ಬಿಜಿಂಗ್: ದೇಶದಲ್ಲಿ ಕೋವಿಡ್ ಪ್ರಕರಣಗಳ ಜೊತೆಗೆ ಒಮಿಕ್ರೋನ್ ಹೊಸ ರೂಪಾಂತರಿಗಳು ಪತ್ತೆಯಾಗುತ್ತಿವೆ. ಈ ನಡುವೆ ಚೀನಾದ ಶಾಂಘೈ ನಗರದಲ್ಲಿ ಹೊಸ ಒಮಿಕ್ರೋನ್ ಉಪ ತಳಿ ಪತ್ತೆಯಾಗಿದೆ.
ಇದು ಓಮಿಕ್ರಾನ್ ರೂಪಾಂತರಿ ವೈರಸ್‌ಆಗಿದೆ. ನೂತನ ವೈರಸ್ ಬಿ ಎ.5.2.1 ಅಪಾಯ ಸೃಷ್ಟಿಸಲಿದೆ ಎಂದು ತಜ್ಞರು ಎಚ್ಚರಿಕೆ ನೀಡಿದ್ದಾರೆ.
ವಿದೇಶದಿಂದ ಆಗಮಿಸಿದ ವ್ಯಕ್ತಿಗೆ ತೀವ್ರ ಜ್ವರ ಹಾಗೂ ಇತರ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿತ್ತು. ಜುಲೈ 8 ರಂದು ಪರೀಕ್ಷೆ ನಡೆಸಲಾಗಿತ್ತು. ಇದೀಗ ವರದಿ ಬಂದಿದ್ದು, ಓಮಿಕ್ರಾನ ರೂಪಾಂತರಿ ವೈರಸ್ ಬಿ ಎ.5.2.1 ಪತ್ತೆಯಾಗಿದೆ.
ಶಾಂಘೈನಲ್ಲಿ ಹೊಸ ವೈರಸ್ ಪತ್ತೆಯಾದ ಬೆನ್ನಲ್ಲೇ ಇದೀಗ ಕಠಿಣ ನಿರ್ಬಂಧಗಳು ಮತ್ತೆ ಜಾರಿಯಾಗಿದೆ. ಕಳೆದ ಜೂನ್ ತಿಂಗಳಲ್ಲಿ ಕೋವಿಡ್ ಪ್ರಕರಣ ಏರಿಕೆಯಾದ ಬೆನ್ನಲ್ಲೇ ಹಲವು ನಗರಗಳಲ್ಲಿ ಲಾಕ್‌ಡೌನ್ ಹೇರಲಾಗಿತ್ತು. ಇದೀಗ ಹೊಸ ವೈರಸ್ ಪತ್ತೆಯಿಂದ ಮತ್ತೆ ನಿರ್ಬಂಧ ಜಾರಿಯಾಗುತ್ತಿದೆ.
ಉಗಾಂಡದಿಂದ ಚೀನಾಗೆ ಆಗಮಿಸಿದ 37 ವರ್ಷದ ಮಹಿಳೆಯಲ್ಲಿ ಹೊಸ ವೈರಸ್ ಪತ್ತೆಯಾಗಿದೆ. ಶಾಂಘೈನಗರದಲ್ಲಿ ಇದೀಗ ಪ್ರತಿಯೊಬ್ಬರು ಎರಡೆರಡು ಬಾರಿ ಕೋವಿಡ್ ಟೆಸ್ಟ್ ಮಾಡಿಸಿಕೊಳ್ಳಲು ಸೂಚನೆ ನೀಡಲಾಗಿದೆ. ಸದ್ಯ ಒಂದು ಪ್ರಕರಣ ಮಾತ್ರ ಪತ್ತೆಯಾಗಿದೆ. ಹೀಗಾಗಿ ಎಚ್ಚರಿಕೆ ವಹಿಸಲು ಸೂಚಿಸಲಾಗಿದೆ.
