ಭಾರತೀಯ ಸೇನೆ ಸೇರುವ ಕನಸಿನಲ್ಲಿ ಮ್ಯಾಕ್ಡೊನಾಲ್ಡ್ ಹುಡುಗನ ಅರ್ಧರಾತ್ರಿ ಓಟ!

ನೊಯ್ಡಾದ ಸೆಕ್ಟರ್ 16ರ ಮ್ಯಾಕ್ಡೊನಾಲ್ಡ್ ಘಟಕವೊಂದರಲ್ಲಿ ಕೆಲಸ ಮಾಡುವ ಹುಡುಗ ರಾತ್ರಿ 12ರ ಸುಮಾರಿಗೆ ತನ್ನ ಶಿಫ್ಟ್ ಮುಗಿಸಿ ರಸ್ತೆಯಲ್ಲಿ ಓಡಿಕೊಂಡೇ ಮನೆ ಸೇರುತ್ತಾನೆ. ಅರ್ಧರಾತ್ರಿಯಲ್ಲಿ ಈತನ ಓಟವನ್ನು ಗಮನಿಸಿ ವಾಹನದಲ್ಲಿ ಸಾಗುತ್ತಿರುವವರು ಲಿಫ್ಟ್ ಕೊಡುವುದಕ್ಕೆ ಮುಂದಾದರೂ ಈತ ನಯವಾಗಿ ನಿರಾಕರಿಸುತ್ತಾನೆ.

ಏಕೆಂದರೆ ಭಾರತೀಯ ಸೇನೆ ಸೇರುವುದು ಈತನ ಗುರಿ. ಅದಕ್ಕಾಗಿಯೇ ಈತ ಫಿಟ್ನೆಸ್ ಶುರುಮಾಡಿದ್ದಾನೆ. ಬೆಳಗ್ಗೆ ತನ್ನೆಲ್ಲ ಕೆಲಸಗಳ ನಡುವೆ ಬಿಡುವು ಸಿಗುವುದಿಲ್ಲವಾದ್ದರಿಂದ ರಾತ್ರಿ ಕೆಲಸ ಮುಗಿಸಿ ಓಡುತ್ತಲೇ ಮನೆ ಸೇರುವುದಾಗಿ ಪ್ರದೀಪ್ ಮೆಹ್ರಾ ಎಂಬ ಈ ಹುಡುಗ ಹೇಳಿಕೊಂಡಿದ್ದಾನೆ.

ವಿನೋದ್ ಕಪ್ರಿ ಎಂಬ ಪತ್ರಕರ್ತ ಈತನ ಜತೆಗಿನ ಸಂಭಾಷಣೆಯನ್ನು ರೆಕಾರ್ಡ್ ಮಾಡಿ ಟ್ವಿಟ್ಟರಿನಲ್ಲಿ ಹಾಕಿದ್ದು, ಇದೀಗ ಅದು ಭಾರಿ ಟ್ರೆಂಡ್ ಆಗಿದೆ. ಜೀವನೋತ್ಸಾಹ ಮತ್ತು ಕನಸು ಬೆಂಬತ್ತುವುದನ್ನು ಈ ಹುಡುಗನಿಂದ ಕಲಿಯಬೇಕು ಎಂದು ಲಕ್ಷಾಂತರ ಜನ ಪ್ರಶಂಸಿಸಿದ್ದಾರೆ.