ಬೆಂಗಳೂರು: ಕಂಪೆನಿಯವರು ಸಂಬಳ ನೀಡದಿದ್ದಕ್ಕೆ ಲಾರಿ ಚಾಲಕ ಆತ್ಮಹತ್ಯೆ

ಬೆಂಗಳೂರು, ಮಾ.31 : ತಾನು ಕೆಲಸ ಮಾಡುತ್ತಿದ್ದ ಕಂಪೆನಿಯವರು ಸಂಬಳ ನೀಡದಿದ್ದರಿಂದ ಮನನೊಂದ ಲಾರಿ ಚಾಲಕ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಗೋವಿಂದರಾಜನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ. ಎಸ್‍ಆರ್ ನಗರದಲ್ಲಿರುವ ಲಾಜಿಸ್ಟಿಕ್ ಕಂಪೆನಿಯೊಂದರಲ್ಲಿ ಲಾರಿ ಚಾಲಕರಾಗಿ ಕೆಲಸ ಮಾಡುತ್ತಿದ್ದ ಕಿರಣ್‍ಕುಮಾರ್ ಆತ್ಮಹತ್ಯೆಗೆ ಶರಣಾದವರು.

ಈ ಕಂಪೆನಿಯಲ್ಲಿ ಚಾಲಕರಾಗಿ ಕೆಲಸ ಮಾಡುತ್ತಿದ್ದ ಇವರಿಗೆ ಸಂಬಳ ಕೊಟ್ಟಿರಲಿಲ್ಲ. ಹಲವಾರು ಬಾರಿ ಹಣ ಕೇಳಿದರೂ ನೀಡದ ಕಾರಣ ಕಂಪೆನಿಯ ಮೂವರ ಹೆಸರು ಹೇಳಿ ನೀವು ಅರ್ಧ ಗಂಟೆಯೊಳಗೆ ನನ್ನ ಅಕೌಂಟ್‍ಗೆ 30 ಸಾವಿರ ಹಣ ಹಾಕದಿದ್ದರೆ ನನ್ನ ಸಾವಿಗೆ ನೀವೇ ಕಾರಣರಾಗುತ್ತೀರ, ನಂತರ ನನ್ನ ಹೆಣ ನೋಡಬೇಕಾಗುತ್ತದೆ ಎಂದು ವಿಡಿಯೋವೊಂದನ್ನು ಮಾಡಿ ಕಳುಹಿಸಿದ್ದರು.

ಆದರೆ, ರಾತ್ರಿಯಾದರೂ ಯಾವುದೇ ಹಣ ಅಕೌಂಟ್‍ಗೆ ಸಂದಾಯವಾಗದಿದ್ದಾಗ ಗೋವಿಂದರಾಜನಗರದ ಸಂಜೀವಿನಿ ನಗರದಲ್ಲಿರುವ ತಮ್ಮ ಮಾವನ ಮನೆಯಲ್ಲಿ ಬುಧವಾರ ರಾತ್ರಿ ಕಿರಣ್‍ಕುಮಾರ್ ಫ್ಯಾನ್‍ಗೆ ಹಗ್ಗದಿಂದ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಸುದ್ದಿ ತಿಳಿದು ಗೋವಿಂದರಾಜನಗರ ಠಾಣೆ ಪೊಲೀಸರು ಸ್ಥಳಕ್ಕೆ ದಾವಿಸಿ ಪರಿಶೀಲನೆ ನಡೆಸಿ ಮೃತದೇಹವನ್ನು ಆಸ್ಪತ್ರೆಗೆ ರವಾನಿಸಿ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.