ಬೆಂಗಳೂರು : ರಾಜ್ಯ ಪೊಲೀಸ್ ಇಲಾಖೆಯು ಡ್ರಗ್ಸ್ ದಂಧೆ, ಮಾದಕ ವಸ್ತು ಬಳಕೆಗೆ ಬ್ರೇಕ್ ಹಾಕಲು ದಿಟ್ಟ ಹೆಜ್ಜೆ ಇಟ್ಟು, ಮಹತ್ವದ ಕ್ರಮಕೈಗೊಂಡಿದೆ.
“ನಶೆ ಮುಕ್ತ ಕರ್ನಾಟಕ” ಎಂಬ ಹೊಸ ಮೊಬೈಲ್ ಆ್ಯಪ್ ಅನ್ನು ಪೊಲೀಸ್ ಇಲಾಖೆಯು ಪರಿಚಯಿಸಿದೆ. ಈ ಆ್ಯಪ್ ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಲಭ್ಯ ಇದೆ. ಗಾಂಜಾ, ಡ್ರಗ್ಸ್, ಡ್ರಗ್ಸ್ ಪೆಡ್ಲರ್, ಡ್ರಗ್ಸ್ ಅಡ್ಡೆ, ಸಾಗಾಣಿಕೆ ಮುಂತಾದ ಅಕ್ರಮ ಕುರಿತಾಗಿ ಮಾಹಿತಿಯನ್ನು ಸಾರ್ವಜನಿಕರು “ನಶೆ ಮುಕ್ತ ಕರ್ನಾಟಕ ಆಪ್” ಮೂಲಕ ಹಂಚಿಕೊಳ್ಳಬಹುದು. ಮಾಹಿತಿ ನೀಡಿದವರ ವಿವರ ಪೊಲೀಸರು ಗೌಪ್ಯವಾಗಿಡುತ್ತಾರೆ.
ಕನ್ನಡ, ಇಂಗ್ಲಿಷ್ ಭಾಷೆಯಲ್ಲಿ ಆ್ಯಪ್ ಅಭಿವೃದ್ಧಿಪಡಿಸಲಾಗಿದೆ. ಮಾಹಿತಿ ಬಂದ ಆಧಾರದಲ್ಲಿ ಖಚಿತತೆ ಮಾಡಿಕೊಂಡು ಕರ್ನಾಟಕ ಪೊಲೀಸ್ ಇಲಾಖೆಯಿಂದ ಸಂಬಂಧಿಸಿದ ಆಯಾ ಠಾಣಾ ವ್ಯಾಪ್ತಿಯ ಪೊಲೀಸರಿಗೆ ಮಾಹಿತಿ ನೀಡಲಾಗುತ್ತದೆ. ರಾಜ್ಯದ ಯಾವ ಮೂಲೆಯಿಂದಲೂ ಯಾರೂ ಬೇಕಾದರೂ ಮಾದಕ ವಸ್ತುಗಳ ಅಕ್ರಮದ ಕುರಿತು ಮಾಹಿತಿ ಇಲಾಖೆಯೊಂದಿಗೆ ಹಂಚಿಕೊಳ್ಳಬಹುದು.