ಮೈಸೂರು: ಪ್ರತಿಷ್ಠಿತ ಮಾನ್ಸೂನ್ ರೇಸ್ ಆರಂಭ

ಮೈಸೂರು: ಮೈಸೂರು ರೇಸ್ ಕ್ಲಬ್ ನಲ್ಲಿ  18 ದಿನಗಳ ಕಾಲ ಮಾನ್ಸೂನ್ ರೇಸ್ ಆರಂಭವಾಗಲಿದೆ ರೇಸ್  ಕ್ಲಬ್ ಅಧ್ಯಕ್ಷ ವೈ.ಬಿ.ಗಣೇಶ್ ಹೇಳಿದ್ದಾರೆ.

ಈ ಕುರಿತು ಮಾಹಿತಿ ನೀಡಿರುವ ಅವರು, ರೇಸ್ ಗೆ ಬೇಕಾದ ಸಕಲ ಸಿದ್ಧತೆಗಳನ್ನು ಮಾಡಲಾಗಿದ್ದು,. ಗುರುವಾರ ರೇಸ್‍ ಗೆ ಚಾಲನೆ ದೊರೆಯಲಿದೆ ಎಂದು ತಿಳಿಸಿದರು. ಆ.26, ಸೆ.2, 16, 24, ಅ.6, 7, 14, 29 ಹಾಗೂ ಅ.30ರಂದು ಪ್ರಮುಖ ರೇಸ್‌ಗಳು ನಡೆಯಲಿವೆ. ಈ ಹದಿನೆಂಟು ದಿನಗಳ ಅವಧಿಯಲ್ಲಿ 140 ರೇಸ್ ಗಳು ನಡೆಯಲಿವೆ ಎಂದು ತಿಳಿಸಿದರು. ಈ ಬಾರಿ ಪ್ರವೇಶ ದರವನ್ನು 100ನಿಂದ 200ಕ್ಕೆ ಏರಿಕೆ ಮಾಡಲಾಗಿದೆ.ರೇಸ್ ಗಾಗಿ ರೇಸಿಂಗ್ ಟ್ರ್ಯಾಕ್‌ಗಳನ್ನು ಸಿದ್ಧಗೊಳಿಸಲಾಗಿದ್ದು, ಮೈಸೂರು ರೇಸ್ ಕ್ಲಬ್‌ನ 460 ಕುದುರೆಗಳು, ಬೆಂಗಳೂರು ಚೆನ್ನೈ ವಿವಿಧ ಭಾಗದಿಂದ 200 ಕುದುರೆಗಳು ಭಾಗವಹಿಸಲಿವೆ ಎಂದು ತಿಳಿಸಿದರು.

ಗುಣಮಟ್ಟದ ರೇಸ್ ಸ್ಪರ್ಧೆ ನಡೆಸಲು ಅನುಕೂಲವಾಗುವಂತೆ ಕ್ಲಬ್‌ನ ಪಾಲಿನ ಹಣವನ್ನು (ಸ್ಟೇಕ್‌ಮನಿ) ಶೇ 49ರಷ್ಟು ಹೆಚ್ಚಿಸಲಾಗಿದೆ. ಕ್ಲಬ್‌ನ ಬುಕ್‌ ಮೇಕರ್ಸ್, ಜಯಚಾಮರಾಜೇಂದ್ರ ಗಾಲ್ಫ್ ಕ್ಲಬ್ ರೇಸ್ ಪ್ರಾಯೋಜಿಸಲು ಮುಂದಾಗಿದ್ದು, ಪ್ರಸಕ್ತ ಋತುವಿನಲ್ಲಿ 8 ಕೋಟಿ ಹಣ ವೆಚ್ಚವಾಗುವ ಅಂದಾಜಿದೆ ಎಂದರು. ಈಗಾಗಲೇ ರೇಸ್ ಕ್ಲಬ್‌ಗೆ ತೆರಿಗೆಯ ಹೊರೆ ಹೆಚ್ಚಿರುವುದರಿಂದ ಕ್ಲಬ್ ವಹಿವಾಟು ಸುಮಾರು 500 ಕೋಟಿಯಿಂದ 180 ಕೋಟಿಗೆ ಇಳಿದಿದೆ.

ಯೂನಿಟ್ ಬದಲು ಕಮಿಷನ್ ಮೇಲೆ ಜಿಎಸ್‌ಟಿ ವಿಧಿಸುವಂತೆ ಜಿಎಸ್‌ಟಿ ಮಂಡಳಿಗೆ ಮನವಿ ಮಾಡಲಾಗಿದೆ. ಲ್ಯಾಟರಿ, ಕ್ಯಾಸಿನೊ, ರೇಸ್ ಅನ್ನು ಒಂದೇ ದೃಷ್ಟಿಕೋನದಲ್ಲಿ  ನೋಡದೆ ರೇಸ್ ಕೌಶಲದ ಆಟವಾಗಿ ಪರಿಗಣಿಸಬೇಕು. ತೆರಿಗೆ ಕಡಿಮೆಗೊಳಿಸಬೇಕಿದೆ ಎಂದು ಇದೇ ವೇಳೆ ಅವರು ಸರ್ಕಾರಕ್ಕೆ ಮನವಿ ಮಾಡಿದರು.

ಸುದ್ದಿಗೋಷ್ಠಿಯಲ್ಲಿ ಕ್ಲಬ್‌ನ ಬಿ.ಯು.ಚಂಗಪ್ಪ, ಎಚ್.ಕೆ.ರಮೇಶ್, ಕೆ.ಎಂ.ಚಂದ್ರೇಗೌಡ, ಎನ್‌ಎಚ್‌ಎಸ್ ಮಣಿ, ಕೆ.ವಿ.ಪರೀಕ್ಷಿತ್, ಅಜಿತ್ ಕುಮಾರ್ ರಾಜೇ ಅರಸ್  ಮೊದಲಾದವರು ಇದ್ದು ಮಾಹಿತಿ ನೀಡಿದರು.