ಬೆಂಗಳೂರು: ಸ್ನೇಹಿತೆ ಮನೆಯಲ್ಲೇ ಕಳ್ಳತನ ಮಾಡಿದ ಮಹಿಳೆ ಸೆರೆ

ಬೆಂಗಳೂರು, ಡಿ.16 : ಸ್ನೇಹಿತೆ ಮನೆಯಲ್ಲೇ ಕಳ್ಳತನ ಮಾಡಿದ್ದ ಮಹಿಳೆಯನ್ನು ಜೆಜೆ ನಗರ ಠಾಣೆ ಪೊಲೀಸರು ಬಂಧಿಸಿ 11 ಲಕ್ಷ ರೂ. ಬೆಲೆಯ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ.

ಡಿಜೆ ಹಳ್ಳಿ ನಿವಾಸಿ ಅಜಿರಾ (26) ಬಂಧಿತ ಮಹಿಳೆ. ಅಜಿರಾ ತನ್ನ ಅಣ್ಣನ ಮದುವೆಯ ಆಮಂತ್ರಣ ಪತ್ರ ಕೊಡಲು ಜೆಜೆ ನಗರಕ್ಕೆ ಬಂದಿದ್ದಾಗ ಡಿ.14ರಂದು ಮಧ್ಯಾಹ್ನ 3.45ರಲ್ಲಿ ತನ್ನ ಜತೆ ಶಾಲೆಯಲ್ಲಿ ಓದಿದ್ದ ಸ್ನೇಹಿತೆ ಮನೆಗೆ ಹೋಗಿದ್ದಾರೆ.

ಗೃಹಿಣಿಯಾಗಿರುವ ಸ್ನೇಹಿತೆ ಜತೆ ಮಾತನಾಡುತ್ತ ಸ್ವಲ್ಪ ಸಮಯದ ಬಳಿಕ ಬಟ್ಟೆ ಬದಲಾಯಿಸುವುದಾಗಿ ಹೇಳಿ ಆಗಾಗ್ಗೆ ರೂಮಿಗೆ ಹೋಗಿ ಬಂದು ಮಾಡುತ್ತಿದ್ದಳು. ರಾತ್ರಿ 8.45ರಲ್ಲಿ ಊಟ ಮಾಡಿಕೊಂಡು ಮಹಿಳೆ ವಾಪಸ್ ಹೋಗಿದ್ದಳು. ಆಕೆಯ ವರ್ತನೆಯಿಂದ ಅನುಮಾನಗೊಂಡಿದ್ದ ಸ್ನೇಹಿತೆ ಬೀರು ತೆಗೆದು ನೋಡಿದಾಗ ಲಾಕರ್‍ನಲ್ಲಿಟ್ಟಿದ್ದ ಚಿನ್ನದ ಒಡವೆಗಳು ಕಳುವಾಗಿದ್ದು ಕಂಡು ತಕ್ಷಣ ಜೆಜೆ ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.

ಇನ್‍ಸ್ಪೆಕ್ಟರ್ ಮಂಜು ಹಾಗೂ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ ಆರೋಪಿತೆಯನ್ನು ಬಂಧಿಸಿ ಸುಮಾರು 11 ಲಕ್ಷ ಬೆಲೆಯ 206 ಗ್ರಾಂ ತೂಕದ ಚಿನ್ನದ ಆಭರಣ ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.