ನವದೆಹಲಿ : ಭಾರತದ ಕೋವಿಶೀಲ್ಡ್ ಲಸಿಕೆ ಪಡೆದವರಿಗೆ, ಯೂರೋಪಿನ 9 ದೇಶಗಳು – ಆಸ್ಟ್ರಿಯಾ, ಜರ್ಮನಿ, ಸ್ಲೊವೇನಿಯಾ, ಗ್ರೀಸ್, ಐಸ್ಲ್ಯಾಂಡ್, ಐರ್ಲೆಂಡ್, ಸ್ಪೇನ್, ಎಸ್ಟೋನಿಯಾ ಮತ್ತು ಸ್ವಿಟ್ಜರ್ಲೆಂಡ್ – ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡುವ ಗ್ರೀನ್ ಪಾಸ್ ನೀಡಿವೆ. ಈ ದೇಶಗಳಿಗೆ ಭೇಟಿ ನೀಡುವ ಭಾರತೀಯರು ಕೋವಿಶೀಲ್ಡ್ ಲಸಿಕೆ ಪಡೆದಿದ್ದಲ್ಲಿ ಕ್ವಾರಂಟೈನ್ಗೆ ಒಳಗಾಗುವ ಅವಶ್ಯಕತೆ ಇರುವುದಿಲ್ಲ.
ಆದಾಗ್ಯೂ ಭಾರತೀಯ ಲಸಿಕೆಗಳಾದ ಕೋವಿಶೀಲ್ಡ್ ಮತ್ತು ಕೋವಾಕ್ಸಿನ್ಗೆ ಯೂರೋಪಿಯನ್ ಒಕ್ಕೂಟದ ಉನ್ನತ ವೈದ್ಯಕೀಯ ಸಂಸ್ಥೆ ಯುರೋಪಿಯನ್ ಮೆಡಿಸಿನ್ಸ್ ಏಜೆನ್ಸಿ(ಇಎಂಎ)ಯ ಅನುಮೋದನೆ ಇನ್ನೂ ಸಿಕ್ಕಿಲ್ಲ. ಇಎಂಎ ಈವರೆಗೆ ನಾಲ್ಕೇ ಲಸಿಕೆಗಳನ್ನು ಅನುಮೋದಿಸಿರುವುದು. ಅವುಗಳೆಂದರೆ ಫೈಜರ್ ಬಯೋಎನ್ಟೆಕ್ನ ಕೋಮಿರ್ನಾಟಿ, ಅಮೆರಿಕದ ಮಾಡರ್ನದ ಕೋವಿಡ್ ಲಸಿಕೆ, ಯೂರೋಪಿನಲ್ಲಿ ಉತ್ಪಾದನೆಯಾಗುವ ಆಸ್ಟ್ರಾಜೆನೆಕಾದ ವಾಕ್ಸ್ಜೆರ್ವ್ರಿಯ ಮತ್ತು ಜಾನ್ಸನ್ ಅಂಡ್ ಜಾನ್ಸನ್ನ ಜ್ಯಾನ್ಸೆನ್ ಲಸಿಕೆಗಳು. ಈ ನಾಲ್ಕು ಲಸಿಕೆಗಳಲ್ಲಿ ಯಾವುದಾದರೂ ಒಂದನ್ನು ಪಡೆದವರಿಗೆ ಮಾತ್ರ ಯೂರೋಪಿನಲ್ಲಿ ಸುಗಮ ಸಂಚಾರಕ್ಕೆ ಅವಕಾಶ ಒದಗಿಸುವ ವ್ಯಾಕ್ಸಿನೇಷನ್ ಪಾಸ್ಪೋರ್ಟ್ಗಳನ್ನು ನೀಡಲಾಗಿದೆ. ಆಸ್ಟ್ರಜೆನೆಕಾದ ಲಸಿಕೆಯನ್ನೇ ಆಕ್ಸ್ಫರ್ಡ್ ಯೂನಿವರ್ಸಿಟಿ ಸಹಯೋಗದಲ್ಲಿ ಭಾರತದಲ್ಲಿ ಉತ್ಪಾದಿಸುತ್ತಿರುವ ಸೀರಮ್ ಇನ್ಸ್ಟಿಟ್ಯೂಟಿನ ಕೋವಿಶೀಲ್ಡ್ಗೆ ಇಎಂಎ ಅನುಮೋದನೆ ನೀಡಿಲ್ಲ. ಆದರೆ ಸದಸ್ಯ ರಾಷ್ಟ್ರಗಳು ಬೇರೆ ಲಸಿಕೆಗಳನ್ನು ಪಡೆದವರಿಗೆ ಈ ಸೌಲಭ್ಯವನ್ನು ವಿಸ್ತರಿಸಬಹುದಾಗಿದ್ದು, ಇದೀಗ 9 ರಾಷ್ಟ್ರಗಳು ಕೋವಿಶೀಲ್ಡ್ಗೆ ತಮ್ಮ ಮಾನ್ಯತೆಯನ್ನು ನೀಡಿವೆ.
