ದಾರ್ ಎಸ್ ಸಲಾಮ್: ವಿಕ್ಟೋರಿಯಾ ಸರೋವರದಲ್ಲಿ ವಿಮಾನ ಪತನ, 26 ಪ್ರಯಾಣಿಕರ ರಕ್ಷಣೆ

ದಾರ್ ಎಸ್ ಸಲಾಮ್: ತಾಂಜೇನಿಯಾದ ವಾಯುವ್ಯ ಕಾಗೇರಾ ಪ್ರದೇಶದ ವಿಕ್ಟೋರಿಯಾ ಸರೋವರಕ್ಕೆ ಭಾನುವಾರ ಬೆಳಿಗ್ಗೆ ಅಪ್ಪಳಿಸಿದ ವಿಮಾನದಿಂದ 26 ಪ್ರಯಾಣಿಕರನ್ನು ರಕ್ಷಿಸಲಾಗಿದೆ.

ದಾರ್ ಎಸ್ ಸಲಾಮ್ ಜೂಲಿಯಸ್ ನೈರೆರೆ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಕಾಗೆರಾ ಪ್ರದೇಶದ ಬುಕೋಬಾ ವಿಮಾನ ನಿಲ್ದಾಣಕ್ಕೆ ಪ್ರಯಾಣಿಸುತ್ತಿದ್ದ ವಿಮಾನವು 43 ಜನರನ್ನು ಕರೆದೊಯ್ಯುತ್ತಿತ್ತು ಎಂದು ಕಾಗೇರಾ ಪ್ರಾದೇಶಿಕ ಆಯುಕ್ತ ಆಲ್ಬರ್ಟ್ ಚಲಮಿಲಾ ತಿಳಿಸಿದ್ದಾರೆ.

ವಿಮಾನದಲ್ಲಿದ್ದ 43 ಜನರ ಪೈಕಿ 39 ಮಂದಿ ಪ್ರಯಾಣಿಕರು, ಇಬ್ಬರು ಪೈಲಟ್ ಗಳು ಮತ್ತು ಇಬ್ಬರು ಕ್ಯಾಬಿನ್ ಸಿಬ್ಬಂದಿಯಾಗಿದ್ದು, ಖಾಸಗಿ ವಿಮಾನಯಾನ ಸಂಸ್ಥೆಯಾದ ಪ್ರೆಸಿಷನ್ ಏರ್ ಗೆ ಸೇರಿದ ವಿಮಾನದಲ್ಲಿ ಇನ್ನೂ ಸಿಲುಕಿರುವ 13 ಪ್ರಯಾಣಿಕರನ್ನು ಹೊರತೆಗೆಯಲು ರಕ್ಷಣಾ ಸಿಬ್ಬಂದಿ ಇನ್ನೂ ಶ್ರಮಿಸುತ್ತಿದ್ದಾರೆ ಎಂದು ಚಲಮಿಲಾ ಹೇಳಿದರು.

ರಕ್ಷಿಸಲ್ಪಟ್ಟ ಪ್ರಯಾಣಿಕರನ್ನು ಆಸ್ಪತ್ರೆಗಳಿಗೆ ಸಾಗಿಸಲಾಗಿದೆ ಎಂದು ಅವರು ಹೇಳಿದರು, ಅಧಿಕಾರಿಗಳು ಇನ್ನೂ ವಿಮಾನದೊಳಗೆ ಸಿಕ್ಕಿಬಿದ್ದ ಪೈಲಟ್ ಗಳನ್ನು ಸಂಪರ್ಕಿಸುತ್ತಿದ್ದಾರೆ ಎಂದು ಹೇಳಿದರು.

ತಾಂಜೇನಿಯಾ, ಕೀನ್ಯಾ ಮತ್ತು ಉಗಾಂಡಾ ಹಂಚಿಕೊಂಡ ವಿಶ್ವದ ಎರಡನೇ ಅತಿದೊಡ್ಡ ಸಿಹಿನೀರಿನ ಸರೋವರವಾದ ವಿಕ್ಟೋರಿಯಾ ಸರೋವರಕ್ಕೆ ಸ್ಥಳೀಯ ಕಾಲಮಾನ ಬೆಳಿಗ್ಗೆ 8:20 ರ ಸುಮಾರಿಗೆ (0520 ಜಿಎಂಟಿ) ಬುಕೋಬಾ ವಿಮಾನ ನಿಲ್ದಾಣವನ್ನು ಸಮೀಪಿಸುತ್ತಿದ್ದಂತೆ ವಿಮಾನ ಪತನಗೊಂಡಿದೆ ಎಂದು ಚಲಮಿಲಾ ಹೇಳಿದರು.