ಹೊಸದಿಲ್ಲಿ: ಐಸಿಸ್ನ ನೇಮಕಾತಿ ಸ್ಥಳಗಳ ಮೇಲೆ ಎನ್ಐಎ ಶನಿವಾರ ತಮಿಳುನಾಡು ಮತ್ತು ತೆಲಂಗಾಣದ 31 ಸ್ಥಳಗಳಲ್ಲಿ ಶೋಧ ನಡೆಸಿದೆ. ಈ ಸಂಬಂಧ ಹಲವಾರು ಡಿಜಿಟಲ್ ಸಾಧನಗಳನ್ನು ವಶಪಡಿಸಿಕೊಂಡಿದೆ. ಅಲ್ಲದೆ 60 ಲಕ್ಷರೂ.ಗಳನ್ನು ವಶಕ್ಕೆ ಪಡೆದಿದೆ. ಶೋಧದ ವೇಳೆ ಮೊಬೈಲ್ ಫೋನ್ಗಳು, ಲ್ಯಾಪ್ಟಾಪ್ಗಳು ಮತ್ತು ಹಾರ್ಡ್ ಡಿಸ್ಕ್ಗಳಲ್ಲಿನ ಡೇಟಾವನ್ನು ಎನ್ಐಎ ಪರಿಶೀಲಿಸುತ್ತಿದೆ. ದಾಳಿ ವೇಳೆ ಅರೇಬಿಕ್ ಮತ್ತು ಸ್ಥಳೀಯ ಭಾಷೆಗಳಲ್ಲಿ ಹಲವಾರು ಪ್ರಚೋದನಾ ಪುಸ್ತಕಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಏತನ್ಮಧ್ಯೆ, ತಂಡವು ಚೆನ್ನೈ, ಕೊಯಮತ್ತೂರು ಮತ್ತು ತೆಂಕಶಿಯಲ್ಲಿರುವ ಕೆಲವು ಶಂಕಿತರ ನಿವಾಸಗಳ ಮೇಲೆ ದಾಳಿ ನಡೆಸಿದೆ. ಅಲ್ಲದೆ ಐಸಿಸ್ ನೇಮಕಾತಿಯಲ್ಲಿ ತೊಡಗಿದ್ದ ಕೆಲ ಶಂಕಿತರನ್ನು ತನ್ನ ಕಚೇರಿಗೆ ವಿಚಾರಣೆಗೆ ಬರುವಂತೆ ಎನ್ಐಎ ಸೂಚಿಸಿದೆ.
ಎನ್ಐಎ ತಂಡವು ಕೊಯಮತ್ತೂರಿನ 22 ಸ್ಥಳಗಳು, ಚೆನ್ನೈನ ಮೂರು ಮತ್ತು ತಮಿಳುನಾಡಿನ ತೆಂಕಶಿ ಜಿಲ್ಲೆಯ ಕಡಯನಲ್ಲೂರಿನ ಒಂದು ಸ್ಥಳಗಳಲ್ಲಿ ಮುಂಜಾನೆ ದಾಳಿ ನಡೆಸಿತು ಎಂದು ಎನ್ಐಎ ಅಧಿಕಾರಿ ತಿಳಿಸಿದ್ದಾರೆ.
ಹೈದರಾಬಾದ್ ಮತ್ತು ತೆಲಂಗಾಣದ ಸೈಬರಾಬಾದ್ನ ಐದು ಸ್ಥಳಗಳಲ್ಲಿಯೂ ಶೋಧ ನಡೆದಿದೆ. ಧಾರ್ಮಿಕ ಕೇಂದ್ರಗಳಲ್ಲಿ ಅರೇಬಿಕ್ ಭಾಷಾ ತರಗತಿ ನಡೆಸುವ ಸೋಗಿನಲ್ಲಿ ಭಯೋತ್ಪದನಾ ತರಬೇತಿ, ನೋಂದಣಿ ಪ್ರಕ್ರಿಯೆ ನಡೆಯುತ್ತಿತ್ತು. ಅಲ್ಲದೆ ಸಾಮಾಜಿಕ ಮಾಧ್ಯಮಗಳಾದ ವಾಟ್ಸಾಪ್ ಮತ್ತು ಟೆಲಿಗ್ರಾಮ್ನಂತಹಅಪ್ಲಿಕೇಶನ್ಗಳ ಮೂಲಕ ಆನ್ಲೈನ್ ಭಯೋತ್ಪದನಾ ಪ್ರಚಾರ ನಡೆಯುತ್ತಿತ್ತು. ಜಾತ್ಯತೀತತೆ ಮತ್ತು ಪ್ರಜಾಪ್ರಭುತ್ವದ ತತ್ವ “ವಿರೋಧಿ” ‘ಖಿಲಾಫತ್’ ಸಿದ್ಧಾಂತದ ಪ್ರಚಾರದಲ್ಲಿ ಐಸಿಸ್-ಪ್ರೇರಿತ ಏಜೆಂಟ್ ಪ್ರಚೋದಕರು ತೊಡಗಿಸಿಕೊಂಡಿದ್ದರು ಎಂದು NIA ಹೇಳಿದೆ.