ವಿಮಾನ ಪತನಗೊಂಡು 40 ದಿನಗಳ ಬಳಿಕ ನಾಲ್ವರು ಮಕ್ಕಳ ರಕ್ಷಣೆ

ಬೊಗೋಟಾ: ಕೊಲಂಬಿಯಾದ ಅಮೆಜಾನ್ ಅರಣ್ಯದಲ್ಲಿ ಮೇ 1 ರಂದು ವಿಮಾನವೊಂದು ಪತನಗೊಂಡ ವೇಳೆ ನಾಪತ್ತೆಯಾಗಿದ್ದ ನಾಲ್ವರು ಮಕ್ಕಳು ಜೀವಂತವಾಗಿ ಪತ್ತೆಯಾಗಿದ್ದಾರೆ ಎಂದು ಅಲ್ಲಿನ ಅಧ್ಯಕ್ಷ ಗುಸ್ತಾವೊ ಪೆಟ್ರೋ ಘೋಷಿಸಿದ್ದಾರೆ.

ಕೊಲಂಬಿಯಾದ ಕಾಡಿನಲ್ಲಿ ವಿಮಾನ ಪತನಗೊಂಡು ಬರೋಬ್ಬರಿ 40 ದಿನಗಳ ಬಳಿಕ 4 ಮಕ್ಕಳು ಜೀವಂತವಾಗಿ ಪತ್ತೆಯಾಗಿದ್ದಾರೆ ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ ಮಕ್ಕಳ ಚಿತ್ರಗಳನ್ನು ಅವರು ಟ್ವಿಟರ್‌ನಲ್ಲಿ ಪ್ರಕಟಿಸಿದ್ದಾರೆ.

ಲೆಸ್ಲಿ ಜಾಕೊಬೊಂಬೈರ್ ಮುಕುಟುಯ್ (13), ಸೊಲೆನಿ ಜಾಕೊಬೊಂಬೈರ್ ಮುಕುಟುಯ್ (9), ಟಿಯೆನ್ ರಾನೋಕ್ ಮುಕುಟುಯ್ (4) ಮತ್ತು ಕ್ರಿಸ್ಟಿನ್ ರಾನೋಕ್ ಮುಕುಟುಯ್ (1) ಇದೀಗ ಪತ್ತೆಯಾಗಿದ್ದು, ಮಕ್ಕಳ ಪೋಷಕರಲ್ಲಿ ಸಂತಸ ಮನೆಮಾಡಿದೆ. ಮೇ 1 ರಂದು, ಸೆಸ್ನಾ 206 ಲಘು ವಿಮಾನವು ಅಮೆಜಾನಾಸ್ ಪ್ರಾಂತ್ಯದ ಅರರಾಕುವಾರಾದಿಂದ
ಗುವಿಯಾರ್‌ನಲ್ಲಿರುವ ಸ್ಯಾನ್ ಜೋಸ್ ಡೆಲ್ ಗುವಿಯಾರೆಗೆ ನಡುವೆ ಹಾರಾಟ ನಡೆಸುತ್ತಿದ್ದಾಗ ಅದು ಕಣ್ಮರೆಯಾಗಿತ್ತು.

ಅಪಘಾತದ ನಂತರ, ಸ್ನಿಫರ್ ಡಾಗ್‌ಗಳೊಂದಿಗೆ 100 ಕ್ಕೂ ಹೆಚ್ಚು ಸೈನಿಕರನ್ನು ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯಲ್ಲಿ ನಿಯೋಜಿಸಲಾಗಿತ್ತು. ರಕ್ಷಣಾ ಕಾರ್ಯಾಚರಣೆ ವೇಳೆ ವಿಮಾನದ ಅವಶೇಷ ಮತ್ತು ಪೈಲಟ್ ಮತ್ತು ಇಬ್ಬರು ಪುರುಷರ ಮೃತದೇಹ ಪತ್ತೆಯಾಗಿತ್ತು. ಇದೀಗ ಮಕ್ಕಳು ಬದುಕುಳಿದಿರುವುದು ಅಚ್ಚರಿಯೊಂದಿಗೆ ಅಪಘಾತದಲ್ಲಿ ಇನ್ನು ಹಲವರು ಬದುಕುಳಿದಿರಬಹುದು ಎಂಬ ಆಶಾಭಾವ ಮೂಡಿಸಿದೆ.