ಜ.೨೫ರಿಂದ ಆರಂಭವಾಗಲಿರುವ ಭಾರತ-ಇಂಗ್ಲೆಂಡ್ ಟೆಸ್ಟ್ ಸರಣಿಯ ಪ್ರಯುಕ್ತ ಐದು ಪಂದಗಳನ್ನು ಆಡಲು ಇಂಗ್ಲೆಂಡ್ ತಂಡ ಭಾರತಕ್ಕೆ ಬರಲಿದೆ. ಪಂದ್ಯವು ತಮ್ಮದೇ ದೇಶದಲ್ಲಿ ನಡೆಯಲಿರುವುದರಿಂದ ಭಾರತ ತಂಡಕ್ಕೆ ಇದು ಲಾಭದಾಯಕವೆಂದು ಇಂಗ್ಲೆಂಡ್ ತಂಡ ತಕರಾರು ತೆಗೆದಿದೆ.
ಸ್ಪಿನ್ ಬೌಲರ್ ಗಳಿಗೆ ಅನುಕೂಲವಾಗುವಂತಹ ಪಿಚ್ ತಯಾರಿಸಲಿರುವುದು ನಮಗೆ ತಿಳಿದಿರುವ ಕಾರಣ ಮೊದಲ ದಿನದಿಂದಲೇ ಚೆಂಡು ತಿರುಗಿದರೂ ನಾವು ಆ ಬಗ್ಗೆ ಭಾರತದ ವಿರುದ್ಧ ದೂರು ಕೊಡುವುದಿಲ್ಲ ಎಂದು ಇಂಗ್ಲೆಂಡ್ ತಂಡದ ಉಪನಾಯಕ ಒಲಿ ಪೋಪ್ ಹೇಳಿಕೆ ನೀಡಿದ್ದಾರೆ.
ಇಂಗ್ಲೆಂಡ್ ನಲ್ಲಿ ಸೀಮರ್ ಗಳಿಗೆ ಅನುಕೂಲವಾಗುವ ಪಿಚ್ ಹೊಂದಿದ್ದೇವೆ. ಹೀಗಿರುವಾಗ ಭಾರತ ಅವರ ಸ್ಪಿನ್ನರ್ ಗಳಿಗೆ ಸಹಕಾರಿಯಾಗುವಂತೆ ಟ್ರ್ಯಾಕ್ ನಿರ್ಮಿಸುವುದರಲ್ಲಿ ಆಶ್ಚರ್ಯವಿಲ್ಲ ಹಾಗು ನಾವು ಆ ಬಗ್ಗೆ ದೂರುವುದಿಲ್ಲ. ಇದರಿಂದಾಗಿ ನಮ್ಮ ರನ್ ಕಡಿಮೆಯಾಗಬಹುದು. ನಾವು ಅದಕ್ಕೆ ತಕ್ಕ ತಯಾರಿ ಮಾಡಿಕೊಳ್ಳಲಿದ್ದೇವೆ ಎಂದು ಪೋಪ್ ಹೇಳಿದ್ದಾರೆ.
ಪಂದ್ಯ ಶುರುವಾಗುವ ಮೊದಲೇ ಭಾರತದ ವಿರುದ್ಧ ದೂರು ಕೊಡುವುದಿಲ್ಲ ಎಂದು ಹೇಳುತ್ತ ಇಂಗ್ಲೆಂಡ್ ತಂಡ ಹೊಸ ತಗಾದೆ ತೆಗೆದಿದೆ. ಅವರ ಈ ಹೇಳಿಕೆಯಿಂದಾಗಿ ಇಂಗ್ಲೆಂಡ್-ಭಾರತ ತಂಡಗಳ ನಡುವೆ ರೋಚಕ ಪೈಪೋಟಿ ಏರ್ಪಡುವ ಸಾಧ್ಯತೆ ದಟ್ಟವಾಗಿದೆ.
ಜ.೨೫ರಿಂದ ಶುರುವಾಗಲಿರುವ ಟೆಸ್ಟ್ ಸರಣಿಯ ಮೊದಲ ಪಂದ್ಯ ಹೈದರಾಬಾದ್‌ ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಸ್ಟೇಡಿಯಂನಲ್ಲಿ ನಡೆಯಲಿದ್ದು, ಎರಡನೆಯ ಪಂದ್ಯವನ್ನು ವಿಶಾಖಪಟ್ಟಣಂನಲ್ಲಿರುವ ವೈಎಸ್ಆರ್ ಸ್ಟೇಡಿಯಂನಲ್ಲಿ ಆಯೋಜಿಸಲಾಗಿದೆ. ಮೂರನೇ ಪಂದ್ಯ ರಾಜ್ಕೋಟ್ ನ ಸೌರಾಷ್ಟ್ರ ಕ್ರಿಕೆಟ್ ಅಸೋಷಿಯೇಷನ್ ಸ್ಟೇಡಿಯಂನಲ್ಲಿ, ನಾಲ್ಕನೇ ಟೆಸ್ಟ್ ಪಂದ್ಯ ರಾಂಚಿಯ ಜೆಎಸ್ಸಿಎ ಸ್ಟೇಡಿಯಂನಲ್ಲಿ ಹಾಗು ಕೊನೆಯ ಟೆಸ್ಟ್ ಪಂದ್ಯ ಧರ್ಮಶಾಲಾದ ಹೆಚ್.ಪಿ.ಸಿ.ಎ ಸ್ಟೇಡಿಯಂನಲ್ಲಿ ಜರುಗಲಿದೆ.
