ಮೈಸೂರು: ತುತ್ತೂರಿ ಬಳಕೆಗೆ ನಿರ್ಬಂಧ ಹೇರಿದೆ ಪೊಲೀಸ್ ಇಲಾಖೆ

ಮೈಸೂರು: ಮೈಸೂರು ದಸರಾದಲ್ಲಿ ಬಹಳಷ್ಟು ಮಂದಿಗೆ ಕಿರಿಕಿರಿಯನ್ನುಂಟು ಮಾಡುತ್ತಿದ್ದ ಆಟದ ತುತ್ತೂರಿ(ವುವುಜೆಲಾ) ಮೇಲೆ ಈ ಬಾರಿ ಪೊಲೀಸ್ ಇಲಾಖೆ ನಿರ್ಬಂಧ ಹೇರಿದೆ. ಇದರಿಂದ ಜನ ನೆಮ್ಮದಿಯಾಗಿ ಓಡಾಡುವಂತಾಗಲಿದೆ.

ಈ ತುತ್ತೂರಿಯನ್ನು ಮಕ್ಕಳಿಗಿಂತ ಹೆಚ್ಚಾಗಿ ಪುಂಡರೇ ಬಳಸುತ್ತಿದ್ದರಲ್ಲದೆ, ಜನಸಂದಣಿ ಸ್ಥಳಗಳಾದ ವಸ್ತುಪ್ರದರ್ಶನ, ಜಂಬೂಸವಾರಿ, ಆಹಾರಮೇಳ ಸೇರಿದಂತೆ ರಸ್ತೆಗಳಲ್ಲಿ ಇದನ್ನು ಊದುತ್ತಾ ಕಿರಿಕಿರಿ ಮಾಡುತ್ತಿದ್ದರು. ಇಷ್ಟೇ ಅಲ್ಲದೆ, ಹೆಣ್ಣು ಮಕ್ಕಳ ಬಳಿ ತೆರಳಿ ಬೇಕಂತಲೇ ಊದಿ ಹಿಂಸೆ ನೀಡುತ್ತಿದ್ದರು. ಇದರ ಬಗ್ಗೆ ದೂರದಿಂದ ಬರುವ ಪ್ರವಾಸಿಗರು ಮತ್ತು ಸಾರ್ವಜನಿಕರು ತಮ್ಮ ಅಸಮಾಧಾನಗಳನ್ನು ಹೊರ ಹಾಕಿದ್ದರು.

ನವರಾತ್ರಿ ವೇಳೆ ನಗರದ ಬೀದಿಗಳಲ್ಲಿ ದಸರಾ ಲೈಟ್ ಗಳನ್ನು ವೀಕ್ಷಿಸಲು ಮತ್ತು ಜನಸಂದಣಿ ಪ್ರದೇಶಗಳಲ್ಲಿ ತೆರಳುವಾಗ ಕೆಲವರು ಜೋರಾಗಿ ಊದುತ್ತಾ ಹಿಂಸೆ ನೀಡುತ್ತಿದ್ದರು.ಇದನ್ನು ಮಾರಾಟ ಮಾಡುವವರು ಜನಸಂದಣಿ ಇರುವ ಜಾಗವನ್ನೇ ಹುಡುಕಿಕೊಂಡು ಬಂದು ಮಾರಾಟ ಮಾಡುತ್ತಿದ್ದರು. ತುತ್ತೂರಿಯಿಂದಾಗುತ್ತಿರುವ ಕಿರಿಕಿರಿಯನ್ನು ಮನಗಂಡ ನಗರ ಪೊಲೀಸ್ ಆಯುಕ್ತರಾದ ಡಾ. ಚಂದ್ರಗುಪ್ತ ಅವರು ಕಠಿಣ ಕ್ರಮ ಕೈಗೊಂಡಿದ್ದು, ಜನರ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.

ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ನಗರ ಪೊಲೀಸ್ ಆಯುಕ್ತರಾದ ಡಾ.ಚಂದ್ರಗುಪ್ತ ಅವರು ಮೈಸೂರು ನಗರ ಘಟಕ ವ್ಯಾಪ್ತಿಯ ಸಾರ್ವಜನಿಕ ರಸ್ತೆ ಮತ್ತು ಸ್ಥಳಗಳಲ್ಲಿ ಓಡಾಡುವ ಸಾರ್ವಜನಿಕರಿಗೆ ಹಾಗೂ ಪ್ರವಾಸಿಗರಿಗೆ ವುವುಜೆಲಾ (ತುತ್ತೂರಿ) ಊದಿ ಕಿರಿಕಿರಿ ಉಂಟು ಮಾಡುತ್ತಿರುವುದು ಗಮನಕ್ಕೆ ಬಂದಿರುತ್ತದೆ. ಆದ್ದರಿಂದ ವುವುಜೆಲಾ (ತುತ್ತೂರಿ) ಮಾರಾಟ ಮಾಡುವುದನ್ನು ಮತ್ತು ಬಳಸುವುದನ್ನು ನಿಷೇಧಿಸಿ ಆದೇಶಿಸಲಾಗಿದೆ. ಈ ಆದೇಶವನ್ನು ಉಲ್ಲಂಘಿಸಿದವರ ವಿರುದ್ಧ ಕಾನೂನಿನ ಅನ್ವಯ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ.

ಈ ಆದೇಶವನ್ನು ಉಲ್ಲಂಘಿಸಿ ತುತ್ತೂರಿಯನ್ನು ಮಾರಾಟ ಮಾಡುವುದಾಗಲೀ ಅಥವಾ ತುತ್ತೂರಿ ಊದಿ ಕಿರಿಕಿರಿ ಮಾಡುವುದಾಗಲೀ ಮಾಡಿದರೆ ಅಂತಹವರ ವಿರುದ್ಧ ಪೊಲೀಸರಿಗೆ ದೂರು ನೀಡಬಹುದಾಗಿದೆ. ಪೊಲೀಸ್ ಇಲಾಖೆಯ ಕ್ರಮದಿಂದಾಗಿ ಈ ಬಾರಿ ಜನ ನೆಮ್ಮದಿಯಾಗಿ ನಗರದಲ್ಲಿ ಓಡಾಡಲು ಸಾಧ್ಯವಾಗಲಿದೆ.