ನಿನ್ನೆ ಪುರುಷರ ಜಾವೆಲಿನ್ ಥ್ರೋ ಅರ್ಹತಾ ಸುತ್ತಿನಲ್ಲಿ 89.34 ಮೀಟರ್ ಎಸೆದ ನೀರಜ್ ಚೋಪ್ರಾ, ನೇರವಾಗಿ ಫೈನಲ್ಗೆ ಪ್ರವೇಶಿಸಿದ್ದಾರೆ. ಪ್ಯಾರಿಸ್ನಲ್ಲಿ ನಾಳೆ ಆಗಸ್ಟ್ 8ರಂದು ಜಾವಲಿನ್ ಫೈನಲ್ ಪಂದ್ಯ ನಡೆಯಲಿದೆ.
ಗುರುವಾರ ನೀರಜ್ ಚೋಪ್ರಾ ಫೈನಲ್ನಲ್ಲಿ ಗೆದ್ದು ಪದಕ ಗೆಲ್ಲುವ ನಿರೀಕ್ಷೆ ಹೆಚ್ಚಾಗಿದೆ. ನೀರಜ್ ಚೋಪ್ರಾ ಅವರು ಕಳೆದ ಬಾರಿಯಂತೆ ಈ ಬಾರಿಯೂ ಚಿನ್ನದ ಪದಕ ಗೆದ್ದು ಬರಲಿ ಅನ್ನೋ ಶುಭ ಹಾರೈಕೆ ಹೆಚ್ಚಾಗಿದೆ.
ನೀರಜ್ ಚೋಪ್ರಾಗೆ ಫೈನಲ್ನಲ್ಲಿ 11 ಜನ ಎದುರಾಳಿಗೆ ಸಿಗಲಿದ್ದಾರೆ. ಜೆ. ವಡ್ಲೆಜ್ಚ್, ಎ. ಪೀಟರ್ಸ್, ಕೆ. ವಾಲ್ಕಾಟ್, ಎ. ನದೀಮ್, ಜೆ. ವೆಬರ್, ಜೆ. ಯೆಗೊ, ಎಲ್. ಎಟೆಲಾಟಾಲೊ, ಎ. ಮರ್ದಾರೆ, ಹೆಲ್ಯಾಂಡರ್, ಎಲ್.ಎಂ.ಡಾ ಸಿಲ್ವಾ, T. ಕೆರಾನೆನ್ ನಾಳಿನ ಫೈನಲ್ನಲ್ಲಿ ಚೋಪ್ರಾಗೆ ಎದುರಾಳಿಗಳಾಗಿದ್ದಾರೆ. ಇವರೆಲ್ಲರನ್ನು ದಾಟಿ ನೀರಜ್ ಚಿನ್ನದ ಮುತ್ತಿಡುವ ನಿರೀಕ್ಷೆ ಇದೆ.
ಚಿನ್ನದ ಪದಕ ಗೆಲ್ಲುವ ಭಾರತ ಪುರುಷರ ಹಾಕಿ ತಂಡದ ಕನಸು ಭಗ್ನವಾಗಿದೆ. ಸೆಮಿಫೈನಲ್ ಪಂದ್ಯದಲ್ಲಿ ಕಠಿಣ ಹೋರಾಟ ನಡೆಸಿದ ಹೊರತಾಗಿಯೂ ಭಾರತ ತಂಡ 2-3 ಅಂತರದಲ್ಲಿ ಜರ್ಮನಿ ವಿರುದ್ಧ ಸೋಲು ಅನುಭವಿಸಿತು. ಇದೀಗ ಭಾರತ ತಂಡ ನಾಳೆ ಕಂಚಿನ ಪದಕಕ್ಕಾಗಿ ಸ್ಪೇನ್ ವಿರುದ್ಧ ಕಾದಾಟ ನಡೆಸಲಿದೆ.