ಬೆಂಗಳೂರು: ಈದ್ಗಾ ಮೈದಾನ ಪ್ರಕರಣ, ಕಾನೂನು ಹೋರಾಟಕ್ಕೆ ಸಿದ್ದವಾದ ವಕ್ಫ್ ಮಂಡಳಿ

ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಈದ್ಗಾ ಮೈದಾನವು ಕಂದಾಯ ಇಲಾಖೆಗೆ ಸೇರಿದ್ದು ಎಂದು ಘೋಷಿಸಿದ ನಂತರ ವಕ್ಫ್ ಮಂಡಳಿ ಕಾನೂನು ಹೋರಾಟಕ್ಕೆ ಸಿದ್ಧತೆ ನಡೆಸುತ್ತಿದೆ ಎಂದು ಭಾನುವಾರ ತಿಳಿಸಿದೆ.

ಬಿಬಿಎಂಪಿ ನಿರ್ಧಾರಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ವಕ್ಫ್ ಮಂಡಳಿ ಅಧ್ಯಕ್ಷ ಶಫಿ ಸಾದಿ, ಮಂಡಳಿಯು ಕಾನೂನು ಹೋರಾಟ ನಡೆಸಲಿದೆ ಎಂದು ಹೇಳಿದರು. ‘ಈದ್ಗಾ ಮೈದಾನ ವಕ್ಫ್ ಮಂಡಳಿಯ ಆಸ್ತಿ ಎಂದು ಸುಪ್ರೀಂ ಕೋರ್ಟ್ 1965ರಲ್ಲಿ ತೀರ್ಪು ನೀಡಿತ್ತು. ಆದ್ದರಿಂದ, ಈ ನಿರ್ಧಾರವು ಸಮರ್ಥನೀಯವಲ್ಲ ಮತ್ತು ಈ ಆದೇಶವು ನ್ಯಾಯಾಂಗ ನಿಂದನೆಗೆ ಸಮನಾಗಿದೆ” ಎಂದು ಸಾದಿ ಹೇಳಿದರು.

ಈ ಆಸ್ತಿ ತನಗೆ ಸೇರಿದ್ದಲ್ಲ ಎಂದು ಬಿಬಿಎಂಪಿ ಈ ಹಿಂದೆ ಹೇಳಿತ್ತು. ಆದರೆ ಶನಿವಾರ ಈದ್ಗಾ ಮೈದಾನವು ಕಂದಾಯ ಇಲಾಖೆಯ ಆಸ್ತಿ ಎಂದು ಹೇಳಿ ಆದೇಶ ಹೊರಡಿಸಿದೆ.

ವಕ್ಫ್ ಮಂಡಳಿಯು ಬಿಬಿಎಂಪಿಗೆ ‘ಖಾತಾ’ (ಆಸ್ತಿ ಕಾನೂನು ದಾಖಲೆಗಳು) ಗಾಗಿ ಅರ್ಜಿ ಸಲ್ಲಿಸಿದ್ದು, ಅದನ್ನು ತಿರಸ್ಕರಿಸಲಾಗಿದೆ. ಜಂಟಿ ಆಯುಕ್ತ ಶ್ರೀನಿವಾಸ್ ಅವರು ಈದ್ಗಾ ಮೈದಾನದ ಮಾಲೀಕತ್ವವನ್ನು ಪಡೆಯಲು ದಾಖಲೆಗಳನ್ನು ಸಲ್ಲಿಸುವಂತೆ ವಕ್ಫ್ ಮಂಡಳಿಗೆ ನೋಟಿಸ್ ನೀಡಿದ್ದರು.

ದಾಖಲೆಗಳನ್ನು ಹಾಜರುಪಡಿಸಲು ಬಿಬಿಎಂಪಿ ಎರಡು ತಿಂಗಳ ಕಾಲಾವಕಾಶ ನೀಡಿತ್ತು. ವಕ್ಫ್ ಮಂಡಳಿ ಅಗತ್ಯ ದಾಖಲೆಗಳನ್ನು ಹಾಜರುಪಡಿಸಲು ವಿಫಲವಾದ ಕಾರಣ, ಬಿಬಿಎಂಪಿಯು ಖಾತಾ ನೀಡಲು ನಿರಾಕರಿಸಿತು ಮತ್ತು ಕರ್ನಾಟಕ ಕಂದಾಯ ಇಲಾಖೆಯನ್ನು ಭೂಮಿಯ ಡೀಫಾಲ್ಟ್ ಮಾಲೀಕ ಎಂದು ಘೋಷಿಸಿತು.

ಆಗಸ್ಟ್ 15 ರಂದು ಈದ್ಗಾ ಮೈದಾನದ ಆವರಣದಲ್ಲಿ ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸಲು ಚಾಮರಾಜನಗರ ನಾಗರಿಕರ ವೇದಿಕೆ ಅರ್ಜಿ ಸಲ್ಲಿಸಿತ್ತು. ಕೆಲವು ತಿಂಗಳ ಹಿಂದೆ ಬಿಬಿಎಂಪಿ ವಕ್ಫ್ ಗೆ ಸಂಬಂಧಿತ ದಾಖಲೆಗಳನ್ನು ಸಲ್ಲಿಸುವಂತೆ ಸೂಚಿಸಿದ ನಂತರ, ವಿವಾದವು ಕಡಿಮೆಯಾಗಿತ್ತು. ಆದರೆ, ಈಗ ಇತ್ತೀಚಿನ ಬಿಬಿಎಂಪಿ ಆದೇಶದೊಂದಿಗೆ, ಮೈದಾನದ ವಿವಾದವು ಮತ್ತೆ ಹೊರಹೊಮ್ಮಲು ಸಜ್ಜಾಗಿದೆ.