ಕೆಪಿಸಿಸಿಗೆ 50 ಸಾವಿರ ದಂಡ ವಿಧಿಸಿದ ಬಿಬಿಎಂಪಿ

ಬೆಂಗಳೂರು: ಕೆಪಿಸಿಸಿ ಬೆಂಗಳೂರು ಸಮಿತಿಗೆ 50 ಸಾವಿರ ದಂಡ ಕಟ್ಟುವಂತೆ ಬಿಬಿಎಂಪಿ ನೋಟಿಸ್ ನೀಡಿದೆ. ಕಚೇರಿ ಮುಂಭಾಗದಲ್ಲಿ ರಾಜಿವ್ ಗಾಂಧಿ, ಡಿ ದೇವರಾಜ್ ಜನ್ಮದಿನಾಚರಣೆ ಅಂಗವಾಗಿ ಫ್ಲೆಕ್ಸ್ ಅಳವಡಿಸಲಾಗಿತ್ತು.

ಪಾಲಿಕೆ ಆದೇಶವಿದ್ದರೂ ತೆರವು ಮಾಡದ ಹಿನ್ನೆಲೆ ಕೆಪಿಸಿಸಿ ಬೆಂಗಳೂರು ಸಮಿತಿಗೆ ಬಿಬಿಎಂಪಿ ಸಹಾಯಕ ಕಂದಾಯ ಅಧಿಕಾರಿ 50 ಸಾವಿರ ದಂಡ ವಿಧಿಸಿದ್ದಾರೆ.

ವಸಂತನಗರ ವ್ಯಾಪ್ತಿಗೆ ಬರುವ ಕ್ವೀನ್ಸ್​ ರಸ್ತೆಯ ಮಿಲ್ಲರ್ ಟ್ಯಾಂಕ್ ಬೆಡ್ ಏರಿಯಾದಲ್ಲಿ ಅಂದ್ರೆ ಕಾಂಗ್ರೆಸ್ ಕಚೇರಿಯ ಮುಂಭಾಗದಲ್ಲಿ ಅನಧಿಕೃತವಾಗಿ ಬ್ಯಾನರ್ಸ್ ಅಳವಡಿಸಲಾಗಿತ್ತು.

ಈ ಬ್ಯಾನರ್ ಅಳವಡಿಸಲು ಕೆಪಿಸಿಸಿ ಯಾವುದೇ ಅನುಮತಿಯನ್ನು ಪಡೆದುಕೊಂಡಿರಲಿಲ್ಲ ಎಂದು ಬಿಬಿಎಂಪಿ ತನ್ನ ಆದೇಶದಲ್ಲಿ ತಿಳಿಸಿದೆ. ಪಾಲಿಕೆಯ ಮಾನ್ಯ ಮುಖ್ಯ ಆಯುಕ್ತರವ ಖಾತೆಗೆ ದಂಡದ ಹಣ ಪಾವತಿಸುವಂತೆ ಬಿಬಿಎಂಪಿ ಸೂಚಿಸಿದೆ.

ಕೆಪಿಸಿಸಿ ಬೆಂಗಳೂರು ಸಮಿತಿಗೆ ದಂಡ ಹಾಕಿರುವ ವಿಚಾರದ ಕುರಿತು ಬಿಬಿಎಂಪಿ ಚೀಫ್ ಕಮಿಷನರ್ ತುಷಾರ್ ಗಿರಿನಾಥ್ ಪ್ರತಿಕ್ರಿಯಿಸಿದ್ದಾರೆ. ಎಲ್ಲಾ ವಲಯ ಆಯುಕ್ತರಿಗೆ ಅನಧಿಕೃತ ಫ್ಲೆಕ್ಸ್ ವಿಚಾರವಾಗಿ ಕ್ರಮಕೈಗೊಳ್ಳಲು ಸೂಚನೆ ಕೊಟ್ಟಿದ್ದೆ ಎಂದು ಹೇಳಿದ್ದಾರೆ.