ಹುಬ್ಬಳ್ಳಿ : ಇಲ್ಲಿನ ವಿದ್ಯಾನಗರದ ಗಾವಡೆ ಅವರು ಆನ್ಲೈನ್ ಆಯಪ್ನಿಂದ ಪಡೆದ ₹4.26 ಲಕ್ಷ ಸಾಲಕ್ಕೆ ಬಡ್ಡಿ ಸಮೇತ ₹25 ಲಕ್ಷ ತುಂಬಿದರೂ, ಅವರಿಗೆ ಪದೇ ಪದೇ ಕರೆ ಮಾಡಿ ಹಣ ತುಂಬುವಂತೆ ಮಾನಸಿಕ ಹಿಂಸೆ ನೀಡಿ, ಫೋಟೊವನ್ನು ಅಶ್ಲೀಲ ಚಿತ್ರಕ್ಕೆ ಎಡಿಟ್ ಮಾಡುವುದಾಗಿ ಕರೆ ಮಾಡಿ ಬೆದರಿಸಿದ ವ್ಯಕ್ತಿಗಳ ವಿರುದ್ಧ ಹುಬ್ಬಳ್ಳಿ ಸೈಬರ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಗಾವಡೆ ಅವರು ಲೋನ್ಕ್ಯೂಬ್ ಆಯಪ್ನಲ್ಲಿ ₹8 ಸಾವಿರ ಲೋನ್ ಪಡೆದಿದ್ದರು. ಕಂಪನಿ ಅದರ ಬಡ್ಡಿ ಇಟ್ಟುಕೊಂಡು ₹4,900 ಅವರ ಖಾತೆಗೆ ಜಮಾ ಮಾಡಿತ್ತು. ಏಳು ದಿನದೊಳಗೆ ಲೋನ್ ಮರು ಪಾವತಿಸುವಂತೆ ತಿಳಿಸಿದಾಗ ಅವರು, ಬೇರೆ ಬೇರೆ ಆಯಪ್ಗಳಿಂದ ₹4.26 ಲಕ್ಷ ಸಾಲ ಪಡೆದು, ಅದನ್ನು ಮರಳಿ ಪಾವತಿಸಿದ್ದರು. ಆದರೂ ಹಣ ಪಾವತಿಸುವಂತೆ ಸಾಲ ನೀಡಿದ ಆಯಪ್ ಕಂಪನಿಯವರು ಕಿರುಕುಳ ನೀಡುತ್ತಿದ್ದರು. ಅವರಿಂದ ತಪ್ಪಿಸಿಕೊಳ್ಳಲೆಂದು ₹25 ಲಕ್ಷ ತುಂಬಿದ್ದರು. ಆದರೂ, ಬೇರೆ ಬೇರೆ ನಂಬರ್ಗಳಿಂದ ಕರೆ ಮಾಡಿ ಅಶ್ಲೀಲವಾಗಿ ಮಾತನಾಡುತ್ತ, ಕುಟುಂಬ ಸದಸ್ಯರಿಗೂ ಅಸಭ್ಯವಾಗಿ ಬೈಯುತ್ತ ಫೊಟೊವನ್ನು ಅಶ್ಲೀಲ ಚಿತ್ರಕ್ಕೆ ಎಡಿಟ್ ಮಾಡಿ, ಸ್ನೇಹಿತರಿಗೆ ಕಳುಹಿಸುತ್ತೇವೆ ಎಂದು ಬೆದರಿಸಿರುವುದಾಗಿ ದೂರಿನಲ್ಲಿ ತಿಳಿಸಲಾಗಿದೆ.