ಹಬ್ಬದ ವೇಳೆ ಅಡುಗೆ ಎಣ್ಣೆಯ ದರ ಕಡಿಮೆ

ಖಾದ್ಯ ತೈಲ (ಅಡುಗೆ ಎಣ್ಣೆ) ಬೆಲೆ ಹೆಚ್ಚಳದ ಕುರಿತು ಕೈ ಹಿಸುಕಿಕೊಂಡಿರುವ ಮಹಿಳೆಯರಿಗೆ ಒಂದೊಳ್ಳೆಯ ಸುದ್ದಿ ಇದೆ. ಹಬ್ಬದ ವೇಳೆ ಅಡುಗೆ ಎಣ್ಣೆಯ ದರ ಕಡಿಮೆಯಾಗಲಿದೆ. ಇದಕ್ಕಾಗಿ ಕೇಂದ್ರ ಸರಕಾರ ಸಿದ್ಧತೆ ನಡೆಸುತ್ತಿದೆ.

ಕೇಂದ್ರ ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆ (ಡಿಎಫ್ ಪಿಡಿ) ಎಲ್ಲ ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳೊಂದಿಗೆ ಅ. 25ರಂದು ವಿಡಿಯೋ ಕಾನ್ಫರೆನ್ಸ್ ಮೂಲಕ ಸಭೆ ನಡೆಸಲಿದೆ. ಆಹಾರ ದರಗಳ ಮೇಲಿನ ಸಂಗ್ರಹ ಮಿತಿ ಆದೇಶದ ಮೇಲೆ ಕ್ರಮ ಪರಿಶೀಲಿಸುತ್ತದೆ.

ಇಲಾಖಾ ಕಾರ್ಯದರ್ಶಿ ಸುಧಾಂಶು ಪಾಂಡೆ ಎಲ್ಲ ರಾಜ್ಯಗಳಿಗೆ ಪತ್ರ ಬರೆದಿದ್ದಾರೆ. ಅದರಲ್ಲಿ ಗ್ರಾಹಕರ ಹೊರೆ ಇಳಿಸಲು ಖಾದ್ಯ ತೈಲಗಳ ಬೆಲೆ ಕಡಿಮೆ ಮಾಡಲು ಕೇಂದ್ರವು ಕೈಗೊಂಡಿರುವ ಕ್ರಮಗಳನ್ನು ವಿವರಿಸಿದೆ. ಜೊತೆಗೆ ಹಬ್ಬದ ಋತುವನ್ನು ಗಮನದಲ್ಲಿರಿಸಿಕೊಂಡು ಸಿದ್ಧತೆ ನಡೆಸಿದೆ.

ಡಿಎಫ್ ಪಿಡಿ ಖಾದ್ಯ ತೈಲಗಳ ಬೆಲೆ ಮತ್ತು ಗ್ರಾಹಕರಿಗೆ ಅವುಗಳ ಲಭ್ಯತೆಯನ್ನು ಮೇಲ್ವಿಚಾರಣೆ ಮಾಡುತ್ತಿದೆ. ಮುಂಬರುವ ಹಬ್ಬದ ಋತುವಿನಲ್ಲಿ ಖಾದ್ಯ ತೈಲಗಳಿಗೆ ಬೇಡಿಕೆ ಹೆಚ್ಚಾಗುವ ಸಂದರ್ಭದಲ್ಲಿ ಇದು ಮಹತ್ವ ಪಡೆದಿದೆ. ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಖಾದ್ಯ ತೈಲ ಉದ್ಯಮ ಸಂಘಗಳೊಂದಿಗಿನ ಸಂವಹನದ ಆಧಾರದ ಮೇಲೆ ದಾಸ್ತಾನು ಮಾಹಿತಿಯನ್ನು ಒದಗಿಸಲು ಅಧಿಸೂಚನೆ ಹೊರಡಿಸಲಾಗಿದೆ.