ನವದೆಹಲಿ: ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು ತಮ್ಮ ತಂದೆ ದಿವಂಗತ ರಾಜೀವ್ ಗಾಂಧಿ ಅವರ 78 ನೇ ಜನ್ಮದಿನಾಚರಣೆಯಂದು ವೀರಭೂಮಿಯಲ್ಲಿ ಶನಿವಾರ ಅವರಿಗೆ ಗೌರವ ನಮನ ಸಲ್ಲಿಸಿದರು.
ಹಿಂದಿಯಲ್ಲಿ ಟ್ವೀಟ್ ಮಾಡಿರುವ ರಾಹುಲ್ ಗಾಂಧಿ, “ಅಪ್ಪಾ ನೀವು ನನ್ನ ಹೃದಯದಲ್ಲಿ ಪ್ರತಿ ಬಾರಿಯೂ ನನ್ನೊಂದಿಗೆ ಇದ್ದೀರಿ, ನೀವು ಪ್ರೀತಿಸಿದ ರಾಷ್ಟ್ರದ ಕನಸುಗಳನ್ನು ನನಸು ಮಾಡಲು ನಾನು ಯಾವಾಗಲೂ ಪ್ರಯತ್ನಿಸುತ್ತೇನೆ” ಎಂದು ಹೇಳಿದ್ದಾರೆ.
ಏತನ್ಮಧ್ಯೆ, ಕಾಂಗ್ರೆಸ್ ಪಕ್ಷವು ತನ್ನ ಟ್ವಿಟ್ಟರ್ ಹ್ಯಾಂಡಲ್ನಲ್ಲಿ, “ಭಾರತದ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಅವರ ಜನ್ಮದಿನದಂದು ನಾವು ಅವರನ್ನು ಪ್ರೀತಿಯಿಂದ ಸ್ಮರಿಸುತ್ತೇವೆ. ’21ನೇ ಶತಮಾನದ ಭಾರತದ ವಾಸ್ತುಶಿಲ್ಪಿ’ ಎಂದು ಶ್ಲಾಘಿಸಲ್ಪಟ್ಟ ಅವರು, ತಮ್ಮ ದೂರದೃಷ್ಟಿಯ ಮೂಲಕವೇ ಭಾರತದಲ್ಲಿ ಮಾಹಿತಿ ತಂತ್ರಜ್ಞಾನ ಮತ್ತು ದೂರಸಂಪರ್ಕ ಕ್ರಾಂತಿಗೆ ನಾಂದಿ ಹಾಡಿದರು. ಇಂದು, ನಾವು ಅವರ ಪರಂಪರೆಯನ್ನು ಆಚರಿಸುತ್ತೇವೆ.”
ಈ ಸಂದರ್ಭದಲ್ಲಿ ಯುವ ಕಾಂಗ್ರೆಸ್ (ಐವೈಸಿ) ದಿವಂಗತ ಪ್ರಧಾನ ಮಂತ್ರಿಯವರ ಕಾರ್ಯಗಳನ್ನು ಎತ್ತಿ ತೋರಿಸಲು ತಾಲ್ಕಟೋರಾ ಕ್ರೀಡಾಂಗಣದಲ್ಲಿ ಕಾರ್ಯಕ್ರಮವನ್ನು ಆಯೋಜಿಸಲಿದೆ.
ಐವೈಸಿ ಅಧ್ಯಕ್ಷ ಶ್ರೀನಿವಾಸ್ ಬಿ.ವಿ. ಮಾತನಾಡಿ, “ರಾಜೀವ್ ಗಾಂಧಿ ಆಧುನಿಕ ಭಾರತದ ಶಿಲ್ಪಿಯಾಗಿದ್ದು, ಅವರು ಸದೃಢ ಮತ್ತು ಸ್ವಾವಲಂಬಿ ಭಾರತವನ್ನು ನಿರ್ಮಿಸಲು ಶ್ರಮಿಸಿದರು. ಅವರ ದೂರದೃಷ್ಟಿಯ ಪ್ರಯೋಜನಗಳನ್ನು ದೇಶವು ಇನ್ನೂ ಪಡೆಯುತ್ತಿದೆ. ಅವರ ದೂರದೃಷ್ಟಿಯೇ ಭಾರತವನ್ನು ಬಲಿಷ್ಠ, ಆಧುನಿಕ ರಾಷ್ಟ್ರಗಳ ಸಾಲಿಗೆ ಸೇರಿಸಿದೆ.
ಪಕ್ಷದ ಯುವ ಘಟಕವು ರಾಜೀವ್ ಗಾಂಧಿ ಅವರನ್ನು “ಮಾಹಿತಿ ತಂತ್ರಜ್ಞಾನ ಮತ್ತು ದೂರಸಂಪರ್ಕ ಕ್ರಾಂತಿಯ ಪಿತಾಮಹ” ಎಂದು ಕರೆದಿದೆ.
