ಜಿಮ್ ನಲ್ಲಿ ಹೃದಯಸ್ತಂಭನ ತಡೆಗೆ ಏನು ಮಾಡಬೇಕು?

ಮೈಸೂರು: ಜಿಮ್ ಮಾಡಿದರೆ ಹೃದಯಸ್ತಂಭನವಾಗುತ್ತದೆ ಎಂಬ ಮಾತುಗಳು ಇತ್ತೀಚೆಗಿನ ದಿನಗಳಲ್ಲಿ ಹೆಚ್ಚಾಗಿ ಕೇಳಿ ಬರುತ್ತಿದ್ದು, ಇದರಿಂದ ಬಹಳಷ್ಟು ಮಂದಿ ಜಿಮ್ ನಿಂದ ಹಿಂದೆ ಸರಿಯಲು ಕಾರಣವಾಗಿದೆ. ಹಾಗಾದರೆ ನಿಜವಾಗಿಯೂ ಜಿಮ್ ನಿಂದ ಹೃದಯ ಸ್ತಂಭನವಾಗುತ್ತದೆಯಾ ಎಂಬ ಪ್ರಶ್ನೆಗೆ ಉತ್ತರವಿಲ್ಲ. ವೈದ್ಯರು ಇದನ್ನು ನಿಜವೆಂದು ನಂಬುವುದಿಲ್ಲ.

ಹಾಗಾದರೆ ಹೃದಯ ಸ್ತಂಭನವಾಗಲು ಕಾರಣವೇನು ಎಂಬುದಕ್ಕೆ ವೈದ್ಯರು ನೀಡುವ ಉತ್ತರ ಏನೆಂದರೆ ಕೆಲವರು ಡಯಾಬಿಟೀಸ್, ರಕ್ತದೊತ್ತಡ ದಂತಹ ಕಾಯಿಲೆಗಳಿಂದ ಬಳಲುತ್ತಿರುತ್ತಾರೆ. ಅಂತಹವರು ಅತಿ ಹೆಚ್ಚಾಗಿ ವ್ಯಾಯಾಮ ಅಥವಾ ಜಿಮ್ ಮಾಡುವುದರಿಂದ ಕೆಲವೊಮ್ಮೆ ಹೃದಯ ಸ್ತಂಭನ ವಾಗುವ ಸಾಧ್ಯತೆಗಳಿವೆ. ಹಾಗೆಂದು ಜಿಮ್ ಮಾಡುವವರಿಗೆಲ್ಲ ಹೃದಯಸ್ತಂಭನವಾಗುತ್ತದೆ ಎಂಬುದು ನಿಜವಲ್ಲ ಎಂಬುದಾಗಿ ಅಭಿಪ್ರಾಯಪಡುತ್ತಾರೆ.

ಜಿಮ್ ತರಬೇತಿದಾರರು ಮುಖ್ಯವಾಗಿ ಸಿಪಿಆರ್ (ಕಾರ್ಡಿಯೋ ಪಲ್ಮನರಿ ರಿಸಕ್ಸಿಟೇಷನ್) ತಿಳಿದುಕೊಳ್ಳಬೇಕು. ಏಕೆಂದರೆ ಕಾರ್ಡಿಯೋ ಪಲ್ಮನರಿ ರಿಸಕ್ಸಿಟೇಷನ್ (CPR) ಎನ್ನುವುದು ಜೀವರಕ್ಷಕ ತಂತ್ರವಾಗಿದ್ದು, ಹೃದಯಾಘಾತವಾದಾಗ ಮತ್ತು ಇನ್ನು ಅನೇಕ ತುರ್ತು ಸಂದರ್ಭಗಳಲ್ಲಿ, ಹೃದಯ ಬಡಿತವು ನಿಂತು ಹೋದರೆ ಮತ್ತೆ ಹೃದಯವನ್ನು ಎಚ್ಚರಿಸಲು ಇದು ಸಾಧ‍್ಯವಾಗುತ್ತದೆ. ಆದ್ದರಿಂದ ಪ್ರತಿ ಜಿಮ್ ಕೇಂದ್ರಗಳಲ್ಲಿ ಜಿಮ್ ತರಬೇತಿದಾರರು ಸಿಪಿಆರ್ ಬಗ್ಗೆ ತರಬೇತಿ ಪಡೆಯುವುದು ಬಹುಮುಖ್ಯವಾಗಿದೆ.

ಈ ಕುರಿತಂತೆ ನಮ್ಮ ಮೈಸೂರು ಫಿಟ್ ಮೈಸೂರು ಕಾರ್ಯಕ್ರಮದಲ್ಲಿ ನಗರದ ಪ್ರತಿಷ್ಠಿತ ನಾರಾಯಣ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಯ ಹೃದ್ರೋಗ ತಜ್ಞರಾದ ಡಾ. ಕೇಶವಮೂರ್ತಿ ವಿ. ಅವರ ನೇತೃತ್ವದ ವೈದ್ಯಕೀಯ ತಂಡವು ಮೈಸೂರು ನಗರದ ಸುಮಾರು 200 ಕ್ಕೂ ಹೆಚ್ಚು ಜಿಮ್ ತರಬೇತುದಾರರಿಗೆ ಸಿಪಿಆರ್ ವಿಧಾನದ ಬಳಕೆಯ ಕುರಿತು ಮಾಹಿತಿ ಮತ್ತು ಈ ವೈದ್ಯಕೀಯ ವಿಧಾನದ ಮಹತ್ವದ ಬಗ್ಗೆ ಪ್ರಾತ್ಯಕ್ಷಿಕೆಯನ್ನು ನೀಡಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಜಿಮ್ ಮಾಡುವವರಲ್ಲಿ ಜಿಮ್ ಮಾಡುವ ಸಮಯದಲ್ಲಿ ಹೃದಯ ಸ್ತಂಭನ ವಾಗುತ್ತಿದೆ ಎಂಬ ಅಂಶವು ಚಾಲ್ತಿಯಲ್ಲಿದ್ದು, ಜಿಮ್ ಮಾಡುವುದರಿಂದ ಹೃದಯ ಸ್ತಂಭನವಾಗುತ್ತದೆ ಎಂಬುದು ಸತ್ಯವಲ್ಲ ಎಂದು ಹೃದ್ರೋಗ ತಜ್ಞರಾದ ಡಾ. ಕೇಶವಮೂರ್ತಿ ತಿಳಿಸಿದರು. ತಮ್ಮ ದೇಹದ ಸಾಮರ್ಥ್ಯಕ್ಕನುಗುಣವಾಗಿ ನಿಯಮಿತವಾಗಿ ಜಿಮ್ ಮಾಡುವುದರಿಂದ ಆರೋಗ್ಯಕರ ಜೀವನವನ್ನು ನಡೆಸಬಹುದಾಗಿದೆ. ಪ್ರತಿಯೊಬ್ಬ ಜಿಮ್ ತರಬೇತುದಾರು ಈ ಜೀವ ರಕ್ಷಣಾ ವಿಧಾನದ ತರಬೇತಿ ಪಡೆದುಕೊಳ್ಳುವುದು ಅತ್ಯವಶ್ಯಕ ವಾಗಿದೆ ಎಂದು ಸಲಹೆ ನೀಡಿದ್ದಾರೆ.