ಕಳಪೆ ಬಿತ್ತನೆ ಬೀಜ ವಿತರಣೆ: ಅಂಗಡಿ ವಿರುದ್ಧ ಕ್ರಮಕ್ಕೆ ಆಗ್ರಹ

ಗುಂಡ್ಲುಪೇಟೆ: ಜಮೀನಿನಲ್ಲಿ ಮುಸುಕಿನ ಜೋಳದ ಬೀಜವನ್ನು ಬಿತ್ತನೆ ಮಾಡಿ 15 ದಿನ ಕಳೆದರೂ ಸಮರ್ಪಕವಾಗಿ ಮೊಳಕೆಯೊಡೆಯದ ಹಿನ್ನೆಲೆ ರೈತ ಕುಮಾರ್ ಆಕ್ರೋಶ ಹೊರ ಹಾಕಿ, ಕಳಪೆ ಬಿತ್ತನೆ ಬೀಜ ವಿತರಣೆ ಮಾಡಿರುವ ಅಂಗಡಿ ಹಾಗು ಕಂಪನಿ ವಿರುದ್ಧ ಕ್ರಮ ಜರುಗಿಸಬೇಕೆಂದು ಒತ್ತಾಯಿಸಿದ್ದಾರೆ.

ದುಂದಾಸನಪುರ ಗ್ರಾಮದ ರೈತ ಕುಮಾರ್ ಗುಂಡ್ಲುಪೇಟೆ ಪಟ್ಟಣದಲ್ಲಿರುವ ಸಿದ್ದಮಲ್ಲೇಶ್ವರ ಟ್ರೇಡರ್ಸ್ ನಲ್ಲಿ ಹಾಸನ ಮೂಲದ ದುರ್ಗಾ ಅಗ್ರಿಟೆಕ್ ಎಂಬುವರಿಂದ ಸರಬರಾಜಾಗಿರುವ ಮುಸುಕಿನ ಜೋಳದ ವಿರಾಟ್ 495 ಎಂಬ ಬಿತ್ತನೆ ಬೀಜವನ್ನು ಖರೀದಿಸಿ ಬಿತ್ತನೆ ಮಾಡಿದ್ದಾರೆ. ಆದರೆ ಬಿತ್ತನೆ ಮಾಡಿ ಎರಡು ವಾರ ಕಳೆದರೂ ಸಹ ಮೊಳಕೆಯೊಡೆದಿಲ್ಲ. ಇದರಿಂದ ಸಾವಿರಾರು ರೂ. ಖರ್ಚು ಮಾಡಿ ಮುಕ್ಕಾಲು ಎಕರೆ ಜಮೀನು ಹದಗೊಳಿಸಿ ಬಿತ್ತನೆ ಮಾಡಿದ್ದ ರೈತನಿಗೆ ತೀವ್ರ ನಷ್ಟ ಉಂಟಾಗಿದೆ.

ಕಳಪೆ ಮುಸುಕಿನ ಜೋಳ ಬಿತ್ತನೆ ಬೀಜ ಮಾರಾಟ ಮಾಡಿರುವ ಗುಂಡ್ಲುಪೇಟೆ ಪಟ್ಟಣದ ಸಿದ್ದಮಲ್ಲೇಶ್ವರ ಟ್ರೇಡರ್ಸ್ ಮಾಲೀಕರನ್ನು ಕೇಳಿದರೆ ಉಢಾಫೆ ಉತ್ತರ ನೀಡುತ್ತಿದ್ದಾರೆ. ಆದ್ದರಿಂದ ಕಳಪೆ ಬಿತ್ತನೆ ಬೀಜ ಮಾರಾಟ ಮಾಡಿ ಮೋಸ ಮಾಡಿರುವ ಸಿದ್ದಮಲ್ಲೇಶ್ವರ ಟ್ರೇಡರ್ಸ್ ಹಾಗೂ ಸರಬರಾಜು ಮಾಡಿರುವ ಕಂಪನಿ ವಿರುದ್ಧ ಸಂಬಂಧಪಟ್ಟ ಕೃಷಿ ಇಲಾಖೆ ಅಧಿಕಾರಿಗಳು ಕ್ರಮ ವಹಿಸಿ ಮುಂದಿನ ದಿನಗಳಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ಎಚ್ಚರಿಕೆ ವಹಿಸಬೇಕೆಂದು ರೈತ ಕುಮಾರ್ ಒತ್ತಾಯಿಸಿದ್ದಾರೆ.