News Karnataka Kannada
Saturday, April 13 2024
Cricket
ಬೆಂಗಳೂರು ನಗರ

‌ ಡಿಜಿಪಿ ಆಗಿ ಬಡ್ತಿ ಸಿಕ್ಕರೂ ಕಮಿಷನರ್‌ ಆಗಿಯೇ ಮುಂದುವರಿಸಿದ ರಾಜ್ಯ ಸರ್ಕಾರ

Photo Credit :

 ‌ ಡಿಜಿಪಿ ಆಗಿ ಬಡ್ತಿ ಸಿಕ್ಕರೂ ಕಮಿಷನರ್‌ ಆಗಿಯೇ ಮುಂದುವರಿಸಿದ ರಾಜ್ಯ ಸರ್ಕಾರ

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ದಿನೇದಿನೆ ತೀವ್ರಗತಿಯಲ್ಲಿ ವ್ಯಾಪಿಸುವ ಮೂಲಕ ಹೊಸಹೊಸ ಪಂಥಾಹ್ವಾನ ನೀಡುತ್ತಿರುವ ಕೋವಿಡ್-‌19 ವೈರಸ್‌ನ ಸವಾಲನ್ನು ಎದುರಿಸಲು ನಗರ ಪೊಲೀಸ್‌ ಕಮಿಷನರ್‌ ಕಮಲ್‌ ಪಂತ್‌ ಅವರೇ ಸರಿ ಎಂದು ರಾಜ್ಯ ಸರ್ಕಾರ ದಿಟ್ಟ ನಿರ್ಧಾರ ತಳೆದಿದೆ. ಅರ್ಥಾತ್‌, ಕಮಲ್‌ ಪಂತ್‌ ಅವರಿಗೆ ರಾಜ್ಯ ಪೊಲೀಸ್‌ ಮಹಾನಿರ್ದೇಶಕ(ಡಿಜಿಪಿ) ಆಗಿ ಬಡ್ತಿ ನೀಡಿದ್ದರೂ ಅವರನ್ನು ನಗರ ಪೊಲೀಸ್‌ ಕಮಿಷನರ್‌ ಹುದ್ದೆಯಲ್ಲಿಯೇ ಮುಂದುವರಿಸಿದೆ. ಎಡಿಜಿಪಿ ದರ್ಜೆಯ ಕಮಿಷನರ್​ ಹುದ್ದೆಯನ್ನು ಡಿಜಿಪಿ ದರ್ಜೆಗೆ ಏರಿಸಿ ಕಮಲ್​ ಪಂತ್ ಅವ​ರನ್ನು ಆಯುಕ್ತರಾಗಿಯೇ ಮುಂದುವರಿಸಿ ರಾಜ್ಯ ಸರ್ಕಾರ ಗುರುವಾರ ಆದೇಶ ಹೊರಡಿಸಿದೆ. ಏಪ್ರಿಲ್​ 30ಕ್ಕೆ ಡಿಜಿಪಿ ಪದಮ್​ ಕುಮಾರ್​ ಗರ್ಗ್​ ನಿವೃತ್ತಿ ಆಗಲಿದ್ದಾರೆ. ಇವರಿಂದ ತೆರವಾದ ಡಿಜಿಪಿ ಹುದ್ದೆಗೆ ಎಡಿಜಿಪಿ ಕಮಲ್​ ಪಂತ್‌ಗೆ ಬಡ್ತಿ ನೀಡಲಾಗಿದೆ.
ಕರೊನಾ ಸೋಂಕು ತಡೆಗಟ್ಟುವಲ್ಲಿ ಸರ್ಕಾರ ಕರ್ಫ್ಯೂ ಆದೇಶ ಜಾರಿ ಮಾಡಿದೆ. ದೇಶದಲ್ಲಿಯೇ ಅತಿ ಹೆಚ್ಚು ಕರೊನಾ ಸೋಂಕು ವೇಗವಾಗಿ ಹರಡುತ್ತಿರುವ ಕುಖ್ಯಾತಿಗೆ ಬೆಂಗಳೂರು ನಗರ ಒಳಗಾಗಿದೆ. ಇದರಿಂದ ಹೊರಬರಲು ಸರ್ಕಾರ ಹರಸಾಹಸ ಪಡುತ್ತಿದೆ. ಕರ್ಫ್ಯೂ, ಸೆಕ್ಷನ್​ 144 ನಿಷೇಧಾಜ್ಞೆ ಹೊರಡಿಸಿದೆ. ಕಟ್ಟುನಿಟ್ಟಾಗಿ ಜಾರಿಗೆ ತರುವುದು ಮತ್ತು ಜನರಲ್ಲಿ ಶಾಂತಿ ಸುವ್ಯವಸ್ಥೆ ಕಾಪಾಡುವುದು ಹಾಗೂ ಪೊಲೀಸರ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವುದು ಮುಖ್ಯವಾಗಿದೆ. ಆದರಿಂದ ಪೊಲೀಸ್​ ಆಯುಕ್ತರ ಹುದ್ದೆಯಲ್ಲಿ ಕಮಲ್​ ಪಂತ್​ ಅವರನ್ನು ಮುಂದುವರಿಸಲಾಗಿದೆ.
ಪಂತ್‌ ಡಿಜೆ-ಕೆಜಿ ಹಳ್ಳಿ ಗಲಭೆ ಪ್ರಕರಣ, ಮಾದಕ ದ್ರವ್ಯ ದಂಧೆ, ಮಾಜಿ ಸಚಿವರ ಸೆಕ್ಸ್​ ಸಿಡಿ ಪ್ರಕರಣವನ್ನು ಸಮರ್ಥವಾಗಿ ನಿಭಾಯಿಸಿದ್ದರು. ಯಾವುದೇ ಗೊಂದಲ, ವಿವಾದ ಎಬ್ಬಿಸದೆ ಕಾನೂನು ಸುವ್ಯವಸ್ಥೆ ಕಾಪಾಡುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ. ಈ ಹಿಂದೆಯೂ 2005 ಜೂನ್​ 8 ರಿಂದ 2006ರ ಜೂನ್​ 21ರ ವರೆಗೆ ನಿವೃತ್ತ ಡಿಜಿಪಿ ಅಜಯ್​ ಕುಮಾರ್​ ಸಿಂಗ್​ ಬೆಂಗಳೂರು ನಗರ ಆಯುಕ್ತರಾಗಿ ಸೇವೆ ಸಲ್ಲಿಸಿದ್ದರು. ಎರಡೂವರೆ ತಿಂಗಳು ಕಾಲ ಪೊಲೀಸ್​ ಆಯುಕ್ತರ ಹುದ್ದೆಯನ್ನು ಡಿಜಿಪಿ ಮೇಲ್ದರ್ಜೆಗೆ ಉನ್ನತೀಕರಿಸಿ ಅಜಯ್​ ಕುಮಾರ್​ ಅವರನ್ನು ಮುಂದುವರಿಸಿದ್ದರು. ಇದೀಗ 15 ವರ್ಷಗಳ ಬಳಿಕ ಕಮಲ್​ ಪಂತ್​ ಅವರಿಗೂ ಅವಕಾಶ ಕಲ್ಪಿಸಿದೆ. ಮುಂದಿನ ಆದೇಶದವರೆಗೂ ಇವರೇ ಮುಂದುವರಿಯಲಿದ್ದಾರೆ.

 

ನ್ಯೂಸ್‌ಕನ್ನಡ.ಕಾಂ ಇದರ ಗುಣಮಟ್ಟದ, ಸ್ವತಂತ್ರ ಪತ್ರಿಕೋದ್ಯಮವನ್ನು ನಿಮ್ಮ ದೇಣಿಗೆಯ ಮೂಲಕ ಪ್ರೋತ್ಸಾಹಿಸಿ.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

This site is protected by reCAPTCHA and the Google Privacy Policy and Terms of Service apply.
145

ವಾಟ್ಸಪ್ ನಲ್ಲಿ ತಾಜಾ ಸುದ್ದಿಗಳನ್ನು ಪಡೆಯಲು ದಯವಿಟ್ಟು