News Karnataka Kannada
Saturday, April 13 2024
Cricket
ಕರಾವಳಿ

ಭೀಮನ ಅಮಾವಾಸ್ಯೆ ಮುಹೂರ್ತ, ಪೂಜೆ ವಿಧಾನ, ಪೂಜೆ ಸಾಮಗ್ರಿ, ಮಹತ್ವದ ಬಗ್ಗೆ ತಿಳಿದುಕೊಳ್ಳಿ

Bhima Amavasya
Photo Credit : By Author

ಆಷಾಢ ಮಾಸದ ಅಮಾವಾಸ್ಯೆಯನ್ನು ದಕ್ಷಿಣ ಭಾರತದಲ್ಲಿ ಭೀಮನ ಅಮಾವಾಸ್ಯೆ ಎಂದು ಆಚರಿಸಲಾಗುತ್ತದೆ. ಭೀಮನ ಅಮಾವಾಸ್ಯೆ ದಿನದಂದು ವಿವಾಹಿತ ಮಹಿಳೆಯರು ತಮ್ಮ ಪತಿಯ ದೀರ್ಘಾಯುಷ್ಯಕ್ಕಾಗಿ ಪೂಜೆಯನ್ನು ಮಾಡಿದರೆ, ಅವಿವಾಹಿತ ಮಹಿಳೆಯರು ತಮ್ಮ ತಂದೆ, ಸಹೋದರರ ಆಯಸ್ಸು ಮತ್ತು ಆರೋಗ್ಯಕ್ಕಾಗಿ ಪೂಜೆಯನ್ನು ಮಾಡುತ್ತಾರೆ. ಹಾಗದರೆ ಈ ಬಾರಿ ಭೀಮನ ಅಮಾವಾಸ್ಯೆ 2023 ರ ಶುಭ ಮುಹೂರ್ತ ಯಾವುದು..? ಭೀಮನ ಅಮಾವಾಸ್ಯೆ ಪೂಜೆಯನ್ನು ಮಾಡುವುದು ಹೇಗೆ..? ಭೀಮನ ಅಮಾವಾಸ್ಯೆ ಮಹತ್ವ, ವ್ರತ ಕಥೆ ಹಾಗೂ ಪೂಜೆ  ಸಾಮಗ್ರಿ ಬಗ್ಗೆ ತಿಳಿದುಕೊಳ್ಳಿ.

ಜ್ಯೋತಿರ್ಭೀಮೇಶ್ವರ ಅಮಾವಾಸ್ಯೆ ಎಂದು ಕರೆಯಲಾಗುವ ಭೀಮನ ಅಮವಾಸ್ಯೆ ವ್ರತವು ದಕ್ಷಿಣ ಭಾರತದಲ್ಲಿ ಅತ್ಯಂತ ಮಂಗಳಕರವಾದ ವ್ರತವಾಗಿದೆ. ವಿಶೇಷವಾಗಿ ಕರ್ನಾಟಕ ಮತ್ತು ತಮಿಳುನಾಡಿನ ಭಾಗಗಳಲ್ಲಿ, ಹಿಂದೂ ಚಾಂದ್ರಮಾನ ಪಂಚಾಂಗದ ಪ್ರಕಾರ ಆಷಾಢ ಮಾಸದ ಅಮಾವಾಸ್ಯೆಯ ರಾತ್ರಿಯಲ್ಲಿ ಮಹಿಳೆಯರು ಈ ಉಪವಾಸವನ್ನು ಆಚರಿಸುತ್ತಾರೆ. ಆಷಾಢ ಮಾಸವು ಹಿಂದೂ ಸಂಸ್ಕೃತಿಯ ಪ್ರಕಾರ ಹೊಸ ಆರಂಭದ ಸಮಯವಾಗಿದೆ. ಈ ವರ್ಷ ಭೀಮನ ಅಮಾವಾಸ್ಯೆಯನ್ನು 2023 ರ ಜುಲೈ 17 ರಂದು ಸೋಮವಾರ ಆಚರಿಸಲಾಗುವುದು. ಈ ವ್ರತವನ್ನು ಶಿವ ಮತ್ತು ಪಾರ್ವತಿ ದೇವಿಗೆ ಸಮರ್ಪಿತವಾದ ವ್ರತವಾಗಿದ್ದು, ದಂಪತಿಗಳು ಈ ದಿನ ಶಿವ – ಪಾರ್ವತಿ ಪೂಜೆಯನ್ನು ಮಾಡುತ್ತಾರೆ.

 ​ಭೀಮನ ಅಮಾವಾಸ್ಯೆ 2023 ದಿನಾಂಕ ಮತ್ತು ಸಮಯ​:
ಭೀಮನ ಅಮಾವಾಸ್ಯೆ 2023 ದಿನಾಂಕ: 2023 ರ ಜುಲೈ 17 ರಂದು ಸೋಮವಾರ
ಭೀಮನ ಅಮಾವಾಸ್ಯೆ ತಿಥಿ ಆರಂಭ: 2023 ರ ಜುಲೈ 17 ರಂದು ಬೆಳಗ್ಗೆ 9:11 ರಿಂದ
ಭೀಮನ ಅಮಾವಾಸ್ಯೆ ತಿಥಿ ಮುಕ್ತಾಯ: 2023 ರ ಜುಲೈ 18 ರಂದು ಬೆಳಗ್ಗೆ 10:6 ರವರೆಗೆ.

​ಭೀಮನ ಅಮಾವಾಸ್ಯೆ ಮಹತ್ವ​:
ವಿವಾಹಿತ ಅಥವಾ ಅವಿವಾಹಿತ ಹೆಂಗಸರು ಅಥವಾ ಹುಡುಗಿಯರು ಪತಿ, ತಂದೆ, ಸಹೋದರ, ಮಗ ಮತ್ತು ಮನೆಯಲ್ಲಿನ ಇತರ ಪುರುಷರ ದೀರ್ಘಾಯುಷ್ಯ ಮತ್ತು ಸಮೃದ್ಧಿಗಾಗಿ ಈ ವ್ರತವನ್ನು ಆಚರಿಸುತ್ತಾರೆ. ವಿವಾಹಿತ ಮಹಿಳೆಯರು ಮದುವೆಯಾದ ನಂತರ ಕನಿಷ್ಠ 9 ವರ್ಷಗಳ ಕಾಲ ಈ ವ್ರತವನ್ನು ಮಾಡಬೇಕು. ಇನ್ನು ಅವಿವಾಹಿತ ಹುಡುಗಿಯರು ಸದ್ಗುಣಶೀಲ ಪತಿಯನ್ನು ಪಡೆಯುವುದಕ್ಕಾಗಿ, ಸಹೋದರರ ದೀರ್ಘಾಯುಷ್ಯ ಮತ್ತು ಉತ್ತಮ ಆರೋಗ್ಯಕ್ಕಾಗಿ ಈ ವ್ರತವನ್ನು ಆಚರಿಸುತ್ತಾರೆ.

ಭೀಮನ ಅಮಾವಾಸ್ಯೆ ವ್ರತ ಕಥೆ​:
ಜಾನಪದ ಪ್ರಕಾರ, ಭೀಮನ ಅಮವಾಸ್ಯೆಯಂದು, ಮಹಾನ್ ಯೋಧ ಭೀಮನು ಸಾವಿನ ದೇವರಾದ ಯಮನನ್ನು ಎದುರಿಸಿದನು. ಭೀಮನ ಶಕ್ತಿ ಮತ್ತು ಭಕ್ತಿಯಿಂದ ಪ್ರಭಾವಿತನಾದ ರಾಜ ಯಮ ಅವನಿಗೆ ವರವನ್ನು ನೀಡಿದನು. ಈ ದಿನದಂದು ಉಪವಾಸವನ್ನು ಆಚರಿಸುವ ಮತ್ತು ಯಮ ದೇವರಿಗೆ ಪ್ರಾರ್ಥನೆ ಸಲ್ಲಿಸುವವರು ಉತ್ತಮ ಆರೋಗ್ಯ, ದೀರ್ಘಾಯುಷ್ಯ ಮತ್ತು ಅಕಾಲಿಕ ಮರಣದಿಂದ ರಕ್ಷಣೆಯನ್ನು ಹೊಂದುತ್ತಾರೆ ಎನ್ನುವ ವರವನ್ನು ನೀಡಿದನು. ಅಂದಿನಿಂದ, ಭೀಮನ ಅಮವಾಸ್ಯೆಯನ್ನು ಯಮನ ಆಶೀರ್ವಾದವನ್ನು ಪಡೆಯಲು ಉಪವಾಸ ಮತ್ತು ಪೂಜೆಯ ದಿನವಾಗಿ ಆಚರಿಸಲಾಗುತ್ತದೆ.

ಪ್ರಾಚೀನ ಕಾಲದಲ್ಲಿ, ರಾಜ ಹರಿಶ್ಚಂದ್ರನು ತನ್ನ ದೈವಿಕ ಪರೀಕ್ಷೆಯ ಕಾರಣದಿಂದ ಜೀವನದಲ್ಲಿ ಸಾಕಷ್ಟು ಕಷ್ಟಗಳನ್ನು ಅನುಭವಿಸುತ್ತಾನೆ. ಕಷ್ಟಗಳಿಂದ ಮುಕ್ತಿಯನ್ನು ಪಡೆಯುವುದಕ್ಕಾಗಿ ಭೀಮನ ಅಮಾವಾಸ್ಯೆಯಂದು ರಾಜ ಹರಿಶ್ಚಂದ್ರನು ತೀವ್ರವಾದ ತಪಸ್ಸು ಮಾಡಿದನು ಮತ್ತು ಪಾಪದ ವಿಮೋಚನೆಗಾಗಿ ಯಮನನ್ನು ಪ್ರಾರ್ಥಿಸಿದನು. ಅವನ ಅಚಲವಾದ ನಂಬಿಕೆ ಮತ್ತು ಭಕ್ತಿಯಿಂದ ಪ್ರಭಾವಿತನಾದ ಯಮನು ಅವನ ಕಷ್ಟಗಳಿಂದ ವಿಮೋಚನೆಯನ್ನು ನೀಡಿದನು. ಆ ದಿನದಿಂದ, ಭೀಮನ ಅಮಾವಾಸ್ಯೆಯು ಕ್ಷಮೆ, ವಿಮೋಚನೆ ಮತ್ತು ಯಮನ ಆಶೀರ್ವಾದವನ್ನು ಪಡೆಯುವ ದಿನವಾಗಿ ಪ್ರಾಮುಖ್ಯತೆಯನ್ನು ಪಡೆದುಕೊಂಡಿತು.

ಹಿಂದೂ ಪುರಾಣದ ಇನ್ನೊಂದು ಕಥೆಯ ಪ್ರಕಾರ, ಭೀಮನ ಅಮವಾಸ್ಯೆಯು ಪಾಂಡವ ಸಹೋದರರ ಕಥೆಯೊಂದಿಗೆ ಸಂಬಂಧಿಸಿದೆ. ವನವಾಸದ ಸಮಯದಲ್ಲಿ ಪಾಂಡವರು ಅನೇಕ ಕಷ್ಟಗಳನ್ನು ಎದುರಿಸಿದರು. ಈ ಕಷ್ಟಗಳಿಂದ ಮುಕ್ತಿಯನ್ನು ಪಡೆಯುವುದಕ್ಕಾಗಿ ದೈವಿಕ ಆಶೀರ್ವಾದವನ್ನು ಪಡೆದುಕೊಳ್ಳಲು ದ್ರೌಪದಿ ಕಠಿಣ ತಪಸ್ಸನ್ನು ಮಾಡಿದಳು ಮತ್ತು ಭಗವಾನ್ ಭೀಮನನ್ನು ಪ್ರಾರ್ಥಿಸಿದಳು. ಆಕೆಯ ಭಕ್ತಿಗೆ ಮೆಚ್ಚಿದ ಭಗವಾನ್ ಭೀಮನು ಅಮವಾಸ್ಯೆಯ ದಿನದಂದು ಅವಳ ಮುಂದೆ ಕಾಣಿಸಿಕೊಂಡನು. ಅಂದಿನಿಂದ, ಭೀಮನ ಆಶೀರ್ವಾದವನ್ನು ಗೌರವಿಸಲು ಈ ದಿನವನ್ನು ಭೀಮನ ಅಮವಾಸ್ಯೆ ಎಂದು ಆಚರಿಸಲಾಗುತ್ತದೆ.

ಆಷಾಢ ಅಮಾವಾಸ್ಯೆ 2023 ರ ಶುಭ ಮುಹೂರ್ತ, ಪೂಜೆ ವಿಧಾನ ಮತ್ತು ಮಹತ್ವ..!​

​ಭೀಮನ ಅಮಾವಾಸ್ಯೆ ಪೂಜೆ ಸಾಮಾಗ್ರಿ​
– ಭೀಮೇಶ್ವರ ದೇವರ ಫೋಟೋ ಅಥವಾ ವಿಗ್ರಹ
– ದೇವರನ್ನು ಪ್ರತಿಷ್ಠಾಪನೆ ಮಾಡಲು ಮಣೆ ಅಥವಾ ಪೀಠ
– ದೀಪ ಹಚ್ಚಲು ಎಣ್ಣೆ, ಬತ್ತಿ, ತುಪ್ಪ ಮತ್ತು ದೀಪ
– ಘಂಟೆ, ಪಂಚಪಾತ್ರೆ, ಉದ್ದರಣೆ, ಅರ್ಘ್ಯ ಪಾತ್ರೆ, ನೀರು
– ಶ್ರೀಗಂಧದ ಪೇಸ್ಟ್‌
– ಅರಿಶಿನ, ಕುಂಕುಮ ಮತ್ತು ಮಂತ್ರಾಕ್ಷತೆ
– ಅಗರಬತ್ತಿ ಅಥವಾ ಊದಿನ ಕಡ್ಡಿ
– ತೆಂಗಿನಕಾಯಿ, ವೀಳ್ಯದೆಲೆ, ಅಡಿಕೆ, ಹೂವು, ಹಣ್ಣು
– ನೈವೇದ್ಯಕ್ಕಾಗಿ ಸಿಹಿ ತಿನಿಸುಗಳು
– ಆರತಿ ತಟ್ಟೆ ಇತ್ಯಾದಿ.

​ಭೀಮನ ಅಮಾವಾಸ್ಯೆ ಪೂಜೆ ಮಾಡುವ ವಿಧಾನ​
– ಮುಂಜಾನೆ ಬೇಗ ಎದ್ದು ಶುದ್ಧರಾಗಿ, ವಿವಾಹಿತ ಮಹಿಳೆಯು ವ್ರತ ಮಾಡುವುದಾಗಿ ಪ್ರತಿಜ್ಞೆಯನ್ನು ತೆಗೆದುಕೊಂಡು ಕೈಗೆ ಕಂಕಣ ಕಟ್ಟಿಕೊಳ್ಳಬೇಕು.
– ರಾಹುಕಾಲ ಹೊರತುಪಡಿಸಿ ಬೆಳಗ್ಗೆ ಅಥವಾ ಸಂಜೆ ಯಾವುದೇ ಶುಭ ಮುಹೂರ್ತದಲ್ಲಿ ವ್ರತ ಕೈಗೊಳ್ಳಬಹುದು.
– ಒಂದು ತಟ್ಟೆಯಲ್ಲಿ ಅಕ್ಕಿಯನ್ನು ಹಾಕಿ ಅದರ ಮೇಲೆ ಎರಡು ದೀಪಗಳನ್ನಿಟ್ಟು, ಈ ದೀಪಗಳಿಗೆ ಎಣ್ಣೆಯನ್ನು ಹಾಕಿ ದೀಪ ಬೆಳಗಬೇಕು.
– ನಂತರ ಶಿವ ಪಾರ್ವತಿಗೆ ಪೂಜೆಯನ್ನು ಮಾಡಬೇಕು.
– ಪೂಜಾ ಸಾಮಗ್ರಿಗಳ ಜತೆಗೆ 9 ಗಂಟಿನ ಗೌರಿ ದಾರ ಇಟ್ಟು ಪೂಜೆ ಮಾಡಿ ಆ ಬಳಿಕ ಕೈಗೆ ಕಟ್ಟಿಕೊಳ್ಳಬೇಕು.
– ಈ ದಿನ ಮೊದಲು ಗಣಪತಿಯನ್ನು ಪೂಜಿಸಿ ನಂತರ ಭೀಮೇಶ್ವರನ ಪೂಜೆ ಮಾಡಬೇಕು.
– ಪೂಜೆಯ ಕೊನೆಯಲ್ಲಿ ದೇವರಿಗೆ ಕಡುಬನ್ನು ನೈವೇದ್ಯವಾಗಿ ಅರ್ಪಿಸಿ ಆರತಿ ಮಾಡುವ ಮೂಲಕ ಪೂಜೆಯನ್ನು ಪೂರ್ಣಗೊಳಿಸಬೇಕು.
– ಇದರ ನಂತರ ನೀವು ನಿಮ್ಮ ಪತಿಯ ಪಾದ ಪೂಜೆಯನ್ನು ಮಾಡಬೇಕು.
– ಕೆಲವೆಡೆ ಈ ದಿನ ಹಿಟ್ಟಿನ ದೀಪವನ್ನು ಹಚ್ಚಿ ಪೂಜೆಯನ್ನು ಮಾಡುತ್ತಾರೆ.

​ಭೀಮನ ಅಮಾವಾಸ್ಯೆ ಆಚರಣೆ​
ಕರ್ನಾಟಕದಲ್ಲಿ ಭೀಮನ ಅಮವಾಸ್ಯೆಯನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಭಕ್ತರು ಭಗವಾನ್ ಭೀಮನಿಗೆ ಸಮರ್ಪಿತವಾದ ದೇವಾಲಯಗಳಿಗೆ ಈ ದಿನ ಭೇಟಿ ನೀಡುತ್ತಾರೆ. ಆಧ್ಯಾತ್ಮಿಕ ಪ್ರವಚನಗಳಲ್ಲಿ ಭಾಗವಹಿಸುತ್ತಾರೆ ಮತ್ತು ದತ್ತಿ ಚಟುವಟಿಕೆಗಳಲ್ಲಿ ತೊಡಗುತ್ತಾರೆ. ಪೂಜೆಯ ಸಮಯದಲ್ಲಿ ಕಟ್ಟಲಾದ ಹಳದಿ ದಾರವನ್ನು ಮಂಗಳಕರವೆಂದು ಪರಿಗಣಿಸಲಾಗುತ್ತದೆ. ಈ ದಾರವು ರಕ್ಷಣೆ ಮತ್ತು ಯೋಗಕ್ಷೇಮವನ್ನು ತರುತ್ತದೆ ಎನ್ನುವ ನಂಬಿಕೆಯಿದೆ.

ನ್ಯೂಸ್‌ಕನ್ನಡ.ಕಾಂ ಇದರ ಗುಣಮಟ್ಟದ, ಸ್ವತಂತ್ರ ಪತ್ರಿಕೋದ್ಯಮವನ್ನು ನಿಮ್ಮ ದೇಣಿಗೆಯ ಮೂಲಕ ಪ್ರೋತ್ಸಾಹಿಸಿ.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

This site is protected by reCAPTCHA and the Google Privacy Policy and Terms of Service apply.
12790
NewsKannada

Read More Articles

ವಾಟ್ಸಪ್ ನಲ್ಲಿ ತಾಜಾ ಸುದ್ದಿಗಳನ್ನು ಪಡೆಯಲು ದಯವಿಟ್ಟು