ದಾವಣಗೆರೆ: ಸರ್ಕಾರಿ ಮಹಿಳಾ ಆಸ್ಪತ್ರೆಯಲ್ಲಿ ನವಜಾತ ಶಿಶು ನಾಪತ್ತೆ

ದಾವಣಗೆರೆ : ಇಲ್ಲಿನ ಕೆ.ಆರ್‌. ಮಾರ್ಕೆಟ್‌ ರಸ್ತೆಯಲ್ಲಿರುವ ಸರ್ಕಾರಿ ಮಹಿಳಾ ಮತ್ತು ಮಕ್ಕಳ ಆಸ್ಪತ್ರೆಯಲ್ಲಿ ಬುಧವಾರ ಜನಿಸಿದ ನವಜಾತ ಗಂಡು ಶಿಶು ನಾಪತ್ತೆಯಾಗಿದೆ. ನರ್ಸ್‌ಗಳ ನಿರ್ಲಕ್ಷ್ಯವೇ ಮಗು ನಾಪತ್ತೆಗೆ ಕಾರಣ ಎಂದು ಹೆತ್ತವರು ಆರೋಪಿಸಿದ್ದಾರೆ.

ಜಬಿವುಲ್ಲಾ-ಉಮ್ಮಿಸಲ್ಮಾ ದಂಪತಿಯ ಮಗು ಇದಾಗಿದ್ದು, ಬುಧವಾರ ಹೆರಿಗೆಯಾದ ಬಳಿಕ ನರ್ಸ್‌ ಬಂದು ಮಗುವನ್ನು ಐಸಿಯುಗೆ ಒಯ್ದಿದ್ದರು. ಬಳಿಕ ಎಲ್ಲ ಪರೀಕ್ಷೆಗಳು ಮುಗಿದ ಬಳಿಕ ಹೆತ್ತವರ ಕೈಗೆ ಮಗುವನ್ನು ನೀಡುವ ಬದಲು ಯಾವುದೋ ಮಹಿಳೆ ಕೈಗೆ ನೀಡಿದ್ದಾರೆ. ಆ ಮಹಿಳೆ ಮಗುವನ್ನು ತೆಗೆದುಕೊಂಡು ಹೋಗಿದ್ದಾರೆ.

‘ನಾವೆಲ್ಲ ವಾರ್ಡ್‌ನಲ್ಲೇ ಇದ್ದೆವು. ಇಲ್ಲಿಗೆ ಬಂದು ಮಗುವನ್ನು ನರ್ಸ್‌ ಒಯ್ದಿದ್ದಾರೆ. ವಾಪಸ್‌ ಇಲ್ಲೇ ತಂದು ಕೊಡಬೇಕಿತ್ತು. ಇಲ್ಲವೇ ನಮ್ಮನ್ನು ಕರೆಯಬೇಕಿತ್ತು. ಯಾರೋ ಮಹಿಳೆ ಬಂದರು ಎಂದು ಅವರ ಕೈಗೆ ಮಗುವನ್ನು ಏಕೆ ನೀಡಿದರು? ಅವರ ಉದ್ದೇಶವೇನು ಎಂಬುದೇ ಅರ್ಥವಾಗುತ್ತಿಲ್ಲ’ ಎಂದು ಹೆತ್ತವರ ಸಂಬಂಧಿ ಶಿರಿನ್‌ಬಾನು ತಿಳಿಸಿದರು.

‘ಮಗುವನ್ನು ತೆಗೆದುಕೊಂಡು ಹೋಗಿ ಎಂದು ನರ್ಸ್‌ ಕೂಗಿದಾಗ ಬುರ್ಕಾ ಹಾಕಿದ್ದ ಮಹಿಳೆಯೊಬ್ಬರು ಬಂದು ನಮ್ಮ ಮಗು ಎಂದು ಕೈ ಚಾಚಿದರು. ಅವರಿಗೆ ನೀಡಿರುವುದಾಗಿ ನರ್ಸ್‌ ತಿಳಿಸಿದ್ದಾರೆ. ನಾನು ಆ ಸಂದರ್ಭದಲ್ಲಿ ಆಸ್ಪತ್ರೆಯಲ್ಲಿ ಇರಲಿಲ್ಲ. ಶನಿವಾರ ಬೆಳಿಗ್ಗೆ ಸಿಸಿಟಿವಿ ಕ್ಯಾಮೆರಾದ ಫೂಟೇಜ್‌ ಪರಿಶೀಲಿಸುತ್ತೇನೆ’ ಎಂದು ಆಸ್ಪತ್ರೆಯ ಅಧೀಕ್ಷಕ ಡಾ.ನೀಲಕಂಠ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ್ದಾರೆ.

ಮಗು ಕಳೆದುಕೊಂಡವರು ದೂರು ನೀಡಲು ಬುಧವಾರ ರಾತ್ರಿ ಬಸವನಗರ ಪೊಲೀಸ್‌ ಠಾಣೆಗೆ ತೆರಳಿದ್ದಾರೆ.