ಬೆಳ್ತಂಗಡಿ: ನದಿಯಾದ ರಾಷ್ಟ್ರೀಯ ಹೆದ್ದಾರಿ

ಬೆಳ್ತಂಗಡಿ: ಜೂ.2 ರಂದು ಗುರುವಾರ ಮಧ್ಯಾಹ್ನ ಬೆಳ್ತಂಗಡಿ ಯಲ್ಲಿ ಉತ್ತಮ‌ ಮಳೆಯಾಗಿದ್ದು ಈ ವೇಳೆ ಗುರುವಾಯನಕೆರೆ ಪೇಟೆ ಸನಿಹದ ಬಂಟರ ಭವನದ ಎದುರಿನ ರಾಷ್ಟ್ರೀಯ ಹೆದ್ದಾರಿಯ ಮೇಲೆ ಮಳೆನೀರು ಹರಿದು ಕೃತಕ ನದಿಯಂತೆ ಕಂಡು‌ಬಂತು.

ಗುರುವಾಯನಕೆರೆ ಪೇಟೆಯಿಂದ ಹರಿದು ಬಂದ ನೀರು‌ ಪಕ್ಕದ ತೋಡಿಗೆ ಸೇರಿಕೊಳ್ಳಲು ಮಾರ್ಗವಿಲ್ಲದೆ ನೇರವಾಗಿ ಹೆದ್ದಾರಿ ಮೇಲೆ ಹರಿದು ಬಂಟರ ಭವನದ ಬಳಿಯ ತಗ್ಗು ಪ್ರದೇಶದಲ್ಲಿ ಶೇಖರಣೆಗೊಂಡಿತು.
ಇಲ್ಲೇ ಪಕ್ಕದಲ್ಲಿ ವಾಣಿಜ್ಯ ಮಳಿಗೆ, ಹೊಟೇಲ್, ಕೋಳಿ ಅಂಗಡಿ ಇತ್ಯಾದಿ ವ್ಯಾಪಾರ ಕೇಂದ್ರಗಳಿದ್ದು, ರಸ್ತೆ ಮೇಲೆ‌ ವಾಹನ ಸಂಚರಿಸುವಾಗ ಎಲ್ಲರಿಗೂ ಕೆಸರು ನೀರಿನ‌‌ ಸಿಂಚನವಾಯಿತು.

ಇದು ಈ ವರ್ಷದ ಮೊದಲ ಅನುಭವವೇನೂ ಅಲ್ಲ. ಪ್ರತೀ ವರ್ಷ ಮಳೆಗಾಲದಲ್ಲಿ ಇಲ್ಲಿನ‌ ಗೋಳು ಇದೇ ಆಗಿದೆ. ಹೆದ್ದಾರಿ ಪ್ರಾಧಿಕಾರದವರು ಮಳೆಗಾಲಕ್ಕೂ ಮುನ್ನ ಚರಂಡಿ ಸ್ವಚ್ಛಗೊಳಿಸಿ, ಪ್ರತೀ ವರ್ಷ ಈ ರೀತಿ ಸಮಸ್ಯೆ ಎದುರಾಗುವ ಬಂಟರ ಭವನ ಪ್ರದೇಶ, ಉಜಿರೆ ಭಾರತ್ ಐಯರ್ನ್ ವರ್ಕ್ಸ್ ಮುಂಭಾಗದ ಪ್ರದೇಶದಲ್ಲಿ ಸೂಕ್ತ ಮುಂಜಾಗ್ರತಾ ಕ್ರಮ ಕೈಗೊಳ್ಳದೇ ಇರುವುದರಿಂದ ಮತ್ತ ಮತ್ತೆ ಇಲ್ಲಿ ಪ್ರಯಾಣಿಕರಿಗೆ ಹಾಗೂ ಸಾರ್ವಜನಿಕರಿಗೆ ಅಡಚಣೆಗಳು ಆಗುತ್ತಲೇ ಬಂದಿದೆ. ಜೂನ್ ಮಳೆಗಾಲ ಆರಂಭವಾದರೂ ಅಧಿಕಾರಿಗಳ ನಿರ್ಲಕ್ಷ್ಯ ಧೋರಣೆಗೆ ಜನ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.