ಮುಂಬೈ: ಖ್ಯಾತ ಕೈಗಾರಿಕೋದ್ಯಮಿ, ಮಹೀಂದ್ರಾ ಗ್ರೂಪ್ ಮಾಜಿ ಅಧ್ಯಕ್ಷ ಕೇಶುಬ್ ಮಹೀಂದ್ರಾ ಬುಧವಾರ ಬೆಳಿಗ್ಗೆ ಮುಂಬೈನಲ್ಲಿ ನಿಧನರಾದರು ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅವರಿಗೆ 99 ವರ್ಷ ವಯಸ್ಸಾಗಿತ್ತು. ಸೋದರಳಿಯ ಮತ್ತು ಕೈಗಾರಿಕೋದ್ಯಮಿ ಆನಂದ್ ಮಹೀಂದ್ರಾ ಮತ್ತು ಇತರ ಸಂಬಂಧಿಕರನ್ನು ಅಗಲಿದ್ದಾರೆ.
1984 ರ ಡಿಸೆಂಬರ್ ನಲ್ಲಿ ಭೋಪಾಲ್ ಅನಿಲ ಸೋರಿಕೆ ಸಂಭವಿಸಿದಾಗ ಮಹೀಂದ್ರಾ ಯೂನಿಯನ್ ಕಾರ್ಬೈಡ್ ಇಂಡಿಯಾ ಲಿಮಿಟೆಡ್ ಕಾರ್ಯನಿರ್ವಾಹಕೇತರ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು.
ಈ ಘಟನೆಗೆ ಸಂಬಂಧಿಸಿ 2010ರಲ್ಲಿ ಮಹೀಂದ್ರಾ ಮತ್ತು ಇತರರನ್ನು ನ್ಯಾಯಾಲಯವು 2010 ರಲ್ಲಿ ಎರಡು ವರ್ಷಗಳ ಜೈಲು ಶಿಕ್ಷೆಗೆ ಗುರಿಪಡಿಸಿತ್ತು. ಬಳಿಕ ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿತ್ತು.
ಅಕ್ಟೋಬರ್ 9, 1923 ರಂದು ಶಿಮ್ಲಾದಲ್ಲಿ ಜನಿಸಿದ ಮಹೀಂದ್ರಾ ತಮ್ಮ ಉನ್ನತ ಶಿಕ್ಷಣವನ್ನು ಪೆನ್ಸಿಲ್ವೇನಿಯಾ ವಾರ್ಟನ್ ಸ್ಕೂಲ್ ವಿವಿಯಲ್ಲಿ ಪಡೆದಿದ್ದರು. 1947 ರಲ್ಲಿ ಮಹೀಂದ್ರಾ ಗ್ರೂಪ್ ಸೇರಿದರು. 1963 ರಲ್ಲಿ ಅದರ ಅಧ್ಯಕ್ಷರಾದರು.
ಒಂದು ಕಾಲದಲ್ಲಿ ರಸ್ತೆಗಳನ್ನು ಆಳಿದ ಜನಪ್ರಿಯ ವಿಲ್ಲಿಸ್ ಜೀಪ್ ಗಳಿಂದ ಪ್ರಾರಂಭಿಸಿ, ಎಂಜಿನಿಯರಿಂಗ್, ಕೃಷಿ ಉಪಕರಣಗಳು, ಶಿಕ್ಷಣ, ಏರೋಸ್ಪೇಸ್, ಐಟಿ, ವಸತಿ, ರಿಯಾಲ್ಟಿ, ಹಣಕಾಸು ಕ್ಷೇತ್ರಗಳಲ್ಲಿ ಮಹೀಂದ್ರಾ ಸಂಸ್ಥೆ ಯ ಹೆಸರು ಪ್ರಸಿದ್ಧಿ ಪಡೆಯುವಲ್ಲಿ ಕೇಶುಬ್ ಶ್ರಮ ಶ್ಲಾಘನೀಯವಾಗಿದೆ.