ಯುಎಇ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಮಹತ್ವವಾದ ಹೆಜ್ಜೆಯೊಂದನ್ನು ಇರಿಸಿದೆ. ವಿಜ್ಞಾನಿಗಳು, ವೈದ್ಯರು, ಎಂಜಿನಿಯರ್‌ಗಳು, ಕಲಾವಿದರು, ಲೇಖಕರು, ಹೂಡಿಕೆದಾರರು, ವಿಶೇಷ ಪ್ರತಿಭೆಗಳು ಮತ್ತು ವೃತ್ತಿಪರರಿಗೆ ಯುಎಇ ಪೌರತ್ವ ನೀಡಲು ಅನುಮತಿಸುವ ಕಾನೂನಿಗೆ ತಿದ್ದುಪಡಿಗೆ ಯುಎಇ ಮುಂದಾಗಿದೆ.
ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅವರು ಶನಿವಾರ ಘೋಷಿಸಿದ ಹೊಸ ಪ್ರಕ್ರಿಯೆಯಲ್ಲಿ ಎಮಿರೇಟ್ಸೇತರರು ಮೊದಲ ಬಾರಿಗೆ ಎಮಿರೇಟ್ಸ್‌ ಪೌರತ್ವ ಪಡೆಯಬಹುದಾಗಿದೆ.
ಯುಎಇ ಪೌರತ್ವದೊಂದಿಗೆ ಮೂಲ ದೇಶದ ಪೌರತ್ವ ಪಡೆಯುಬಹುದಾದ ದ್ವಿಪೌರತ್ವಕ್ಕೂ ಅವಕಾಶ ಕಲ್ಪಿಸಲಾಗಿದೆ. ಸಾಧಾರಣವಾಗಿ ಗಲ್ಫ್‌ನಲ್ಲಿ ಪೌರತ್ವವನ್ನು ವಿದೇಶಿಯರಿಗೆ ನೀಡಲಾಗುವುದಿಲ್ಲ. ಈ ಹೊಸ ನಿಯಮ ವಿದೇಶಿಯರಿಗೂ ಪೌರತ್ವ ಒದಗಿಸಲಿದೆ. ಆದರೆ ಈ ಹೊಸ ನಿಯಮಗಳಲ್ಲಿ ತೊಂದರೆಯೊಂದಿದೆ. ಅಲ್ಲಿನ ಸರ್ಕಾರ ನುರಿತ ವೃತ್ತಿಪರರನ್ನು ಸರ್ಕಾರ ಅಥವಾ ರಾಜಮನೆತನದ ಅಧಿಕಾರಿಗಳು ನಾಮನಿರ್ದೇಶನ ಮಾಡಿದಲ್ಲಿ ಮಾತ್ರ ಪೌರತ್ವ ಪಡೆಯಬಹುದು. ನಾಮನಿರ್ದೇಶಿತರನ್ನು ಹೇಗೆ ಗುರುತಿಸಲಾಗುತ್ತದೆ ಎಂಬುದನ್ನು ಸರ್ಕಾರ ಇನ್ನೂ ತಿಳಿಸಿಲ್ಲ.
ವಿಶೇಷ ಪೌರತ್ವ ಪಡೆಯುವವರ ಕುಟುಂಬದವರೂ ಕೂಡ ಅಲ್ಲಿನ ಪೌರತ್ವ ಪಡೆಯಲು ಅರ್ಹರಾಗಿರುತ್ತಾರೆ. ವಿಶೇಷ ಪ್ರತಿಭೆಗಳು ಮತ್ತು ವೃತ್ತಿಪರರಿಗೆ ಯುಎಇ ಪೌರತ್ವವನ್ನು ನೀಡಲು ನಾವು ಕಾನೂನು ತಿದ್ದುಪಡಿಗಳನ್ನು ಅಂಗೀಕರಿಸಿದ್ದೇವೆ ಎಂದು ದುಬೈ ಆಡಳಿತಗಾರ ಶೇಖ್ ಮೊಹಮ್ಮದ್ ಶನಿವಾರ ಹೇಳಿದ್ದಾರೆ.
