ಸರಗೂರಿನಲ್ಲಿ ಶ್ರೀ ಚೌಡೇಶ್ವರಿ ಅಮ್ಮನವರ ಪೂಜಾ ಮಹೋತ್ಸವ

ಸರಗೂರು: ಸರಗೂರು ಪಟ್ಟಣದ 10ನೇ ವಾರ್ಡ್ ನಲ್ಲಿ ನೇಕಾರ ತೊಗಟವೀರ ಕ್ಷತ್ರಿಯ ಸಮಾಜದ ವತಿಯಿಂದ ಶ್ರೀ ಚೌಡೇಶ್ವರಿ ಅಮ್ಮನವರ 83 ನೇ ಜ್ಯೋತಿ ಪೂಜಾ ಮಹೋತ್ಸವವು ಶ್ರದ್ಧಾಭಕ್ತಿಯಿಂದ ಅದ್ಧೂರಿಯಾಗಿ ನೆರವೇರಿತು.

ಬುಧವಾರದಿಂದ ಆರಂಭಗೊಂಡಿರುವ ಪೂಜಾ ಮಹೋತ್ಸವ ಮೇ.28ರವರೆಗೆ ನಡೆಯಲಿದೆ. ಶ್ರೀ ದಿವ್ಯ ಜ್ಞಾನಾನಂದ ಗಿರಿ ಸ್ವಾಮೀಜಿಯವರ ಕೃಪಾಶೀರ್ವಾದೊಂದಿಗೆ ದೇವಸ್ಥಾನ ವನ್ನು ಹಾಗೂ ಇಲ್ಲಿನ ಜನಾಂಗದವರ ಬೀದಿಗಳಲ್ಲಿ ತಳಿರು ತೋರಣಗಳಿಂದ, ರಂಗೋಲಿ ಬಿಡಿಸಿ ಬಣ್ಣ ಬಣ್ಣದ ವಿದ್ಯುತ್ ದೀಪಗಳಿಂದ ಅಲಂಕಾರ ಮಾಡಲಾಗಿತ್ತಲ್ಲದೆ, ಪೂಜಾ ದೇವಸ್ಥಾನವನ್ನು ವಿವಿಧ ಹೂಗಳಿಂದ ಅಲಂಕರಿಸಲಾಗಿದ್ದು, ಬುಧವಾರ ಪುನರ್ವಸು ನಕ್ಷತ್ರ ಪ್ರಾಂತಕಾಲ 5ಕ್ಕೆ ಪುಣ್ಯಾಹ, ನಾಂದಿ ಕಳಸ ಸ್ಥಾಪನೆ ಶ್ರೀ ಗಣಪತಿ ಪೂಜೆ, ನವಗ್ರಹೋಮ ಮತ್ತು ದುರ್ಗಾ ಹೋಮ, ನಂತರ ಶ್ರೀ ಚೌಡೇಶ್ವರಿ ಅಮ್ಮನವರಿಗೆ ಪಂಚಾಮೃತ ಅಭಿಷೇಕ, ಲಲಿತ ಸಹಸ್ರನಾಮ ಕುಂಕುಮಾರ್ಚನೆ, ತಾಯಿಗೆ ಪೂರ್ಣಾಹುತಿಯೊಂದಿಗೆ ಮಹಾಮಂಗಳಾರತಿ ಮಾಡಲಾಯಿತು.

ಆ ನಂತರ ಬೆಳಿಗ್ಗೆ 10:30 ಗಂಟೆಗೆ ಶ್ರೀ ಚೌಡೇಶ್ವರಿ ಅಮ್ಮನವರ ಹೂವಿನ ಪಲ್ಲಕ್ಕಿ ಉತ್ಸವವನ್ನು ಕುಲಬಾಂಧವರು ಸೇರಿ ಜ್ಯೋತಿ ಸಮೇತವಾಗಿ ಮಂಗಳ ವಾದ್ಯ ದೊಡನೆ ಕಪಿಲಾ ನದಿ ದಡಕ್ಕೆ ತೆರಳಿ ಪೂಜಾ ವಿಧಿ ವಿಧಾನಗಳನ್ನು ನೆರವೇರಿಸಿ, ಶ್ರೀ ಚೌಡೇಶ್ವರಿ ಅಮ್ಮನವರ ಉತ್ಸವದ ಮುಂದೆ ಸದ್ಭಕ್ತರು ಹರಕೆಯ ಬಾಯಿ ಬೀಗ, ಮತ್ತು ಅಲಗು ಸೇವೆ ಮಾಡಿ ದೇವಿಗೆ ಹರಕೆ ಅರ್ಪಿಸಿದರು.

ಜ್ಯೋತಿಯ ಮುಂದೆ ಭಜನಾ ಮಂಡಳಿಯವರು ಸ್ತೋತ್ರ ಪಠಣ ಖಡ್ಗ ಸ್ತೋತ್ರ ಭಜನೆ ಪಠಣ ಮಾಡಿದರೆ, ಮುತ್ತೈದೆಯರು ಹೆಣ್ಣು ಮಕ್ಕಳು ಕಳಸ ಹೊತ್ತು ಉತ್ಸವದ ಮುಂದೆ ಸಾಗಿದರಲ್ಲದೆ, ಸಮಾಜದವರಿಂದ ಮಜ್ಜಿಗೆ, ತಂಪು ಪಾನಿಯ ಹಾಗೂ ಸಿಹಿ ಹಂಚಿದರು. ಶ್ರೀ ಚೌಡೇಶ್ವರಿ ಅಮ್ಮನವರ ಪಲ್ಲಕ್ಕಿ ಉತ್ಸವವು ದೇವಸ್ಥಾನಕ್ಕೆ ಬಂದು ತಲುಪಿದ ನಂತರ ಮಹಾಮಂಗಳಾರತಿ ತೀರ್ಥ ಪ್ರಸಾದ ವಿನಿಯೋಗ ಮಾಡಲಾಯಿತು. ನೆರೆದ ಸಾವಿರಾರು ಭಕ್ತರಿಗೆಗಜಾನನ ಗೆಳೆಯರ ಬಳಗದವರು ಅನ್ನ ಸಂತರ್ಪಣೆ ನೆರವೇರಿಸಿದರು.