ಕೊರೊನಾ ಬಗ್ಗೆ ಜನರಲ್ಲಿ ಆತಂಕ

ಆದರೆ, ಅನಿರೀಕ್ಷಿತವಾಗಿ ಎದುರಾಗುವ ಅಗೋಚರ ಶತ್ರುವಿನ ಬಗ್ಗೆ ಜನ ಸಾಮಾನ್ಯರಲ್ಲಿ ಅವ್ಯಕ್ತವಾದ ಆತಂಕ ಈಗಲೂ ಮನೆ ಮಾಡಿದೆ.ಬಸ್, ರೈಲುಗಳಲ್ಲಿ ಜನ ಕಿಕ್ಕಿರಿದು ಪ್ರಯಾಣಿಸುತ್ತಿದ್ದಾರೆ. ಕೋವಿಡ್ ವಿರುದ್ಧದ ಎಲ್ಲಾ ಅಸ್ತ್ರಗಳನ್ನು ಸರ್ಕಾರ ಕೆಳಗಿಟ್ಟಿದೆ. ಕಳೆದ ಒಂದು ತಿಂಗಳಿನಿಂದಲೂ ಸೋಂಕಿತರ ಪ್ರಮಾಣ 500ರ ಒಳಗೆ ಇರುವುದು ಸಮಾಧಾನದ ವಿಷಯ. ಕೇರಳ, ಮಹಾರಾಷ್ಟ್ರ, ಪಶ್ಚಿಮಬಂಗಾಳ ಸೇರಿದಂತೆ ಕೆಲವು ಕಡೆ ಸೋಂಕು ಹೆಚ್ಚಾಗಿದ್ದರೂ ಕರ್ನಾಟಕದ ಮೇಲೆ ಅದು ಯಾವುದೇ ಪರಿಣಾಮ ಬೀರಲಿಲ್ಲ.

ಯಾವುದೇ ಕ್ಷಣದಲ್ಲಿ ಸೋಂಕು ಕೈ ಮೀರಿದರೂ ಅದನ್ನು ಹತೋಟಿಗೆ ತರಲು ತಾಲ್ಲೂಕು ಕೇಂದ್ರಗಳಿಂದಲೂ ಮೂಲ ಸೌಕರ್ಯಗಳನ್ನು ಸಜ್ಜುಗೊಳಿಸಲಾಗಿದೆ. ಮೂರನೆ ಅಲೆ ಮಕ್ಕಳನ್ನು ಬಾಸಲಿದೆ ಎಂಬ ಕಾರಣಕ್ಕಾಗಿ ತಾಲ್ಲೂಕು ಕೇಂದ್ರಗಳಲ್ಲಿ ಐಸಿಯು, ಆಯಕ್ಸಿಜನ್ ಘಟಕಗಳನ್ನು ಆರಂಭಿಸಿ ಮಕ್ಕಳ ಚಿಕಿತ್ಸಾ ಕೇಂದ್ರಗಳನ್ನೂ ಸ್ಥಾಪಿಸಲಾಗಿತ್ತು. ಸದ್ಯಕ್ಕೆ ಎಲ್ಲವೂ ಧೂಳು ತಿನ್ನುತ್ತಿವೆ.

ಲಸಿಕೀಕರಣ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಬಹುಶಃ ಸೋಂಕು ಹೆಚ್ಚು ಬಾಸುವುದಿಲ್ಲ ಎಂಬ ನಿರೀಕ್ಷೆಗಳಿವೆ. ಒಂದು ವೇಳೆ ಮೂರನೆ ಅಲೆ ಅಥವಾ ರೂಪಾಂತರ ಸೋಂಕುಗಳು ವೃದ್ಧಿಯಾದರೆ ಅದನ್ನು ನಿಯಂತ್ರಿಸಲು ಆರೋಗ್ಯ ಮೂಲ ಸೌಕರ್ಯಗಳು ತಯಾರಿವೆ. ಜನ ಸಾಮಾನ್ಯರು ಆತಂಕಗೊಳ್ಳುವ ಅಗತ್ಯ ಇಲ್ಲ ಎಂಬ ಸಮರ್ಥನೆಗಳು ಸರ್ಕಾರದಿಂದ ಕೇಳಿ ಬರುತ್ತಿವೆ.

ಆದರೆ, ಸರ್ಕಾರ ಏನೇ ಹೇಳಿದರು ಒಂದು ಮತ್ತು ಎರಡನೇ ಅಲೆಯಲ್ಲಿ ಸಾಕಷ್ಟು ದುಷ್ಪರಿಣಾಮಗಳನ್ನು ಎದುರಿಸುವ ಜನಸಾಮಾನ್ಯರು ಒಳಗೊಳಗೆ ದುಗುಡದಲ್ಲಿರುವುದು ಕಂಡು ಬರುತ್ತಿದೆ. ಮಾಸ್ಕ್ ಧಾರಣೆ, ಸಾಮಾಜಿಕ ಅಂತರ ಪಾಲನೆಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಲಾಗುತ್ತಿದೆ.

ರಷ್ಯಾ, ಇಂಗ್ಲೆಂಡ್ ಸೇರಿದಂತೆ ವಿವಿಧ ದೇಶಗಳಲ್ಲಿ ಕೋವಿಡ್ ಪ್ರಕರಣಗಳು ಹೆಚ್ಚಾಗಿ ಜನ ತೊಂದರೆಗೆ ಸಿಲುಕಿದ್ದಾರೆ. ಭಾರತದಲ್ಲಿ ಅಂತಹ ಪರಿಸ್ಥಿತಿ ಇಲ್ಲ ಎಂಬ ಕಾರಣಕ್ಕೆ ನಿರ್ಲಕ್ಷಿಸುತ್ತಿರುವುದು ಆಕ್ಷೇಪಕ್ಕೆ ಗುರಿಯಾಗುತ್ತಿದೆ. ಕೊರೊನಾ ಅಗೋಚರ ಶತ್ರುವಾಗಿದ್ದು, ಯಾವಾಗ, ಯಾವ ರೂಪದಲ್ಲಿ, ಎಂಥಹ ರೂಪಾಂತರದಲ್ಲಿ ಬಂದರೆಗಲಿದೆ ಎಂಬ ನಿರ್ದಿಷ್ಟ ಮಾಹಿತಿಗಳು ಇರುವುದಿಲ್ಲ. ಹಾಗಾಗಿ ಸದಾ ಕಾಲ ಎಚ್ಚರಿಕೆಯೊಂದೇ ಅದಕ್ಕೆ ಮದ್ದು.

ಆದರೆ, ಸರ್ಕಾರವೇ ಎಚ್ಚರಿಕೆಯ ಮಾರ್ಗಸೂಚಿಗಳನ್ನು ಮೂಲೆಗುಂಪು ಮಾಡುತ್ತಿವೆ. ಬೆಂಗಳೂರು ಸೇರಿದಂತೆ ವಿವಿಧ ನಗರಗಳಲ್ಲಿ ಸೋಂಕು ಹರಡುವಿಕೆಯ ಪ್ರಮಾಣವನ್ನು ನಿರ್ಧರಿಸುವ ಆರ್ ವ್ಯಾಲ್ಯೂ ಒಂದಕ್ಕಿಂತಲೂ ಹೆಚ್ಚಿರುವ ಆತಂಕದ ವರದಿ ಬಂದ ಮೇಲಾದರೂ ಸರ್ಕಾರ ಎಚ್ಚೆತ್ತುಕೊಳ್ಳಲಿದೆಯೇ ಎಂಬುದನ್ನು ಕಾದು ನೋಡಬೇಕಾಗಿದೆ.