ಹೊಸದಿಲ್ಲಿ: ದೇಶದಲ್ಲಿ ಭಾನುವಾರ 1.48 ಲಕ್ಷ ಹೊಸ ಸೋಂಕು ಪ್ರಕರಣಗಳು ವರದಿಯಾಗಿವೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ 18.9 ಲಕ್ಷವನ್ನು ದಾಟಿದ್ದು, ಸೋಂಕಿತರ ಸಾವಿನ ಸಂಖ್ಯೆ ಹೆಚ್ಚುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.ಕರ್ನಾಟಕ ರಾಜ್ಯದಲ್ಲಿ ದೇಶದಲ್ಲೇ ಅತ್ಯಧಿಕ ಅಂದರೆ 28,264 ಪ್ರಕರಣಗಳು ವರದಿಯಾಗಿವೆ.ಉಳಿದಂತೆ ಮಹಾರಾಷ್ಟ್ರ (22444) ಮತ್ತು ತಮಿಳುನಾಡು (22238) ನಂತರದ ಸ್ಥಾನಗಳಲ್ಲಿವೆ.
2020ರ ಜನವರಿ 30ರಂದು ದೇಶದ ಪ್ರಥಮ ಕೋವಿಡ್-19 ಸೋಂಕು ಪ್ರಕರಣಗಳ ವರದಿಯಾಗಿದ್ದು, ಎರಡು ವರ್ಷಗಳಲ್ಲಿ 4.1 ಕೋಟಿ ಮಂದಿಗೆ ಸೋಂಕು ತಗುಲಿದೆ.
ದೇಶದಲ್ಲಿ ಭಾನುವಾರ 404 ಸೋಂಕಿತರು ಮೃತಪಟ್ಟಿದ್ದು, ಇದು ಕಳೆದ ವಾರದ ಸರಾಸರಿಗಿಂತ ಅಧಿಕ. ದೇಶದಲ್ಲಿ ಸೋಂಕಿನಿಂದ ಮೃತಪಟ್ಟವರ ಒಟ್ಟು ಸಂಖ್ಯೆ 4,94,131 ಆಗಿದೆ. ಭಾನುವಾರ ಸಾವಿನ ಸಂಖ್ಯೆಯಲ್ಲೂ ಕರ್ನಾಟಕ ಅಗ್ರಸ್ಥಾನಿಯಾಗಿದೆ. ರಾಜ್ಯದಲ್ಲಿ 68 ಮಂದಿ ಸೋಂಕಿತರು ಮೃತಪಟ್ಟಿದ್ದರೆ, ಮಹಾರಾಷ್ಟ್ರ 50 ಹಾಗೂ ತಮಿಳುನಾಡು 38 ಸಾವು ಕಂಡಿವೆ.
ದೇಶದಲ್ಲಿ ಶನಿವಾರ 16.1 ಲಕ್ಷ ಕೋವಿಡ್ ಪರೀಕ್ಷೆ ನಡೆದಿದ್ದು, ಪಾಸಿಟಿವಿಟಿ ದರ ಶೇಕಡ 9.1ರಷ್ಟಿದೆ.
