ಉಡುಪಿ: ಜುಲೈ ತಿಂಗಳಿನಲ್ಲಿ ಸುರಿದ ಭಾರೀ ಗಾಳಿಮಳೆಗೆ ಪ್ರಕ್ಷುಬ್ಧಗೊಂಡಿದ್ದ ಕಡಲು, ಮಾನವ ಎಸೆದ ಟನ್ ಗಟ್ಟಲೆ ಪ್ಲಾಸ್ಟಿಕ್ ಮತ್ತಿತರ ತ್ಯಾಜ್ಯಗಳನ್ನು ಕಿನಾರೆಯತ್ತ ಹೊರಹಾಕಿದೆ. ಇದರ ಪರಿಣಾಮ ಮಲ್ಪೆ ಬೀಚ್ ನಲ್ಲೀಗ ಎಲ್ಲಿ ಕಣ್ಣು ಹಾಯಿಸಿದರೂ ತ್ಯಾಜ್ಯಗಳ ರಾಶಿಯೇ ಗೋಚರಿಸುತ್ತಿದೆ.
ಕಡಲ ಕಿನಾರೆಯುದ್ದಕ್ಕೂ ಸಾವಿರಾರು ಮದ್ಯದ ಬಾಟಲಿಗಳು, ಪ್ಲಾಸ್ಟಿಕ್ ಬಾಟಲಿಗಳು, ತೆಂಗು, ಅಡಕೆ ಮರದ ತುಂಡುಗಳು, ಚಪ್ಪಲಿಗಳು, ಪ್ಲಾಸ್ಟಿಕ್ ಲೋಟಗಳು, ಒಡೆದ ಗ್ಲಾಸ್ ಚೂರುಗಳು ಸೇರಿದಂತೆ ನೂರಾರು ಟನ್ ತ್ಯಾಜ್ಯಗಳು ಕಡಲಗರ್ಭದೊಳಗೆ ಸೇರಿ ಈಗ ದಡ ಸೇರಿವೆ. ಕಿಲೋಮೀಟರ್ ದೂರದಷ್ಟು ಉದ್ದಗಲಕ್ಕೂ ತ್ಯಾಜ್ಯದ ರಾಶಿಗಳು ಬಂದು ಬಿದ್ದಿವೆ. ಎಲ್ಲಿ ನೋಡಿದರೂ ತ್ಯಾಜ್ಯ ತ್ಯಾಜ್ಯ. ಸದ್ಯ ಬೀಚ್ ಗೆ ಬಂದ ಪ್ರವಾಸಿಗರಿಗೆ ನೀರಿಗಿಳಿಯಲು ಅನುಮತಿ ಇಲ್ಲ. ಬಂದವರು ಈ ತ್ಯಾಜ್ಯ ರಾಶಿ ನೋಡಿ ಬೆಚ್ಚಿ ಬೀಳುತ್ತಿದ್ದಾರೆ.
