳಿ, ಅದಕ್ಕೆ ಒಂದು ಪ್ಯಾನ್​ನಲ್ಲಿ ಸ್ವಲ್ಪ ಎಣ್ಣೆ, ಒಂದು ಚಮಚ ಸಾಸಿವೆ, ಎರಡು ಚಮಚ ಉದ್ದಿನಬೇಳೆ, ಎರಡು ಚಮಚ ಕಡಲೆಬೇಳೆ, 50 ಗ್ರಾಂ ಶೇಂಗಾ ಜೊತೆಗೆ ಕರಿಬೇವಿನ ಎಲೆಗಳು ಮತ್ತು ಅರ್ಧ ಚಮಚ ಇಂಗು ಹಾಕಿ ಒಗ್ಗರಣೆ ಮಾಡಿಕೊಳ್ಳಿ. ಇವೆಲ್ಲ ರೆಡಿ ಆದ ಮೇಲೆ ತಯಾರಿಸಿಕೊಂಡಿರುವ ಅನ್ನಕ್ಕೆ ಹಾಕಿ ಚನ್ನಾಗಿ ಕಲಸಿದರೆ ರುಚಿ ರುಚಿಯಾದ ಅಯ್ಯಂಗಾರ್ ಪುಳಿಯೋಗರೆ ರೆಡಿ.